Read Southern Rengma Naga CHWEKETIN 3 Bible Online

CHWEKETIN 3 - Southern Rengma Naga bible

CHWEKETIN 3

¹Khenyüme Mosa le a-migü Jethro, Midian nyu Püshükeda gü tanyü khwen hü, a-le tanyü dan zen-o tehen yhunkemvu kazü gü nken-o, kazüthun kenshün gü Sinai karyü.

²Tsüka Npugü jolo gü le mah kenyü nyu tehenphun nme ka a-yhühyu thyü shü. Mosa le mah le tehenphun ka nnyübin-e tsü rokemvu hyulo.

³A-le rüchün-o, “Hile ndunkethyü nme so. Dihontseo tehenphun gü romvuyo? Ale a-kho nnigü shwishüti.”

⁴Mosa le a-khonni ryü kejü Npugü le hyushüo tehenphun nyu a-ko-o, Mosa! Mosa! tsonshü. Tsontsin a-le, “ale hika hü nle,” tson.

⁵Sunggigü le a-ka, “Kho nni ryünya. Nphakü tho lalo, nle sokebin bin tsüle nshün kethyü genyu.

⁶Ale npvübon nyu Sunggigü, Abraham, Isak lo Jakob Sunggigü le.” Tsontsin Mosa le a-mhunsun lola, a-le Sunggigü nri nshvu kela genyu.

⁷Tson-o Npugü le, “Ale Ijipt nyu atemi dan le kenjünthyü kebin hyu laso; anyugun keshwinyu ben nyu kenjünthyü thathyü kebinnyu anyukhishwi shü lotse nra kebin khwen ale nyülo laso,

⁸tsügenyu ale Ijiptnyu bennyu anyugun khishwi lo-o Ijipt kazü nyu anyu zen chwigü kazü kebwe kegwa ntsoka Kanannyu, Hitnyu Amornyu, Periznyu, Hivtnyu lo Jebusnyu le yhun kebin kazü günyu shüti tse ryü bin nyo.

⁹Ale atemi dan kenra khwe nyülo, lo dihontse Ijiptnyu le anyugun nshwe bin yo hyu laso.

¹⁰Tsü genyu ntsoka ale nnipe Ijipt raja gü ki shü bin nle, nno atemi dan tsonrio a-kazü nken chwila nrün genyü.”

¹¹Ai Mosa le Sunggigü ka, “Ale lihi kemvu. Ale dihontse rajagü kigü Ijipt nyu Israel nyu zen chwiryü lo tila?”

¹²Sunggigü le, “Ale nzen hüti, lo nle Ijipt nyu temi dan zen chwi keryüka, hagun le kazüthun hige arüshvuti. Tsügü tsüle ale nnishü ketsin tse kethyü tsin keshüle.”

¹³Ai Mosa le a-jo kenio, “Ale Israel nyu ki gü anyugun ka, ‘Hagun bonnyu Sunggigü le anishüle’ tselo anyugun le, ‘A-zan le següla?’ tse aka shün soti. Tsonlo ale anyugun ka dihontse zo mon?”

¹⁴Sunggigü le, “ALE ALE GÜ TSÜLE. Nle hipe anyugun ka zo shümvu loshvu: ‘ALE tse ko kehü güle anipe hagun ki shü bin nle.’

¹⁵Israel nyu dan ka, Ale Npugü anyugun pvü bonnyu Sunggigü, Abraham, Isak lo Jakob Sunggigü le nnipe anyugun ki shü bin nle tsezo shülo; Hile kethonthen azan le; hontse ryükejü shehe aphu ako hüti.

¹⁶Gü Israel nyu sharhidan aphu ko kequen shüo anyugun ka Ale Npugü, anyugun pvü bonnyu Sunggigü, Abraham, Isak lo Jakob Sunggigü le nyhühyu thyü shüle tse zo shülo. Ale ryüo Ijiptnyu le anyugun ge nyuthyü bin yo hyu laso.

¹⁷Ale Ijipt nyu le anyugun nshwe nyhün kebin nyu anyugun zen chwigü kazü kebwe kegwa, Kanannyu, Hitnyu, Amornyu, Periznyu, Hivtnyu lo Jebusnyu kazü nyu shüla titse rhilo laso.

¹⁸“Atemi dan le nle nyu zoyo nyüti. Tson-o nle Israel nyu sharhi dan zen-o Ijipt raja gü ki gü a-ka, ‘Ibrinyu Npugü, Sunggigü le a-npfü agun yhühyu thyü shüle. Agun khinya-o agun no jonshan tehenyhun kemvu bin ki tsonchü gun gü Kerüshvu thyüpe Npugü agun Sunggigü tsülo.’

¹⁹Hagun le tenge tse kemvu we Ijipt raja güle hagun hoshü kemvui tse ale sha bin nyo.

²⁰Ai ale akekvu nyu kenrinthyüo shaja pe Ijipt nyu tsüti. Tsüsiki nyu a-le hagun hoshü ti.

²¹“Ale Ijipt nyu thyüpe no hagun rühvuti tson-o atemi dan le chwi kejü ka, anyugun no kenben tin loho.

²²Israel nyu tenunyu nmeme tse gü Ijipt nyu a-kajon nyu lo Ijipt nyu lihigü a-kanyu kebin nyu ka, phinya lo suna lo raka nye, tyü hikü loti. Israel nyu dan le hidan hi pe anyenyu peche lo tenu ge-e shüo Ijipt nyu kenya sentin lati.”