Read Southern Rengma Naga CHWEKETIN 32 Bible Online

CHWEKETIN 32 - Southern Rengma Naga bible

CHWEKETIN 32

¹Temi dan le Mosa le kazüthun ge hüthon tin lao tsenryü mvukela hyulo njüo ryü Aaron hun lo-o a-ka, “Ijipt ki ngun zenchwi keryü temi gü Mosa le dihontse la seyo ngun le shamvu laso; tsügenyu teronyu nme thyüpe agun tson rishülo.”

²Aaron le anyugun ka zoshü, “Hagun nunyu, lo hagun nyu peche lo tenu le rakehü suna senryü atsü shülo.”

³Tson-o anyugun aphu anyu suna nye senryü Aaron tsüshü.

⁴Lo a-le suna nye dan tsü keluzun pe methunyu nme chashü. Tsüka temi dan le, “Israel nyu, hile Ijipt nyu ngun tsonri chwikeryü ngun tero güle! tson zoshü.”

⁵Tsüselo Aaron le suna methunyu mhundyü nyu kershvubin nme thyü shüo, “Senduki Npugü kerühvu nga nme no binti,” tse zo shü.

⁶Tsüsinyü lonyü nshwe anyugun le senru peha senryü rope rüshvu lo kechanyu le kepfüshe kerüshvu hon tse tyütsü bin. Temi dan le dun-o tyütsü tse njüo serikemvu thyü tinla.

⁷Npugü le Mosa ka zoshü, “Gwen tse rani nshelo, nle Ijipt nyu zenchwi keryü ntemi dan le akhela-o mu tin laso.

⁸Ale anyugun no then lotse johokeshü tson gü khe laso; anyugun le suna keluzun pe methunyu nme thyülo-o rüshvu lo kerüshvu thyü pe tsübin laso. Anyugun le higü hile Ijipt nyu a-nyu zen chwiryü kelo tero gü le tse zo bin nyo.

⁹Temi hidan hile ditsüki anyunrü yo ale shabin.

¹⁰Tsügenyu akhin nya. Ale anyugun ge anyunta bin nyo, tsügenyu anyugun nke lati. Tson-o ale ntsipwen thyü pe senye keda nme thyü shüti.”

¹¹Ai Mosa le Npugü Sunggigü ka akenjü hio zoshü, “Nle nyuthyüo nkekvu keda ka Ijipt nyu kenizenchwi keryü ntemi dan ge nnyunta bin mon?

¹²Nyuthyüo Ijipt nyu no nle kazüthun ge ntemi dan dushvu lo nke shüla ti tseo Ijipt nyu anyugun zen chwiryü letse zolo kegwa thyü tila? Nnyunta nyala lo; nnyun süni la-o kenke kemhü higü senryü ntemi ge shü nyalo.

¹³Ngo Abraham, Isak lo Jakob rüchün shülo. Nle swe-o anyugun tsipwe thyü nchon pe tsangge shyenyü dan hontse shüti, lo kazü tsügü aphu pe anyugun no kethonthen anyu hon thyüti, tse njohoshü kenjü rüchün shülo.”

¹⁴Tsontsin Npugü le anyun sünilao kenke kemhü senryü atemi dan ge shü mvula.

¹⁵Mosa le johokeshü pe kepenpen thu kenjü tsopon kenyhun tsü sen-o kazüthun ge tsenryü.

¹⁶Sunggigü le a npfü tsopon hvu thyüshü lo johokeshü dan pe tsüge thu shü.

¹⁷Temi dan le nrasen kebin Joshua le nyülo-o Mosa ka zoshü, “Ale kensenbin ka terithyü kebin khwe nyü le.”

¹⁸Mosa le, “Tsüle kvukelo nmvue mezen loho kela khwe kemvu hontse; tsüle lü kethyü khwe le,” tson zoshü.

¹⁹Mosa le kensenbin gü kho nni ryüo methunyu gü lo temi dan le da thyü kebin hyushüo a-nyunta sala. Tson-o kazüthun gü phaka ale senkehü tsopon hvu shwe pe jonren la.

²⁰A-le anyu gun le thyükelo methunyu gü khilo-o tsü rozun la-o dunkephü pe zü nyu shüo Israel nyu no tsü.

²¹Mosa le Aaron ka zoshü, “Temi hidan le n ge nyuthyü shüo, nle anyugun no kemu keda tsühontse thyüla ola?”

²²Tsontsin Aaron le, “Age nnyunta nyalo; temi hidan le dihontse gwakemvu thyünyü tserü hüyo nle shabin.

²³Anyugun le aka, ‘Ijipt ki ngun zenchwi keryü gü, Mosa hile nyuthyü la seyo ngun le shamvu so; tsügenyu teronyu nme thyüpe agun tsüo no agun tson rilo,’ tson zoshü le.

²⁴Lo ale anyugun lihigü suna kebin nyu no senryü lotse shüo anyugun le pe atsüshü. Tson-o ale shwe pe mah nyu shü laryü methunyu hile chwiryü le!”

²⁵Aaron le temi dan kekheni lo mvulao no anyugun shwikerüchün nyu mhundyü nyu anyugun npfü anyu sa bin kela Mosa le hyulo.

²⁶Tsügenyu a-le kensenbin khinrun ka so-o senshü, “Npugü denzin kebin nyu aphu hika ryülo!” Tson-o Levinyu dan aphu aki ryü kequenlo,

²⁷lo a-le anyugun ka zoshü, “Israel nyu Npugü Sunggigü le ahza hokeshü le hagun lihigü a-zhethon pfülo-o hika khinrun ka gü kechazin keti kensenbin nyu ho-o a-tsasikezenyu, a-pfünyu lo a-kazonyu dushvu lalo,” tsonshü.

²⁸Levi nyu dan le a-jozen-o tsünyü temi yieshen kho dushvula.

²⁹Mosa le Levinyu dan ka zoshü, “Nthu hagun le hagun nyenyu lo hagun tsasikezen nyu dushvuo hagun npfü hagun khikho pe püshükedanyu hontse Npugü lothonyu shü, tsü genyu Npugü le a-jochü pe hagun tsü laso.”

³⁰Tsüsinyü Mosa le temi dan ka zoshü, “Hagun le kemu keda thyü laso. Ai ale kazüthun gü ge Npugü ki ni küti; ale hagun kemu jükeshü hyulo ti ado.”

³¹Mosa le rani gü Npugü ka zoshü, “Temi hidan le kemu keda thyü laso. Anyugun le suna pe teromen nme thyüo rüshvu laso.

³²Ai anyugun kemu jüshülo; nmvu yatselo, nle ntemi dan zan thu kebin lesü gü nyu tsü azan shon lalo.”

³³Tsontsin Npugü le, “Senyu le amhundyü nyu kemu thyü layo ale a lesü nyu tsünyu zan shon lati, tson a-jo kenila.

³⁴Ntsoka we gü temi dan tsonri zen-o ale nka zokeshü bin ka ryülo. Rüchünlo, a jolonyu le hagun tsontsin ti ai ale temi hidan kemu genyu shaja pe ketsü gwenkho le ryüti.”

³⁵Tson-o anyugun le Aaron thyüpe no suna methunyu thyükeshü genyu Npugü le kenpen nipe anyugun ge shü.