Read Southern Rengma Naga CHWEKETIN 7 Bible Online

CHWEKETIN 7 - Southern Rengma Naga bible

CHWEKETIN 7

¹Npugü le zo, “Ale nlope raja gü mhundyü ka Sunggigü hontse lo ntsa Aaron no n sidyükeshagü hontse shüti.

²Ale nka zokeshü aphu pe Aaron ka zoshü, lo a-le Israel nyu dan no a-kazünyu chwilalo tse rajagü ka zoti.

³Ai ale raja nyun thyüpe rü lati, tson-o ale Ijipt nyu ketetsin kethyü tsükho lakhi thyü bin-e a-le hai khwen nyüshü loho. Tson-o ale shaja kerü senryü Ijipt nyu ge shüo atemi dan zen-o kazü tsügü nkenchwi lati.

⁵Lo Ijipt nyu le ale abenshwe pe anyugun ntsun-o anyugun kazünyu Israel nyu zenchwi lalo, Ale Sunggigü tse kethyü sha loti.”

⁶Mosa lo Aaron au le Sunggigü le nyuthyülo tseshüyo tsüthyüshü.

⁷Au le raja güka thazo kehü gwenkho tsüle Mosa le chen hentetse lo Aaron le chen hentetse kenshen laso.

⁸Npugü le Mosa lo Aaron au ka,

⁹“Raja gü le nduntho nme thyüo Sunggigü le hai nishü tse kethyü tsinshülo tson yatselo, Aaron no a-thün shwen pe raja gü mhundyü nyu shülo tsüle peri ngwa lati.”

¹⁰Tsügenyu Npugü le au ka zokeshü hontse Mosa lo Aaron au le raja ki gü. Tson-o Aaron le a-thün shwen pe Raja lo a-hensin keda nyu dan mhundyü nyu shü, laryü tsüle peri ngwala.

¹¹Tsontsin raja güle a-temi thakeshanyu lo temvunyu ju koshü tson-o anyugun ko temvuo tsü hontse thyü shü la.

¹²Anyugun ko anyuthün shwenshü lo tsüle peri ngwa la. Ai Aaron thün le anyugun thün dan nyilo la.

¹³Tson-e Npugü le zokeshü hontse raja gü le a-nyunrüo Mosa lo Aaron au khwenyü shümvu la.

¹⁴Npugü le Mosa ka, “Raja gü le a-nyu rürio temi hoshü mvubin nyo.

¹⁵Tsügenyu lonyü a-le Nile züri ki kegü ka a-teno shülo. Thün peri ngwa kela gü tsü sen-o züzhie ki a-khwen bin lo.

¹⁶Tson-o raja gü ka, ‘Npugü, Ibrinyu Sunggigü le a-temi dan no chwila lo tse nka zoshü lotse anishü le, anyugun no tehenyhunkemvu kazü nyu gü a-rüshvu nrün genyu. Ai ntsoka keti nle nyümvu.

¹⁷Tsügenyu Raja gü, Npugü le hihontse zo hünyo, a-le nyuthyü tiyo tsüge a-le segü yo nle sha loti. Nrishü, ale thün higü pe zü gü vüshüti, lo zü tsüle tezi ngwa lati.

¹⁸Tsehü dan le si lati, lo züri gü le tenpe arünbo la-o Ijipt nyu le tsü tsülo mvu lati.’ ”

¹⁹Npugü le Mosa ka, “Aaron no a-thün khilo-o penso pe Ijipt nyu züri, zünyetson, lo züboun aphu sa shüshü lo tse zoshülo. Züle tezi thyü lati, kazü aphu nyu züle senkhun lo tsokhun ka kebin-e tezi ngwa lati.”

²⁰Mosa lo Aaron au le Npugü le kezo hontse thyüshü. Raja gü lo a-hensin kedanyu mhundyü ka. Aaron le a-thün penso pe zü vüshü, tsontsin tsünyu zü aphu tezi ngwala.

²¹Züri nyu tsehü le sila-o a-rün gwamvu sala tson-o Ijipt nyu le zü tsü lo shvula. Ijipt nyu zü lika hika-e tezi ntila.

²²Ijipt nyu temvunyu dan ko temvuo tsü hontse thyülola, tsügenyu raja güle himhundyü hontse anyun rüla. Npugü le zokeshü hontse raja güle Mosa lo Aaron au khwenyü mvula.

²³Tsonkethyü sunka raja gü le hi rüchün anyunkhi mvu shütse ranio a-rajaka ki gunla.

²⁴Ijiptnyu aphu züri nyu zü tsülo shvukela genyu züzhie ki zülvu tso.

²⁵Npugü le züri gü vükeshü siki jon tsenyü le güla.