Read Southern Rengma Naga CHWEKETIN 38 Bible Online

CHWEKETIN 38 - Southern Rengma Naga bible

CHWEKETIN 38

¹A-le akakia sen pe rope kershvubin nme thyülo. Tsüle kethon keda ketun, kethon tsu pvün, keda tsu pvün lo ketetso tsu hvu.

²A-le a-qün pezi ka a-sozin a-to thyüshü, tson-o tsüdan no kershvubin gü zen kesü thyüme thyü. Lo lazo pe tsü aphu jeh la.

³A-le kershvubin gü ka kanyü aphu thyüshü: khun, kekinvü, khunda, pharo lo makekhükhun. Kanyü hidan aphu lazo pe thyü.

⁴A-le lazo pe kekhen nme thyü pe kershvubin tekehun hensin shüo tsüno kershvubin gü neka bin.

⁵A-le raho pezi thyü pe qünzi ka tsü shü.

⁶A-le akakia sen pe kepenvü thyü lo-o lazo pe jeh la,

⁷tson-o pe kershvubin te lizin hizin raho nyu shüla. Kershvubin güle senpon pe thyü lo tsüle a-lvu nkun.

⁸A-le lazo khunda lo tsü kedunbin le Npugü kehü phika gü khenpvü ka lothyü kehü tenunyu ju shyeshwi dan pe thyülo.

⁹Npugü kehü Phika gü kamhun kehun genyu a-le linen kegwa pe kesunphi thyülo. Tesin zin kesunphi gü kethon le tsu tsi me,

¹⁰Kachon nki lo a-pha ketun nki tsüle lazo pe thyü, ai hükesü lo kephin ron we suna gi pe thyü.

¹¹Lo kamhun teso zin ko tsü keme.

¹²Nkhün zin le kethon tsu henpvü, kachon tseryü lo a-pha ketun tseryü lo rakagi pe hükesü lo kephin ron thyü.

¹³Nphozin, khenpvü le kebin kipon ka kamhun le tsu henpvün le bin.

¹⁴Khenpvü lizin hizin kesunphi tsu tseryü pvün lo kachon kenshen lo a-pha ketun kenshen tse pe thyü.

¹⁶Kamhun kehun kesunphi aphu linen kegwa pethyü.

¹⁷Kachon phaketun dan le lazo pe thyü lo hükesü, kephin ron lo kachon pesun kehen le rakagi pethyü. Kamhun kehun kachon aphu rakagi pe phinkesü.

¹⁸Kamhun nyu keyü khenpvü kesunphi le linen kegwa kenzi, kemeren lo thyühü kenhon pe dao a-ge tha zü pe shü. Tsüle kamhun kesunphi hontse kethon tsu nki lo keda tsu pvün.

¹⁹Tsüle lazo kachon pvün pe a-pha ketun pvün nyu shüpe run lo hükesü, a-pesun kehen lo kephin ron dan le rakagi pe thyü.

²⁰Phika gü lo kamhun kehun aphu tsekesü le lazo pe thyü kü.

²¹Npugü kehü phika, johokeshü kon tseryü pe a-ge thu kenjü tsopon hvu pe shü kebin gü kethyü ka sen kela kanyü dan le hihontse. Mosa le ahza khishüo Aaron püshükeda gü nyugü Ithamar hensin thatho kethyünyu dan le thushü.

²²Juda tsipwe Hur nyu Uri nyugü Bezalel le Npugü le zokeshü hontse tha aphu thyülo.

²³A-kechegü, Dan tsipwe Ahimasak nyugü Oholiab le thathyükesha, zükesha lo linen kegwa sen-o kenzi, kemeren, lo thyühü kenhon sen-o phi do keshanyu nme.

²⁴Kenshün Phika gü genyu khikho pe Npugü tsü kela suna aphu le kilogram yieme tsü gwenkho ka senkehü pe ndo kethyü.

²⁵Lo temi swü kethyü ka hyukelo rakagi le kilogram yie shen-o tsizio shenryü.

²⁶Hile temi keswü ka a-zan thu kelonyu aphu nmeme tse dikho shülo tseyo khikeshü le tsonla. Pechenyu chen nki sole 603,550 swülo.

²⁷Rakagi kilogram 3,400 pe kenshün phika gü lo kesunphi kachon dan pha ketun thyü, nmeme le kilogram 34 pe thyü.

²⁸Lo rakagi nsenkebin kilogram shenryü tsü Bezalel le pe kachon dan ka hükesü, kephinron lo kachon pe kehen dan thyü.

²⁹Khikho pe Npugü tsü kela lazo le kilogram 2,425.

³⁰A-le tsüpe Npugü kehü phika günyu keyü khenpvü kapha ketun, lazo kershvubin gü lo tsü pha kekhen, lo Kershvubin gü nyu kanyü dan aphu thyülo,

³¹Kamhun kehun lo kamhun nyu keyü khenpvü lo phika günyu tsekesü dan aphu thyü.