Read Southern Rengma Naga CHWEKETIN 33 Bible Online

CHWEKETIN 33 - Southern Rengma Naga bible

CHWEKETIN 33

¹Npugü le Mosa ka zoshü , “Nle lo Ijipt nyu nle zenchwi keryü temi dan no bin higü khe lao ale zope Abraham, Isak Jakob lo anyugun tsipwe dan tsü keshü kazü günyu gunlo

²Ale ajolonyu nipe hagun tsontsin lo no kanannyu, Amornyu, Hitnyu, Periznyu, Hivtnyu lo Jebusnyu dan hü lati.

³Hagun le kenya kazü kebwe nyu gun jü nyo. Ai hagun le temi a-nyunkerü dan me genyu ale tson nyu hagun nke lalo shvu laryü ale hagun zen gun loho.”

⁴Temi dan le jo higü nyü kelo ka nyu gwamvuo kontyü senni mvula.

⁵Npugü le Mosa no anyugun ka zoshü lotse ahza khishü, “Hagun le temi nyunkerü dan me; Ale gwenkho keshanyu ka-e hagun zen gunlo, hagun nkeshü kelai. Ntsoka hagun kontyü dan shwüshü lo ale hagun pe nyuthyü tiyo rhi loti.”

⁶Tson-o Israel nyu temi le Sinai nken kela siki kontyü sen sin mvula.

⁷Lihika-e Israel nyu le kensenbin thyülo lo, Mosa le kenshün phika gü sen gü kensenbin nye ntsen ki sükhun shü hü. Tsü lope Npugü kehü Phika gü tse ko-o lihigü Npugü nthon kenyü gü le chwio tsüki gü hü.

⁸Lihi gwenkho ka-e Mosa le tsüki gülo temi dan le anyugun khenpvü ka so-o a-le tsünyu yüla kemvuthen nribin hü.

⁹Mosa le yülo lo nmhu chwe gü le ryü phika gü khenpvü ka bin lo-o Npugü le nmhu gü nyu Mosa nthon shü hü.

¹⁰Lo temi dan le phika khenpvü günyu n mhu chwe gü hyushü nyemhun nkhün tsü gü rüshvu hü.

¹¹Temi le a-pfünyu zen kekenthon hontse Npugü le Mosa zen kemhun hyu-o kenthon hü. Mosa le kensenbin ki raniryü la. Ai a-lothyü kehü ponyu gü, Nun nyugü Joshua we Phika gü ka günyu bin hü.

¹²Mosa le Npugü ka zoshü, “Nle temi hidan tsonri zen-o kazü ligü ki gun ti tse aka zoshüla ketsin, ai nle senyu nipe azen gü tiyo zoshü mvu. Nle a shabin lo ashwi nkenyü le tse zoshü.

¹³Tsonyatselo, ano nlothyü lo nkenyü thyüzin binlo nrün genyu nkendo dan pe aka zoshüta. Nle tsipwe higü pe n npfü nhon thyü titse kejü lo kela rüchün lo.”

¹⁴Tsontsin Npugü le zoshü, “Ale hagun zen gü ti, lo ale kvukelo pe hagun tsüti.”

¹⁵Mosa le a-jokenio, “Nle agun zen gümvu yatse kethyü we, agun no bin higü nken nya.

¹⁶Nle agun zen gü mvuya tselo segü le nle ntemi dan lo ashwi nkenyü hü tse shalo tila? Nle agun zen kehü tsüle kazü nyu temi kecha aphu nyeki agun le kecha shü tse tsin shüti.”

¹⁷Npugü le Mosa ka zoshü, “Nle hikeshü hontse ale thyü shüti, ale nshabin lo nshwi akenyü kebin genyu.”

¹⁸Tsontsin Mosa le ale nka hi hü nle, “Nle kehü zankechwi keben gü ano hyu shülo.”

¹⁹Npugü le a-jokenishü, “Ale akeben aphu pe nmhundyü nyu gü shüti lo ale azan kenshün zoshüti. Ale Npugü, lo ale kejü lo kelanyu so lo njün kehü tsin shüti.

²⁰Ale nno amhun hyu loha, temi nme amhun hyu-o rhünlo kemvui genyu,

²¹ai nle tsonye nme a-ge solo kegwa bin nme le hika akhoka bin nyo.

²²A zankechwi keben gü le n nken kegü ka, ale nkhipe tsonye gü he nme nyu shüo ale güla kemvuthen aben pe nkebu lo lati.

²³Tson-o ale aben khilo lalo nle asizin hyuti ai amhun hyu loho.”