Read Southern Rengma Naga CHWEKETIN 35 Bible Online

CHWEKETIN 35 - Southern Rengma Naga bible

CHWEKETIN 35

¹Mosa le Israel temi aphu ko kequen lo-o anyugun ka zoshü, “Npugü le hagun no thyü lotse johokeshü le hi:

²Hagun no hagun tho thyülo nrün jon tsero le bin ai jon tsenyü gü pe kenshün jon thyüo, thyü kenshün pe Npugü, ahigü tsükela kerüyü jon nme thyüti. Lihigü tsünyü thatho lihi thyülo no silati.

³Sabbath jon nyü nkanyu mah-e thyü nya.”

⁴Mosa le Israel temi aphu ka zoshü, “Npugü le johokeshü le hi:

⁵Thape Npugü kerüshvu nme thyülo. Lihigü tson kenyü güle suna, rakagi nmvue lazo;

⁶linen phi kegwa; thyühü phi, kenzi, kemeren, lo kenhon; tenyü hü pe kedophi;

⁷tenyü tse gi rün nhon kela; thyügi kegwa; akakia sen;

⁸makhin ka kesen terzü; yün kehü terzü lo ro nrün genyu tharün kegwa dan;

⁹Püshükeda gü mirün lo a-shüntyü ka keshü karnelian lo tso minketsen kecha dan sen ryülo.

¹⁰“Hagun dan nyu thathyü keshanyu aphu no ryü lihi-e Npugü le johokeshü gü tsü thyüti:

¹¹Phika gü, tsü kesun, lo tsü tegwenzin kesun, hükesü, lo a-run, kenpere, kachon lo a-ketun;

¹²Kejozenkelo Khinpha gü, tsü kepenvü, shwikenjün bin gü, lo sen nshon pe tsü sun nrün phi;

¹³miz gü, tsü kepenvü, lo tsü kanyü aphu pe Npugü tsükela tensü gü,

¹⁴makenben genyu makhin kedunbin lo tsü kanyü dan makhin dan lo terzü.

¹⁵Tharün kegwa ro nrün kershvubin lo tsü kepenvü; yün kehü terzü; tharün kegwa; Phika günyu keyü khenpvü kesunphi gü;

¹⁶rope rüshvu nrün kershvubin gü, lazo pe kedyübin thyü pe senshü, tsü kepenvü lo a-kanyü aphu; sükehü khunda lo tsü kedunbin;

¹⁷kanyutsen gü kesun phi; tsü kachon lo tsü ketun kanyutsen gü ki keyü khenpvü kesun phi;

¹⁸ketseyi lo phika gü kanyutsen gü genyu ron;

¹⁹Püshükeda nyu dan le kenshün bin günyu lothyü lo ben nrün phinya kegwa dan--Püshükeda gü Aaron lo a-nyudan genyu kenshün phi dan.”

²⁰Israel temi dan aphu tinla,

²¹lo lihigü Npugü kehü phika gü genyu tha thyüshü nyü kebin nyu le senryü Npugü tsü shü. Anyugun le kerüshvu ka kesen lo Püshükeda phinya thyü nrün genyu senmvulo keshvu lihi-e senryü.

²²Peche-e tenu-e a-kenyü kethyü nyule, kebünchwen, nye, benkhin, tyü lo suna pe kethyü kontyü lihi-e senryüo tsü thyünshün pe Npugü tsü shü.

²³Linen phikegwa, kenzi, kemeren nmvue thyühüphi kenhon; tenyühü pe kedophi tenyütse gi rün nhon kethyü; nmvue thyügi kegwa le kebin nyu lihigü senryü.

²⁴Rakagi nmvue lazo pe Npugü tsülo kegwa nyu aphu senryü, lo akakia sen le bin-o pe tha lihi-e thyülo kegwanyu aphu senryü.

²⁵Tenunyu thathyü keshanyu dan le anyugun le thyükelo linen ni kegwa, kenzi, kemeren, thyühü ni kenhon, dan senryü.

²⁶Anyugun le tenyü hü pe ni ko thyülo.

²⁷Sharhinyu dan le Püshükeda mirün lo shüntyü ge shü nrün genyu karnelian lo tso minketsen kecha dan,

²⁸lo makhin genyu terzü, yün kehü terzü, lo tharünkegwa genyu tharünkenyi lo terzü senryü.

²⁹Israel temi aphu Mosa le thyülo tse johokeshü hontse a-kenyü nyu aphu tha senryü Npugü tsüshü.

³⁰Mosa le Israel nyu ka zoshü, “Npugü le Juda tsipwe nyu Hur nyugü Uri nyu Bezelel kejülo laso,

³¹Sunggigü le a-kekvu pe a-kesü thyü shü laso, lo thathyükesha, thathyülo kegwa, lo thatho lihi-e sha kekholo kegwa pe a-tsü laso,

³²a-no thyü shasa tse a-joja dan rhilo-o suna, rakagi lo lazo pe tsü thyü,

³³tso minketsen dukho pe tsü geshü; tesen run; lo thatho kecha lihi-e thyü nrün genyu.

³⁴Npugü le Bezelel lo Dan tsipwe nyu Ahisamak nyugü Oholiab au no au do pe kechanyu senthyü lo kegwa pe tsü laso.

³⁵A-le thathyükeshanyu, thazükeshanyu, linen phikegwa, kenzi, kemeren lo thyühü kenhon lo phi kecha do kehünyu lo thatho lihi-e thyülo kegwanyu thathyü kesha pe au tsü laso. Au le thatho lihi-e thyü logwa lo joja thyü shasa kehünyu.