Read Southern Rengma Naga CHWEKETIN 4 Bible Online

CHWEKETIN 4 - Southern Rengma Naga bible

CHWEKETIN 4

¹Mosa le Npugü, jokenio, “Ai Israel nyule atenyemvu lo ale nyu zoyo nyümvu nyatselo. Anyugun le nle ayhühyu thyüshü mvule tsonzo yatselo ale nyuthyü mon?” tsonshü.

²Tsügenyu Npugü le a-ka, “Nle nyu sen hü nla?” A-le, “Thün nme le,” tsonshü.

³Npugü le, “Tsü shwepe kazü nyu shülo,” Mosa le tsü shwe pe kazü nyu shü laryü, tsüle peri nme ngwa la, tson-o a-le tsüka tinla:

⁴Tsüselo Npugü le Mosa ka, “Nkhün tsügü a-ma süso lo.” Tson-o Mosa le nkhün tsügü tsü tezenlo laryü tsüle thün nme thyü nila.

⁵Npugü le, “Hithyü pe Israel nyu hio Npugü, anyugun pvübon nyu Sunggigü, Abraham, Isak lo Jakob Sunggigü le nyhühyu thyüshü ketsin le tse tsin shülo.”

⁶Npugü le Mosa nthon nio, “Nben pe nphi hensin shüshülo.” Mosa le a-jo zen-o a-ben pe aphi hensin shüo khishwilo laryü nyu le tyüpe khetso kechon hontsela.

⁷Npugü le Mosa ka, “Nben pe nphi hensin shünilo.” A-le tsonshüo khishwi nishü laryü tsüle a-mi kecha hontse gwala.

⁸Npugü le a-ka, “Anyugun le ntenyemvu nmvue nduntho kerigü tenye mvu-e higü hi anyugun le tenye loti.

⁹Anyugun le nduntho hihvue tenyen mvu, lo nle nyuzo yo tsünyümvu yatselo, Nile zürinyu zü peha thyülo njüo pe kazünyu jashü lo. Lo zü gü le tezi ngwa lati.”

¹⁰Ai Mosa le, “Nmvule, Npugü, anishü nyalo. Ale thame ka-e jozo kegwa thyülo hümvu, lo nle a nthon bin nsen zo kegwathyü lomvu. Ale nyajü lo kesedun gwenzin le.”

¹¹Npugü le a-ka, “Segü le temi mün thyüshü? A-thyüpe nyetin rügü nmvue pin? A-no thahyu nmvue a-hyüpo shüla? Tsü le Npugü, Ale le.

¹²Tsü genyu gülo! Ale ncheo nno jozoti, lo nno nyu zo tiyo nka zoshü ti.”

¹³Ai Mosa le, “Nmvule, Npugü, kechanyu peha nishülo.”

¹⁴Tsontsin Npugü le Mosa ge a-nyunta-o, “Levi tsipwen ntsa gü Aaron le bin mvu ole? A-le jozo gwasa kethyü ale shabin nyo. Ketsin a-le nteno titse ryüzhü nyo lo nshwi a-kenyü sati.

¹⁵A-no nyuzo tiyo nle pe a-ka zoshü logwa. Lo ale hai keche pe hai no thazoti, lo hai no nyuthyü tiyo ale hai ka zoshüti.

¹⁶A-le nsun thyüo temi dan ka njozo shüti. Lo nle Sunggigü hontse a-no nyuzo tiyo zope a-zenti.

¹⁷Nle thün higü senlo; tsü sen-o nduntho dan thyü nrün genyu.”

¹⁸Tson-o Mosa le a-min Jethro ki gü a-ka, “Ano Ijipt ki ranigü akaminyu dan le rhün binzun le nmvuyo shwishüta.” Tsontsin Jethro le akenda le gülo lo, tsonshü.

¹⁹Mosa le Midia ki kehü ka, Npugü le a-ka, “Ijipt ki rani gülo, ndushvu lati tse kehü nyu aphu silaso.”

²⁰Tsügenyu Mosa le a-nu lo a-nyuhvu pe gada ge shülo njüo Ijipt ki gü titse tsonchü shü, lo Sunggigü le a-ka zokeshü thün gü sen hü.

²¹Npugü le Mosa ka zonishü, “Nle Ijipt ki rani gülo ale nno thyülo kegwa kekvu pe ntsükela nduntho dan raja gü mhundyü ka thyüshü mvuloshvu. Ai ale raja gü nyun thyüpe rü lati, tson-o a-le temi dan hoshü loha.

²²Lo nle raja gü ka, Npugü le kezo le, ‘Israel le anyuri gü le.

²³Ale anyugü no chwila lo, tson-o gü arüshvulo tsonzo ai nle nmvu laso. Tsügenyu ale nnyu rigü dushvu lati.’ ”

²⁴Ijipt ki gü kejü tson nyu kensenbin nme ka Npugü le Mosa teno-o a-dushvu la titse so.

²⁵Tsontsin a-nu Zipporah le tso ayi kebin nme khipe a-nyugü girü la njüo tsüpe a-nyepvü pha kesü shü. Gikerü jvü gü genyu a-le Mosa ka, “Nle agenyu tezi nyepvü nme la,” tse zoshü. Tson-o Npugü le Mosa keyhun kenishü.

²⁷Npugü le Aaron ka, “Nle tehenyhun kemvu kazü ki gü Mosa teno shülo.” Tson-o a-le ryü kazüthun kenshün gü ka a-teno-o a-nboshü.

²⁸Lo Mosa le Npugü le a-no Ijipt ki niryü lo tse a-ka kezojo aphu pe Aaron ka zoshü; lo Npugü le a-no nduntho dan thyü shü lotse ahza khikeshü ko pe zoshü.

²⁹Tson-o Mosa lo Aaron au le Ijipt ki gü Israel nyu sharhi dan aphu ko kequen lo.

³⁰Aaron le Npugü le Mosa ka zokeshü jodan aphu zo shü lo Mosa le temidan mhundyü ka nduntho dan aphu thyüshü.

³¹Anyugun le tenyenlo, lo Npugü le ryüo mele dihontse anyugun nshwe bin nyo hyukela rüla nyülo-o anyugun aphu nkhün tsü gü rüshvu.