Read Southern Rengma Naga CHWEKETIN 27 Bible Online

CHWEKETIN 27 - Southern Rengma Naga bible

CHWEKETIN 27

¹“Akakia sen pe kershvubin nme thyülo. Tsüle kethon keda ketun kü ti, kethon tsu pvün keda tsu pvün, lo ketetso tsu shen.

²Qünzi tsü a-tse no bin ti. Tsüno kershvubin gü kesü nme thyüti lo apentha lazo pe jeh küla.

³Jonbü keshü khun, kekinvü, khun, kehüsü lo magi kekinkhun thyülo. Kanyü hidan aphu lazo pe thyülo.

⁴Lazo pe raho thyülo-o khipen nrün lazo raho pezi pe tsü qün dan ka shülo.

⁵Rahü tsü pe kershvubin te hensin shülo no kershvubin gü a-lvu tilo nrün genyu.

⁶Akakia sen pe kepenvü thyülo-o lazo pe jeh la,

⁷tson-o pen nrün ka pe kershvubin te lizin hizin raho nyu tsü nnalo.

⁸Ale kazüthun gü ge tsin pe nhikeshü hontse senpon pe kershvubin gü thyülo, lo kegü lo.

⁹“Ale kehü phika gü kamhun linen phikegwa pe kesunphi thyü ti. Tesinzin kesunphi gü no tsu tsime ti,

¹⁰kachon nki lo a-ketun nki le lazo pe thyü ai kehüsü lo ketsevü dan le rakagi pe thyüti.

¹¹Kamhun tesozin ko tsü keme tse thyüti.

¹²Lo nkhünzin le kesunphi tsu henpvün pe kachon tseryü lo a-ketun tseryü sin-o sen ti.

¹³Nphozin khenpvü kebin kipon le kamhun le tsu henpvün ti.

¹⁴Khenpvü lizin hizin kesunphi tsu tseryüpvün, lo kachon kenshen lo ketun kenshen tseti.

¹⁶Khenpvü kesunphi le linen phikegwa kenzi, kemeren, lo thyühü kenhon pe do-o a-ge thamen zü kezegwa kethyü tsu nki pe thyü nrün genyu. Kachon pezi lo ketun pezi ge tsüpe sunti.

¹⁷Kamhun kehun aphu rakagi pe kethyü ketseyi lo kehüsü dan pe lazo ketun ge shü tseo senkesü küti.

¹⁸Kamhun kehun no kethon tsu tsi, keda tsu henpvü lo ketetso tsu pvün tseti. Kesunphi le linen kegwa lo ketun le lazo.

¹⁹Phika gü nyu kesen kanyü lo kamhun nyu kesen ketseyi aphu lazo pe thyü küti.

²⁰“Makenben gü no nben zin bin nrün genyu Israel nyu no oliv terzü kegwatsin senryü lo tse zoshü.

²¹Aaron lo a-nyu dan le ale bin kehü phika gü tegwezin kejozenkelo khinpha gü mhundyü nyu makenben khin gü pe shüo tsünyu amhundyü ka ngwün ki gü lonyü keti tsü no nben binti. Johokeshü higü hi Israel nyu lo tsipwen no kethonthen then hüti.