Read Southern Rengma Naga CHWEKETIN 30 Bible Online

CHWEKETIN 30 - Southern Rengma Naga bible

CHWEKETIN 30

¹“Tharünkegwa ro nrün genyu akakia sen pe kershvubin nme thyülo.

²Tsüle kethon keda ketunkü ti, kethon tsu me, keda tsu me lo ketetso tsu hvu. Aqün ka a-tse dan kesin thyüme ti.

³Suna ketsin pe a-so, a-te lizin hizin lo a-tse aphu jeh lo, lo suna pe a-tekho hunlo.

⁴Kepenvü pe nna-o pen nrün genyu suna pe raho kenyhun thyüpe a-tekekho kepen hensin nyu senkesü shü.

⁵Akakia sen pe kepenvü hidan thyülo-o suna pe jeh lo.

⁶Kershvubin higü pe kejozenkelo khinpha gü mhundyü nyu phi süden kebin ngwenzin shülo. Ale bin tsügü ka hagun teno ti.

⁷Lonyütsen Aaron le makhin dan ketsükela keryüka, a-le tharün kegwa pe tsüge roshü ti.

⁸A-le kheje gü makhin nben kethyü ka-e tson shü mvuloshvu. Ryükejü gwenkho aphu ka tharün kegwa kero hi khemvu tse thyüzin bin ti.

⁹Kershvubin hi ge nshün kemvu tharün kenyü, nyukhu, nmvue shyeni, lo vain zu-e ja pe tsüge rüshvu nya.

¹⁰Chen me ka gwengwa Aaron le kemu rothyükela nyukhu zi gü pe kershvubin tse pezi dan ge shüo kershvubin gü thyü nshün kelo jvu thyü ti. Ryükejü gwenkho aphu nyu chenkechwi hihontse thyüti. Kershvubin higü no nshün pen, lo khikho kechathyü pe Npugü, atsüti.”

¹¹Npugü le Mosa ka zoshü,

¹²“Nle Israel nyu temi keswü ka, temi nmeme tse a-keyhun mi pe atsüti, tson-o temi swükelo ka kenkekemhü nme no ryümvu nrün genyu.

¹³Temi keswü ka swü pe sinlo kelanyu nmeme tse pisa dikho shümvulo shvuyo tsü kho tsü then-o shüti. Temi aphu tsüpe akerüshvu hontse tsüpe atsü mvulo shvu.

¹⁴Ligü higü temi keswü ka swülo kelanyu, tsü le a-keyhun chen nki lo tsüsa kelanyu le pisa higü pe atsüti.

¹⁵A nyugun le anyu keyhun genyu pisa higü khi keshü ka kenya gü no chon lo kendi gü no rho tse kemvui.

¹⁶Israel nyu temi dan ka pisa higü shvulo-o pe ale kehü phika gü genyu mvulo keshvu thyülo. Keshvu higü hile anyugun keyhun mi thyü keshü lo ale tsü rüchün-o anyugun ntsen loti.”

¹⁷Npugü le Mosa ka zoshü,

¹⁸“Lazo pe khunda nme lo a-kedunbin tse thyülo. Tson-o pe phika gü lo kershvubin au jaka shüo züpe tsünyu shülo.

¹⁹Aaron lo anyu dan le zü tsüpe anyugun phaben süti,

²⁰anyugun le phika gü nyuyü nmvue kershvubin karyüo ketyüketsü pe rüshvu kethyü mhundyü. Tson yatselo anyugun le sila loho.

²¹Anyugun no silamvu nrün genyu anyugun phaben süla mvu loshvu. Hile anyugun lo anyu nyenyu genyu kethonthen then kehü jvu nme thyüti.”

²²Npugü le Mosa ka zoshü,

²³“Terzü rünkegwa tsin dan-myrrh kilogram tsero, sinnamon rünkegwa kilogram kenshen, ter rünkegwa kilogram kenshen,

²⁴lo kassia kilogram tsero khilo (Kensu dan aphu mele sen kehü khoti.) Oliv terzü liter pezi pe sinlo,

²⁵lo tharünkenyü pe kerhün pe yün kethyü terzü kenshün thyülo.

²⁶Tsüpe ale kehü phika gü lo kejozenkelo khinpha gü,

²⁷miz lo tsüka kesen kanyü, makhin lo tsü kanyü, tharünkenyü ro nrün kershvubin gü,

²⁸rope kerüshvu thyü kehü kershvubin lo tsünyu kesen kanyü aphu kesin lo sü nrün khunda lo a-kedunbin aphu yünlo.

²⁹Hihontseo hidan hi thyü kenshün lo, tson yatselo hidan le nshün pen lati lo temi nmvue lihi-e tsüdan kesü keshü güle tsü kenshün kekvu güle nthyünnyü lati.

³⁰Tsüsika terzü pe Aaron lo anyu dan yün-o khikho kecha thyü pe alotho genyu püshükeda thyülo.

³¹Israel nyu temi ka, ‘Ryükejü gwenkho aphu nyu a lotho ka yün kethyü terzü kenshün higü senti tse zoshülo.

³²Tsü jape temi kedukerunyu ge shünya, lo nle hihontse kerhün kethyü jvu kecha we thyü nya. Tsüle nshün tsügenyu tsü sen kenshün thyümvulo shvu.

³³Temi ligü higü tsühontse thyü nmvue püshükeda nyu kemvu ge tsü sen lo a-le atemi letse rüchün nimvu lati.’ ”

³⁴Npugü le Mosa ka zoshü, “Tharünkegwa hidan hi ketunkü kü khilo--stakte, onikha, galbanum, lo nshünchün ketsin,

³⁵tsüdan pe tharünkenyi kerhün-o tharünkegwa thyülo. Tsüno shvu lamvu lo nshün nrün genyu tsi pe shülo.

³⁶Tson-o peha jonshwe kegwathyü lo-o sen gü ale kehü phika günyu kejozenkelo khinpha gü mhundyü nyu kezenshü. Tharünkegwa higü hile nshün pen tseo senlo.

³⁷N npfü ngenyu tharünkegwa tsühontse kethyü jvü lihi-e thyü sen nya. Tsüle thyükenshün pe atsükela kenshün kanyü tse senlo.

³⁸Lihigü tharünkegwa tsü hontse kethyü thyü sen lo, a-le atemi letse rüchün nimvu lati.”