Read Southern Rengma Naga CHWEKETIN 40 Bible Online

CHWEKETIN 40 - Southern Rengma Naga bible

CHWEKETIN 40

¹Npugü le Mosa ka zoshü.

²“Shye kerigü Jon kerinyü Npugü kehü Phika gü tsü thyülo.

³Johokeshü kon tseryü le kebin Kejozenkelo Khinpha pe shü la-o kesunphi gü pe sunla.

⁴Miz gü senryü shüo tsü kanyü dan pe a-soge shüla. Lo makenben bin senryü makhin pe a-ge dunla.

⁵Tharün kegwa ro nrün suna pe kethyü kershvubin gü senryü Kejozenkelo Khinpha gü mhundyü ka shüo Phika gü khenpvü nyu kesunphi pe hüsü shü.

⁶Rope rüshvu kehü kershvubin gü pe Phika gü mhundyü ka shü.

⁷kesüla khunda gü pe Phika lo kershvubin au jaka shüo zü pe sü shü.

⁸Kamhun kehun thyülo-o khenpvü ka kesunphi hüsüshü.

⁹“Tson-o yün kehü terzü kenshün gü pe Phika gü lo tsünyu kanyü dan aphu yün-o thyü kenshün la lo tsüle nshün lati.

¹⁰Tsüsika kershvubin gü lo tsü kanyü aphu yün-o thyü kenshün la, lo tsü le nshün pen lati.

¹¹Tsühontse kesü khunda gü lo a-kedunbin ko thyü kenshün lati.

¹²“Aaron lo anyu dan zenryü Phika gü khenpvü ka shüo, anyugun no zülu kenshün la lotse zoshü.

¹³Püshükeda phinya pe Aaron nben shü, terzü pe a-yün shülo, tson-o a-no püshükeda thothyü alothyü nrün genyu a-thyükenshün lo.

¹⁴A-nyudan zenryüo bola pe anyugun nbenshü.

¹⁵Tson-o terzü pe anyugun pvü keyün hontse anyugun yünshü, anyugun no püshükeda tho thyü alothyü nrün genyu. Anyugun yünkeshü hile ryükejü gwenkho aphu nyu anyugun no püshükeda thyü lati.”

¹⁶Mosa le Npugü le zokeshü hontse aphu thyülo.

¹⁷Tsügenyu anyugun le Ijipt nkenchwi keryü chenhvu ka shye kerigü jon kerinyü, Npugü kehü phika gü penso shü.

¹⁸Mosa le a-phasin penshe shü, a-rundan pe dunshü, kenpere dan pe shülo tson-o kachon penso shü.

¹⁹Npugü le zokeshü hontse a-le kehen phi gü sükhun pe henshü, lo tegwenzin a-so kehen pe hen shü.

²⁰Tson-o a-le tsopon hvu tsü khipe Kejozenkelo Khinpha gü nyu shü. A-le kepenvü pe Khinpha gü raho nyu nnashü lo shwikenjün bin gü pe a-so shü.

²¹Lo a-le Khinpha gü pe Phika günyu shüo kesunphi hüsüla. Npugü le zokeshü hontse a-le Kejozenkelo Khinpha gü süsun la.

²²A-le miz gü pe Phika nyu kesunphi tegwenzin teso kipon shü,

²³lo Npugü kerüshvu tensü gü pe tsüge shüla, Npugü le zokeshü hontse.

²⁴A-le makenbenbin pe Phika günyu tesin zin miz gü kepento ka shü,

²⁵tson-o tsüka Npugü mhundyü nyu makhin dan nbenshü, Npugü le zokeshü hontse.

²⁶A-le suna pe kethyü kershvubin gü pe Phika günyu kesunphi mhundyü ka shü,

²⁷lo Npugü le kezo hontse tharün kegwa roshü.

²⁸A-le Phika gü khenpvü nyu kesunphi gü pe hüsüshü,

²⁹lo kesunphi gü mhundyü ka rope rüshvu kehü kershvubin pe shü. Npugü le kezo jontse tsüge rope kerüshvu lo shyeni pe kerüshvu thyüshü.

³⁰A-le kesü khunda gü pe phika lo kershvubin au jaka shüo zü pe tsü sü shü.

³¹Mosa, Aaron lo a-nyudan tse tsüka anyu pha-ben süla.

³²Npugü le anyugun ka kezo hontse, lihi gwenkho ka-e anyugun le Phika gü nmvue kershvubin ka kegü ka,

³³Mosa le kamhun kehun thyüpe Phika lo kershvubin gü hunshüo kamhun nyu keyü khenpvü ka kesunphi hüsü shü. Tson-o a-le thatho aphu thyü penlo.

³⁴Tsüselo nmhu gü le Phika gü hen la lo Npugü kehü keben güle tsü sü lola.

³⁵Hi genyu Mosa le Phika gü nyu yülo mvula.

³⁶Israel nyu le Phika gü so nmhu gü le kü lalo anyugun kensenbin kelao kechaki gü hü.

³⁷Nmhu gü le kebin then anyugun le kensenbin tsünyu ketu tin hümvu.

³⁸Anyugun le njwen kehü then Phika gü so ge Npugü le kehü nhenyu lo nmhu le bin lo kheje ki lo mah le nnyü kebin hyu hü.