Read Southern Rengma Naga CHWEKETIN 5 Bible Online

CHWEKETIN 5 - Southern Rengma Naga bible

CHWEKETIN 5

¹Mosa lo Aaron au le gü Ijipt raja güka, “Npugü Israel nyu Sunggigü le zo, ‘Atemi dan no gülo, tehenyhunkemvu bin ki nga nme thyü a-rühvu nrün genyu.’ ”

²Raja güle zo-o, “Npugü le segü la?” “Nyuthüo ale a-khwe nyüo Israel nyu no gü mon? Ale Npugü shamvu; lo ale Israel nyu no gü kemvui.”

³Mosa lo Aaron au le a-jokenishü, “Ibrinyu Sunggigü güle a-npfü agun yhühyu thyüshü le. Tsügenyu agun no jonshen tson chü gü tehenyhunkemvu bin ki kerüshvu thyüpe agun Npugü Sunggigü tsü shüta. Agun le tson mvu yatselo a-le kenpen nmvue teri senryü agun nkela loshvu le.”

⁴Raja güle Mosa lo Aaron au ka, “Hai le temi dan no anyugun tho khela titse ole? Do dan tsü zenniryü thatho thyülo!

⁵Hagun le Ijipt nyeki chonkvu laso. Lo hagun le ntso ka we thatho thyümvu la nyü bin nyo!”

⁶Tsünyütsü raja güle Ijipt temi kam kethyü shwi kehünyu lo Israel nyu anyugun kentsen dan ka ahza hoshü.

⁷“Himhundyü ki hontse ita thyü nrün genyu npenkon pe temi dan tsünya gwen. A-nyugun no anyu npfü gü fülo.

⁸Ai anyugun no himhundyü thyü kehü kho thyülo, ita tso nme-e rho nya. Anyugun le thathyü nrün ndio, ano anyugun hoshüo gü tehenyhunkemvu bin ki kerüshvu thyü pe anyu Sunggigü tsü lotse hi bin nyo!

⁹Temi hidan no a-tho rükvuo mesa kehü jo dan tsü nyü kelo gwenkho ndila nrün genyu.”

¹⁰Tsügenyu kam kethyü shwi kehü dan lo Israel nyu anyu kentsen dan le gü Israel nyu dan ka, “Raja gü le kezo le a-le npenkon pe hagun tsüsin lohoso.

¹¹Hagun no hagun npfü gü lika hika-e hyulo kegwa ka fülo, ai hagun le himhundyü dikho thyü hüyo tsükho thyü mvu loshvu.”

¹²Tson-o temi dan le Ijipt aphu ho npenkon fü sola.

¹³Kam kethyü keshwi dan le anyugun ketsun-o anyugun no khenyütsen himhundyü npenkon pe tsüketse ka ita kethyü kho thyü.

¹⁴Ijipt nyu kam kethyü shwi kehü dan le anyugun le kejüpe thakethyü nyu ntsen kehü Israel nyu dan vüo anyugun ka, “Nyuthyüo hagun temi dan le ita himhundyü thyü kehükho thyü mvula?”

¹⁵Israel nyu kentsen dan le raja gü ki gü kenyao a-ka, “Kedagü, nle nyuthyüo agun ge hihontse shü hü nla,

¹⁶Npenkon pe agun tsümvu-e agun no ita thyü lotse ahza khishü. Lo agun vü, tsüle ntemi dan kemu le,” tsonshü.

¹⁷Raja güle anyugun ka, “Hagun le ntsü nthyü, lo thathyü nyümvuo ano hagun hoshüo gü kerüshvu thyüpe Npugü tsü lotse bin nyo.

¹⁸Rani gü thathyü bin! Npenkon nme pe hagun tsü kemvui lo hagun le himhundyü ita kethyü kho thyümvu loshvu.”

¹⁹Israel kentsen dan le khenyütsen anyugun no himhundyü ita thyü kehü kho thyülo tse zokeshü ka gwenkho gwakemvu nme nyu bin kela shalo.

²⁰Anyugun le tinjü laryü Mosa lo Aaron au le anyugun khwe kebin tenolo.

²¹Anyugun le Mosa lo Aaron au ka, “Hai le nyuthyü shüo raja gü no agun shwintsü layo Npugü le hyu laso lo shaja pe hai tsüti. Agun dushvu nrün genyu hai le zhethon nme pe anyugun ben nyu shü laso.”

²²Tsüselo Mosa le ranio Npugü ki gü a-ka, “Npugü nle nyuthyüo ntemi dan ge gwakemvu thyü hü nla? Nle nyuthyüo anipe hika shü ola?

²³Ale ngenyu raja güka thazo so ntsin a-le anyugun nshwenyhün so laso. Lo nle anyugun cheo thame thyü shümvu!”