Read Southern Rengma Naga CHWEKETIN 36 Bible Online

CHWEKETIN 36 - Southern Rengma Naga bible

CHWEKETIN 36

¹“Bezalel, Oholiab lo Npugü le thathyükesha lo thakesha pe tsü kela dihontse kenshün Phika gü nyu senmvu lo keshvu lihi-e thyü tiyo sha kebin nyu dan le Npugü le johokeshü gwenzin tse lihi-e thyüti.”

²Mosa le Bezalel, Oholiab lo Npugü le thathyülo kegwa pe tsükela, keche shünyü kebin thathyü kesha kechanyu dan koshüo anyugun no thathyü so gwenlo tseshü.

³Anyugun le Mosa ka Israel nyu le kenshün Phika gü thyü nrün genyu thaho keshü aphu khilo. Ai Israel temi dan le lonyütsen thakhisen-o Mosa ki ryübin.

⁴Tsontsin thathyü kebin temi thathyükesha dan le gü

⁵Mosa ka zoshü, “Npugü le agun no thyüshü lotse johokeshü gü genyu senmvulo keshvu nyeki kerüche temi dan le sen ryü bin laso,” tsonshü.

⁶Tsügenyu Mosa le ahza nipe kensenbin aphu ka temi nme no kenshün phika gü genyu tha hoshü nya gwenlo tse shü; tson-o temi dan le tha sen niryü mvula.

⁷Senryü kela tsüle thatho aphu thyülo kegwa nye rüche kela genyu.

⁸Thatho gü thyükebin dan nyu thathyükesha tsin dan le Npugü kehü Phika gü thyüshü. Anyugun le linen kegwa kenzi, kemeren lo thyühü pe do-o a-ge cherubim men zü kethyü tseryü pe thyülo.

⁹A-phu kethon keda le ketun kü, kethon tsu nkio tetse lo keda tsu zi.

¹⁰Anyugun le pvün rikesü pe nme thyü lo kecha pvün ko tsühontse thyü.

¹¹Anyugun le phi kenzi pe rükesü lo kegwa ron thyüpe a-mhun tegwenzin shü.

¹²Rikesü lo kegwa ron henpvün pe nme ge shü lo tsü kendyü to henpvün pe phi kecha gü ge koshü.

¹³Anyugun le phi kenyhun tsü sükerhün pe nme thyü nrün genyu suna hükesü henpvün thyülo.

¹⁴Tson-o anyugun le phika gü kehen genyu tenyü hü pe phi tseryü nme dolo.

¹⁵Aphu kethon keda no ketun kü, kethon tsu shenryü keda tsu zi.

¹⁶Anyugun le pvün rikesü pe nme thyü lo kecha tsero pe nme thyü tselo.

¹⁷Rikesü lokegwa ron henpvün le phimhun nme ge shü lo henpvün pe kecha gü ge shü.

¹⁸Anyugun le phi kenyhun sükerhün pe a-so kehen nme thyülo nrün genyu lazo hükesü henpvün thyülo.

¹⁹Anyugun le tegwen zin kehen genyu tenyü gi rün nhon kela lo thyügi kegwa pe kehen phi kenyhun thyü sinlo.

²⁰Tson-o anyugun le akakia sen pe phika gü genyu a-run dan thyü ndun lo.

²¹A-run nme le ketetso tsu tseryü lo keda tsu meo peha,

²²A-run dan sükerhün lo kegwa thyü nrün genyu a-to kendyü to kethyü kenyhun no shü. A-run aphu ge a-to hidan pe shü.

²³Tesin zin genyu a-run nki thyüshü,

²⁴lo a-pha ketun a-run nme genyu kenyhun yhun pe a-hensin a-to hvu tun nrün rakagi pe henzi thyüshü.

²⁵Phika gü tesozin genyu anyu gun le a-run nki thyüshü,

²⁶lo a-run nme hensin kenyhun thyüo rakagi pe a-pha ketun henzi thyüshü.

²⁷Phika gü sizin, nkhün kipon anyugun le a-run tsero thyüshü

²⁸a-qün hvu genyu a-run kenyhun.

²⁹A-qün ka a-run dan le a-phaka sükerhün lo-o kehüsü gü a-ra ti. A-qün ka a-run hvu genyu hihontse thyülo.

³⁰Tson-o a-run nme hensin kenyhun thyüo a-run tetse genyu rakagi pe kethyü ketun tseryüo tsero le bin.

³¹A-nyugun le akakia sen pe kenpere tseryüpvün thyülo, Phika gü pehazin karun dan genyu pvün,

³²kecha zin a-run dan genyu pvün, lo pvün le ka sizin nkhün kipon genyu tse.

³³A-lvu ka kenpere gü no a-run gü nenyu phika gü te nme zin gü kecha kipon a-te ti.

³⁴Anyugun le suna pe a-run dan lo kenpere dan ko jeh kü lao suna raho pe phinkesü küla.

³⁵Anyugun le linen phi kegwa kenzi, kemeren, lo thyühü kenhon pe do-o cherubim men züpe a-ge keshü kesunphi thyülo.

³⁶Kesunphi gü senshon nrün genyu akakia sen pe kachon pezi thyülo-o suna pe jeh la, lo suna hükesü pe a-ge shü küla. Tson-o kachon dan run nrün rakagi pe kachon pha ketun pezi thyülo.

³⁷Phika günyu keyü khenpvü kesun genyu linen kegwa kenzi, kemeren, lo thyühü kenhon pe do-o a-ge a-jvüzü kezegwalo.

³⁸Kesunphi higü genyu anyugun le kachon pvün thyülo-o hükesü pe a-ge shü, suna pe a-ra lo a-thin jeh la, lo kachon dan genyu lazo pe aketun pvün thyülo.