Read Southern Rengma Naga CHWEKETIN 39 Bible Online

CHWEKETIN 39 - Southern Rengma Naga bible

CHWEKETIN 39

¹Anyugun le phi kenzi, kemeren lo thyühü kenhon pe püshükedanyu no kenshün bin günyu lotho kethyü ka ben nrün genyu phinya zegwasa kethyü thyülo. Npugü le Mosa ka zokeshü hontse anyugun le Aaron genyu püshükeda phinya thyülo.

²Anyugun le linen kegwa; kenzi, kemeren, thyühü kenhon lo suna ni pe püshükeda mirün thyülo.

³Anyugun le suna jon tepvü lo-o kesheshe tserho pe linenni kenzi, kemeren lo thyühü kenhon ka kerhün-o dalo.

⁴Lo anyugun le mirün gü ge keshü buthun kerhe kenyhun thyü pe rükesü shü.

⁵Npugü le Mosa ka zokeshü hontse, ni tsü hontse kethyü pe senkephin dokegwa thyü pe mirün gü ge shüo tsü kesü nme thyüshü.

⁶Anyugun le karnelian tso ketsü pe suna lo a-tehun kejü kashü, tson-o tsüge Jakob nyu mi tseryü kenyhun dan zan thu shü.

⁷Anyugun le Npugü le Mosa ka zokeshü hontse tsü pe Israel tsipwe tseryü kenyhun sunka Püshükeda mirün gü bukerhe ka shüshü.

⁸Anyugun le püshükeda mirün kethyü ni lo tsü ge thazü kethyü hontse shüntyü gü ko thyülo.

⁹Tsüle kethon keda ketun lo kese kenyhun thyü, kethon küme lo keda ko küme.

¹⁰Anyugun le tso minketsen tsonzi thyüpe tsü ge shü: a-tson kerigü le rubi, topaz lo garnet;

¹¹tsonhvu gü le emerald, safir lo diamond;

¹²tsonshen güle, turquoise, agate lo amethist;

¹³tsonzi gü le, beril, karnelian lo jasper. Hidan hi suna pe a-tehun-o shüshü.

¹⁴Israel tsipwe tseryü kenyhun sunthyü nrün genyu tso tseryü kenyhun hi nme ge Jakob nyu nme zan thu shü.

¹⁵Lo shüntyü gü genyu suna ketsin pe ronkenlü hontse kerasü thyü shü.

¹⁶Anyugun le suna pe kepen kenyhun lo raho kenyhun thyü lo-o raho hvu pe shüntyü tesozin a-te kepen senshü.

¹⁷Anyugun le suna ron hvu tsüpe raho hvu ge dyülo,

¹⁸lo ron hvu tekecha zin pe kepen hvu ka dyülo. Tson-o pe püshükeda mirün mhundyü shüo bukerhe hvu ge senlo.

¹⁹Anyugun le suna raho kenyhun thyü lo-o pe shüntyü tesinzin püshükeda mirün kensü kipon a-te ka dyülo.

²⁰Anyugun le suna raho kenyhun thyü sinlo-o pe püshükeda mirün gü bukerhe tesin ki a-kerishvu khoka senkephin do kegwa thyü kenjü gü so ka dyülo.

²¹Npugü le Mosa ka zokeshü hontse anyugun le ronkenzi pe shüntyü gü raho ka dyüsen gü püshükeda mirün raho ge senla, tson-o shüntyü güle senkephin soka bin-o rüyho lamvu.

²²Püshükeda mirün hensin kerün gü tsüle thyühü kenzi nti pe thyü.

²³N pe no chwikeryü kü tsüno nrhen lamvu nrün genyu do pe phin nishü.

²⁴Npugü le Mosa ka zokeshü hontse, anyugun le a-bola shwe pe linen kegwa kenzi, kemeren lo thyühü kenhon pe khüratyüsha thyüshü, tson-o suna ketsin pe tegi kenterin thyülo-o kejaphün pe hunkenthün shü.

²⁷A nyugun le Aaron lo anyu dan bola,

²⁸Pekejwephi, perün lo phinya ketsekhin,

²⁹lo linen kegwa kenzi, kemeren, lo thyühü kenhon a-ge thazü kezegwa kethyü senkephin thyülo Npugü le Mosa ka zokeshü hontse.

³⁰Anyugun le khikho kenshün kela zansü suna ketsin pe “Khikhope Npugü Tsü,” tse kethyü nme thu lo.

³¹Npugü le Mosa ka zokeshü hontse anyugun le tsüpe pekejwe mhundyüzin shüo ron kenzi pe phin shü.

³²Npugü kehü Phika günyu thathodan thyü penlo. Npugü le Mosa ka zokeshü hontse Israel nyu le tha aphu thyü külo.

³³Anyugun Phika gü lo tsü kanyü aphu senryü Mosa tsüshü, hükesü, a-run, kenpere, kachon, a-pha ketun;

³⁴a-kehen tenyü gi bü nhon kela; a-kehen thyügi kegwa; kesunphi;

³⁵tsopon hvu lo shükebin Kejozenkelo Khinpha, a-kepenvü, lo shwikenjünbin;

³⁶Miz lo tsüka kanyü aphu; khipe Sunggigü ketsü tensü;

³⁷suna ketsin makenbenbin lo makhin dan, tsünyu kanyü aphu, lo makhin dan ka kesen terzü;

³⁸suna kershvubin; yün kehü terzü, tharün kegwa; Phika günyu keyü khenpvü kesunphi;

³⁹lazo kershvubin, lo a-kekhen, kepenvü lo tsü kanyü aphu; sülakehü khunda lo tsü kedunbin;

⁴⁰kamhun kesunphi lo tsü kachon lo a-pha ketun; kamhun nyu keyü khenpvü kesunphi lo ron dan; Phika gü genyu tsekesü; lo Phika günyu kesen kanyü aphu;

⁴¹lo püshükedanyu no kenshün bin nyu keben phinya kegwadan, Aaron püshükeda gü lo anyudan kenshün phinya.

⁴²Npugü le Mosa ka zokeshü hontse Israel nyu le thatho aphu thyülo la.

⁴³Mosa le tsü aphu shwishüo, anyugun le Npugü le zokeshü hontse thyülo kela hyulo. Tsügenyu Mosa le jochü pe anyugun tsü.