Read Southern Rengma Naga CHWEKETIN 37 Bible Online

CHWEKETIN 37 - Southern Rengma Naga bible

CHWEKETIN 37

¹Bezalel le akakia sen pe Kejozenkelo Khinpha gü thyülo, kethon tsu hvu-o peha, keda tsu me-o peha lo ketetso tsu me-o peha.

²A-le suna ketsin pe a-nyuzin lo a-sozin-e jeh la lo suna pe a-te aphu hunla.

³A-le suna pe pen nrün raho pezi thyüpe a-qün pezi dan ge senla, pehazin kenyhunyhun tseo.

⁴A-le akakia sen pe kepenvü thyülo suna pe jeh la,

⁵tson-o pe khinpha lizin hizin raho günyu nnala.

⁶A-le suna ketsin pe shwikenjün bin nme thyülo, kethon tsu hvuo peha lo keda tsu meo peha.

⁷A-le kejonvü lo suna jon pe cherubim kenyhun thyülo,

⁸nmeme no shwikenjün bin te lizin hizin shü shü. A-le tsühvu thyüpe shwikenjün bin gü zen thyüme thyüshü.

⁹Cherubim hvu mhun le kentsun lo au sekin sükhun pe shwikenjün bin gü hen.

¹⁰A-le akakia sen pe miz gü thyülo, kethon tsu hvu, keda tsu me lo ketetso tsu meo peha.

¹¹A-le suna ketsin pe tsü jeh la lo suna pe a-te hunla.

¹²A-le a-te kehun nbenje kho thyüpe hunshüo suna pe a-tesü la.

¹³A-le kepenbin suna raho pezi thyüpe a-pha dan le kebin qün zi ka shüla.

¹⁴Kepenvü pe shüo miz gü pen nrün raho dan pe a-tekehun khoka shüla.

¹⁵A-le akakia sen pe kepenvü thyülo-o suna pe jeh la.

¹⁶A-le suna ketsin pe miz gü ge kesen thakhin dan thyülo: khun, honpen, nja lo zu pe kerüshvu ka senkehü khun dan.

¹⁷A-le suna ketsin pe makenben bin gü thyülo. Kejenvü suna jon pe a-pha lo a-kejenbin thyülo: gwenkezegwa kethyü nyedan, a-kengen lo a-kon kesin-o tsü zenkesü nme thyü

¹⁸Lizin hizin kenshen shen thyüo, a-teki a-ro tsero le chwiryü.

¹⁹A-ro tsero tsü nmeme tse gwenkezegwa kethyü almond le poun lo nngen kebin hontse kethyü kenshen le bin.

²⁰Makenben bin gü le gwenkezegwa kethyü almond le poun lo nngen kebin hontse kethyü pezi le bin.

²¹A-ro kenyhun kepen chwikeryü kenshen tsü hensin a-kengen nme le bin kü.

²²A-kengen, a-rodan, lo makenbenbin tsüle kejonvü lo suna jon kesü pe kethyü nme.

²³A-le makenbenbin tsenyü genyu makhin tsenyü, tsü ketsevü lo kepenkhun dan suna ketsin pe thyülo.

²⁴A-le suna kilogram shenryü pvün pe makenbenbin lo tsü kanyü aphu thyülo.

²⁵A-le akakia sen pe tharünkegwa rope kershvubin nme thyü lo. Tsüle kethon keda ketun, kethon tsu me, keda tsu me, lo ketetso tsu hvu. A-qün pezi ka a-to dan kesü pe thyü me.

²⁶A-le suna ketsin pe a-so, a-te lizin hizin lo a-to dan a-phu jeh la lo suna pe a-tehun küla.

²⁷Lo suna raho kenyhun thyü pe a-tekekho hensin lizin hizin senshüo pen nrün genyu kepenvü pe tsünyu shü.

²⁸A-le akakia sen pe kepenvü thyüo suna pe jeh la.

²⁹A-le yün kehü kenshün terzü lo tharün kegwa kerhün pe tharün ketehi hontse thyülo.