Read Southern Rengma Naga CHWEKETIN 34 Bible Online

CHWEKETIN 34 - Southern Rengma Naga bible

CHWEKETIN 34

¹Npugü le Mosa ka zoshü, “Kerihvu hontse kethyü tsopon kenyhun yhen lolo, lo ale nle boren kela tsopon keri kenyhun ge kebin jodan tsü pe a-ge thu shüti.

²Lonyü ki ndalo-o küryü Sinai kazüthun ra ge ateno lo.

³Temi nme no nzen küryü nya; temi nme no kazüthun gü ge lihika-e hyu nya, lo tanyü nmvue methu no kazüthun gü pha ki a-chvü sü bin nya.”

⁴Tson-o Mosa le tsopon hvu yhen nilo njüo, Npugü le ahza khi keshü hontse tsüsinyü nshwe ka Sinai kazüthun ge kü.

⁵Npugü le nmhu nyu tsenryü a-zen tsüka solo, lo a-zan kenshün gü, Npugü zo shwishü.

⁶Tson-o Npugü le a-mhundyü pfüthü güo zo, “Ale Npugü Sunggigü, keso lo shwikenjün no süpfü kehü a-nyunta whütse la hümvu lo keso lo ketsin tsinshü kehü gü.

⁷Ale shehe yie yie ge a-johokeshü tsü thyüshü kehü lo gwakemvu lo kemu jü pe tsü hü; ai ale a-pepvünyu kemu genyu shaja pe a-nyu lo a-nyugü nyu phushen phuzi ki-e tsümvula loho.”

⁸Mosa le whütse kazünyu nkhün tsügü rüshvu.

⁹Tson-o a-le zoshü, “Npugü nle agun shwi nkenyü hü ketsin yatselo agun zen gü lo ale nka hi hü nle. Temi hidan le anyunrü le, ai agun gwakemvu lo kemu jüshüo, agun pe nnpfü ntemi hontse agun zen lolo.”

¹⁰Npugü le Mosa ka zoshü, “Ale ntsoka Israel temi zen kejozenkelo nme thyüti. Ale hagun mhundyü ka kazünyu tsipwe nme dan nyu thyüshwi kemvu tha keda thyü shüti. Temi a phu ale Npugü ale nyu thyülo gwayo hyuti, ale hagun genyu ndun tho nme thyüshü nrün genyu.

¹¹Ale nthu khipe ntsü kebin tejvü dan thyüzenlo. Hagun le kethün chwilo ale Amornyu, Kanannyu, Hitnyu, Periznyu, Hivtnyu lo Jebusnyu hü lati.

¹²Hagun le gükejü kazü günyu temi dan zen-o kejoshü kethyü nme thyü nya, hile hagun minla lo kegwa sen nme thyüla logwa.

¹³Tsonkethyü gümvule, anyu kershvubin dan borenla anyugun kenshün tso kesen dan nkela, lo anyugun terogi Asherah men kezü dan duthü lalo.

¹⁴“Tero kecha nme rüshvu nya, ale Npugü, akentsun nyu ale nyhe loho.

¹⁵Kazü günyu temi dan zen kejozenkelo nme thyü nya, anyugun le tero rüshvuo tha dushvu pe tsüdan ketsü ka hagun kope anyugun zen kenme thyüo hagun seme pe anyu tero dan kerüshvu hon tyü lati.

¹⁶Hagun nyu peche dan le tesin tsüdan lü lo-o no anyugun tsontsin pe anyugun tero dan rüshvuo akipon joketsin zomvu lati.

¹⁷“Teromen thyüo rüshvu nya.

¹⁸“Kebu no shükemvu tensü nga gü zen lo. Ale nkazo keshü hontse Abib shye ge jon tsenyü kebu no shü kemvu tensü tyülo, tsü shye ge hagun le Ijipt kheo chwiryü kelo genyu.

¹⁹“Peche nyuri aphu lo senru peche nche keri gü tsüle ahon,

²⁰ai gada nche kerigü we nle rhin nilo lao a-sunka tanyü nyu nme pe rüshvulo. Nle rhin nilo lamvulo a-gunda bosela. Peche nyuri lihigü rhin niti. “Temi nme kenben amhundyü nyu ryü loha.

²¹“Ntho thyü nrün jon tsero le bin nyo, ai jon tsenyü gü nyü we low ketso gwenkho nmvue logvü gwenkho ka-e thame thyü nya.

²²“Hagun le thoshye gvü gü kejü ka Nga, lo seryü ki hagun rasha kequen lolo sunkelo nga zenlo.

²³“Chen me ka gwenshen ge ntemi pechenyu aphu ryüo Npugü, Israel Sunggigü rüshvu mvuloshvu.

²⁴Ale nmhundyü nyu tsipwe dan hü la-o nkazü rhi thyü kethün shükela siki, Nga kenshen dan gwenkho katsü temi nme nkazü lolo titse nda loho.

²⁵“Nle senru pe arüshvu kethyü ka kebu no keshü tensü khi shünya. Nkenkela Nga ka senru dushvu kethyü tsü keshanyu-e no bin-o tsangnben nya.

²⁶“Chenkechwi nlow gvülo kerigü senryü Npugü ka shülo. “Tanyü nmvue tenyü nyu thyü pe a-tsü nyüzü ka ni nya.”

²⁷Npugü le Mosa ka zoshü, “Jo hidan thulo, ale jo hidan then-o nle lo Israel nyu zen kejozen kebin genyu.”

²⁸Mosa le Npugü zen-o tsünyu keben jon henzi lo kezün jon henzi bin, thame tyütsümvuo bin. A-le tsopon hvu ge Kejozenkelo jo thu lo johokeshü kon tseryü dan.

²⁹Mosa le johokeshü kontseryü gü sen-o Sinai kazüthun ge tsenryü kejüka a-le Npugü zen kenthon hü kethyü genyu a-mhun le benchwü tsela; ai a-le tsü shamvu.

³⁰Aaron lo temi dan aphu Mosa nrishü laryü a-mhun le benchwü kebin hyuo anyugun le a-kho nni nshvula.

³¹Ai Mosa le anyugun koshüo, Aaron lo anyugun dannyu sharhinyu a phu a-ki güo Mosa le anyugun zen kenthon.

³²Tsüsikinyu Israel nyu temi aphu ryü a-hun pfü lo-o Mosa le Npugü le Sinai kazüthun ge pe a-tsü keshü tejvü gü aphu pe anyugun tsüshü.

³³Mosa le anyugun ka jozo thüshüo mhunsunphi senlo lahü.

³⁴Lihi gwenkho ka-e Mosa le Npugü le kehü phika günyu Npugü nthon gü yatselo mhunsunphi gü sühvu lahü. Tson-o a-le chwiryülo Npugü le a-no zo lotse keshü aphu pe Israel temi dan ka zoshü hü,

³⁵lo anyugun le a-mhun le ben kebin tsü hyu hü. Tson-o a-le tsüsika Npugü zen kenthon gü kemvuthen mhunsunphi sen nilo lahü.