Read Southern Rengma Naga CHWEKETIN 31 Bible Online

CHWEKETIN 31 - Southern Rengma Naga bible

CHWEKETIN 31

¹Npugü le Mosa ka zoshü,

²“Ale Judah tsipwe ka, Hur nyugü Uri nyu Bezalel kejülo laso,

³lo ale akekvu pe a-kesü thyüshü la sele. Ale kensü, tedokegwa lo thatho lihi-e thyü lo kegwa--

⁴suna, rakagi lo lazo sen-o a-dogwasa tse thathyü kezegwa lo kegwa rhikelo;

⁵tso minketsen rhen; sen dukesha lo thatho kezegwa kecha lihi-e thyü nrün pe a-tsü laso.

⁶Ale Dan tsipwe ka Ahisamak nyugü Oholiah ko no a-zen-o thathyü nrün genyu kejülo laso. Ale thyülo tse zokeshü lihi-e thyü nrün genyu tha thyülo kegwa khipe thathyü keshanyu aphu tsüshü laso:

⁷Ale kehü phika gü, kejozenkelo khinpha gü, lo tsü soge kebin shwikenjün bin lo phika günyu kanyü aphu,

⁸miz lo tsüka kanyü, suna ketsin pe kethyü makenben bin lo tsüka kanyü aphu, tharün kegwa rope kershvubin,

⁹rope kershvubin lo tsüka kanyü aphu khunda lo tsü kedunbin,

¹⁰Aaron lo anyudan le püshükeda tho kethyü ka kesen püshükeda phinya kezegwa dan,

¹¹yün kehü terzü, kenshün bin gü genyu tharün kegwa. Hidan hi aphu kethyü ka, Ale nka johokeshü gwenzin tse thyüti.”

¹²Npugü le Mosa ka johoshü

¹³Israel temi dan ka zoshülo, “Akerüyü jon, Sabbath zenlo, tsüle ryükejü gwenkho aphu nyu Ale Npugü, ale hagun pe anpfü atemi thyülo tse kethyü ngun jaka zansü nme.

¹⁴Hagun le kerüyü jon gü zen mvuloshvu, tsü le nshün. Ligü higü tsü zen mvuo tsünyü thatho thyü yatselo no silati.

¹⁵Jon tsero ja katsü hagun tho thyülo, ai jon tsenyü gü we thyü kenshün pe atsü kela kerüyü jon. Ligü higü jon tsügü nyü tha lihi-e thyülo no silati.

¹⁶Kejozenkelo gü zansü Israel nyu temi le jon higü zenti.

¹⁷Tsüle ale lo Israel nyu jaka binzin kehü zansü nme, Ale Npugü, jon tsero jaka tsang lo kazü thyüshü, lo jon tsenyü gü nyu rüyü tinkela genyu.”

¹⁸Sinai kazüthun ge Sunggigü le Mosa nthon pen lao a-ben pe johokeshü dan thukelo tso pon kenyhun pe Mosa tsüshü.