Read Southern Rengma Naga CHWEKETIN 28 Bible Online

CHWEKETIN 28 - Southern Rengma Naga bible

CHWEKETIN 28

¹“Ntsagü Aaron lo a-nyu, Nadab, Abihu, Eleazar lo Ithamar tse koshülo. Anyugun no Püshükeda thyüo alothyü nrün genyu Israel temi dan nyu khikho kecha thyü shülo.

²Ntsa Aaron no tenge pfü lo zegwa lo nrün genyu püshükeda phinya thyü shülo.

³Ale thathyü lokegwa pe tsü kela thathyükeshanyu aphu ko shüo anyugun no Aaron thyü kenshün pe apüshükeda nme thyü lo nrün genyu, a-phinya thyü shülo.

⁴Anyugun no, shüntyü, püshükeda bola, mirünketseyho, a-jvükezü bola, pekeju lo senkephin tse thyüshülo. Ntsagü Aaron lo a-nyudan no püshükeda thyüo alothyü nrün genyu anyugun no püshükeda phinya hidan thyüshü lotse zoshülo.

⁵Thathyükeshadan no nikenzi, kemeren, thyühüni kenhon, suna ni lo linen kegwa sen ti.

⁶“Anyugun no kenzi, kemeren, thyühüni kenhon, suna ni lo linen kegwa a-ge thamen zükezegwa kethyü pe püshükeda bola thyülo.

⁷Phin lokegwa buthun kerhe kenyhun pe a-te ge sen shü.

⁸Tsühontse kethyü pe senkephin dokegwa thyüpe püshükeda bola senkesü pe nme thyülo.

⁹Karnelian tso kenyhun khilo-o Jakob nyu tseryükenyhun dan zan pe a-ge thulo,

¹⁰a-nyugun nchepüshü thyüo mitsero pe tso nme ge lo tsero pe kecha gü ge tse thulo.

¹¹Tsominketsen nroshasa kethyü nme no Jakob nyu dan zan pe a-ge thushüo suna pe tsodan tekho shü.

¹²Tson-o pe Israel tsipwen tseryü kenyhun sunka püshükeda bola bukerhe hvu ge shülo. Hihontse Aaron le anyugun zan khipfüti, tson-o Ale Npugü, ale a-zintse atemi dan rüchün hüti.

¹³Suna pe kekho kenyhun thyülo

¹⁴lo suna ketsin lo kerasü kenyhun nlü pe ron hontse lo njüo pe kekho hvu ge dyü lo.

¹⁵“Püshükengun güno sen-o Sunggigü kendo shalo nrün genyu shüntyü nme thyülo. Püshükeda bola kethyü kanyü tsühontse kethyü pe thyü lo tsü kemetse a-te rishü.

¹⁶Tsüle kese kenyhun thyü lo kethon keda keme ti, kethon küme lo keda küme tseti.

¹⁷Tsüge tso minketsen pe tsonzi thyü nku shü; tson kerigü rubi, topaz, lo garnet;

¹⁸tson hvugü, emerald, safir lo diamond;

¹⁹tson shan gü turquoise, agate, lo amethist;

²⁰tsonzi gü, beril, karnelian, lo jasper. Suna pe a-tekho-o shüti.

²¹Tso tseryü kenyhun dan hi nmeme ge Israel tsipwe sunka, Jakob nyu nme zan thu kü lo.

²²Shüntyü gü genyu suna ketsin kerasü, ron kenlü thyülo.

²³Suna lo raho kenyhun thyü pe shüntyü gü tesozin a-te kepen senshü,

²⁴tson-o suna ron hvu tsüpe raho hvu ge sen shü.

²⁵Lo ron mün pehazin pe a-ke kho ge dyüo pe püshükeda bola mhundyü zin shüti.

²⁶Tson-o raho kenyhun thyüpe shüntyü tesinzin a-teka a-nyuzin püshükeda phi khoka shülo.

²⁷Suna raho kenyhun thyüsin pe püshükeda bola kerikun lo senkephin dope gwasa kethyü kho ka bukerhe ge sen shü.

²⁸Ron kenzi pe shüntyü ge raho lo püshükeda phi raho phin shü, tson-o shüntyü gü no tseyho tsüryü lomvuo senkephin so binlo nrün genyu.

²⁹“Aaron le kenshün bin günyu keyüka, Israel nyu tsipwe dan zan thu kebin shüntyü higü lu-o yüti, tson-o ale Npugü, ale a-zintse a-temi dan rüchün hüti.

³⁰Urim lo thummim pe shüntyü ge shülo, tson-o Aaron no a kenshün mhundyü nyu keryü ka tsü pfüti. Israel nyu temi genyu akenda shalo nrün genyu a-no tsügwenkho ka a-zintse shüntyü higü lu mvuloshvu.

³¹“Püshükeda bola phi hensin mirün ketseyho gü tsü thyühü kenzi pe thyüti.

³²N pe genyu a-kü nme no binti, lo tsüno nrhen lamvu nrün genyu kedo phi pe a-tejo la.

³³Lo tesin zin a-shwen ge thyühü kenzi, kemeren, lo kenhon pe khüratyü sha hontse pe suna kentsin zen kenphün shü.

³⁵Aaron le püshükeda tho thyü kebin ka mirün ketseyho hi ben ti. A-le kenshün bin nyu amhundyü ka ryü lo tinkejü kentsin khwe nyü lo lati, tson-o a-le simvu loti.

³⁶“Suna ketsin pe khun nme thyülo-o tsüge ‘Thyükenshün pe Npugü tsü laso’ tson thulo.

³⁷Tsü pe pe keju gü mhundyü zin shüo ron kenzi nme pe phinlo.

³⁸Aaron no tsüpe a-senpfü ka shüpfülo, tson yatselo Ale Npugü, ale Israel nyu le thahokeshü ka thyükezü peha le bin-e anyugun le thyünshün pe atsü keshü aphu lolo ti.

³⁹“Linen kegwa pe Aaron bola lo pekeju dalo, lo a-senkephin ko a-jvü thuo thyü kezegwalo.

⁴⁰“Aaron nyu dan no tengepfü lo zegwa lo nrün genyu anyugun bola, senkephin lo pekeju thyülo.

⁴¹Phinya hidan pe ntsa Aaron lo anyudan ge shüshü. Tson-o anyugun no püshükeda tho thyüo alothyü nrün genyu oliv terzü pe anyugun yün-o khikho kecha thyüo thyü kenshün lo.

⁴²Anyugun kenyhün henlo nrün genyu linen phi pe nyaketsekhin nsenka tsügü ndin keti thyü lo.

⁴³Aaron lo anyudan no amhundyü nyu phika ka nmvue kenshün bin gü nyu püshükeda tho thyü keryü ka kenyhün ryüo silamvu nrün genyu a-zintse tsünya mvuloshvu. Hile Aaron lo a tsipwe genyu kethonthen tejvü nme thyüti.