Read Southern Rengma Naga CHWEKETIN 9 Bible Online

CHWEKETIN 9 - Southern Rengma Naga bible

CHWEKETIN 9

¹Npugü le Mosa ka, “Gü raja güka, Npugü, Ibrinyu Sunggigü le, ‘Atemi dan no chwila lo, anyugun no arüshvu nrün genyu tson zoshülo.

²Nle nmvuo anyugun no chwimvulo,

³Ale shaja ketetsin nipe nsenru dan-- nkeru, gada, ut, methu, tanyü lo tenyü aphu ge shüti.

⁴Ale Israel nyu lo Ijipt nyu senru dan thyü pe no kechashü thyüshüti, lo Israel nyu hon senru nme-e no siloho.

⁵Ale, Npugü, senduki gwenkho günyu tsü ale hi thyüshüti.’ ”

⁶Tsüsinyü Npugü le a-le zokeshü hontse thyüshü, tson-o Ijipt nyu senru aphu sila, ai Israel nyu senru we nme nti-e simvu.

⁷Raja güle dihontse layo ketso keshü ka Israelnyu senru nme simvu letse a-ka zoshü. Ai a-le anyu rüla-o temi dan no chwimvula.

⁸Tsontsin Npugü le Mosa lo Aaron au ka, “Maphun nyu jonbü gwe lo-o; Mosa le raja gü mhundyü nyu tsü shwekedun shüti.

⁹Tsüle kenphü hontse kezen-o Ijipt kazü aphu nyu gun lati lo lika hika-e kinthyü no temi lo senru ge chwiryüti.”

¹⁰Tson-o au le jonbü gwe lo-o gü raja gü mhundyü ka solo; Mosa le tsü shwepe tsangneki shü laryü, temi lo senru ge-e kinthyü thyü kü lola.

¹¹Temvunyu dan le Mosa mhundyü nyu ryülo mvula, anyugun ko Ijipt nyu temi kecha dan hontse kinthyü le a-min kesü thyülo kela genyu.

¹²Ai Npugü le Raja gü nyu thyüpe rüla, lo Npugü le zokeshü hontse, raja gü le Mosa lo Aaron au khwenyü mvula.

¹³Npugü le Mosa ka, “Lonyü nshwe gü raja gü teno-o a-ka, Npugü, Ibrinyu Sunggigü le, ‘Atemi no chwila lo, anyugun no arüshvu nrün genyu tsonzo hü nle, tse zoshülo.

¹⁴Higü gwenkho ka we ale nhensin kedanyu lo ntemi dan ge ntimvule shaja pe nge-e shüti, tson-o nno kazü aphu nyu ahontse kethyü nme-e ndi tse kethyü sha loti.

¹⁵Ale aben penso pe nvü lo kehokenyü pe ntemi ge shü lo nnkie shü lati.

¹⁶Ai akekvu pe nhishü titse ale nno rhün bin nyo tson-o kazü aphu no arüla shalo nrün genyu.

¹⁷Tson-e nle ketekho-o atemi dan no chwimvu bin nyo.

¹⁸Sendu ki hi gwenkho ka ale tegwün no chesa shüti, nduka-e Ijipt kazünyu tsühontse kethyü shahü kemvu.

¹⁹Tsügenyu ntsoka hagun hon nyurhün lihi-e kendo nyu kebin dan zenryü a-kesun kebin hensin shü lalo. Kechamvule temi lo nyukhue tegwen ki kebin dan tsüle tegwün chepe jonshvu bu kelai genyu.’ ”

²⁰Raja hensin kedanyu peha le Npugü le zokeshü tsü nshvuo a-gonyu lo a-senru zenryü ka hensin shülo la.

²¹Ai kechanyu le Npugü jo pe lihikemvu thyüo a-gonyu lo a-senru khepe no kendo nyu bin.

²²Tsüselo Npugü le Mosa ka, “Tegwün no cheo Ijipt kazü apentha ge- temi, nyukhu lo lonyu tehen aphu so ge tsüryü nrün genyu nben shwe shülo tsonshü.”

²³Tson-o Mosa le tsang ntsun-o a-thün shweshü laryü Npugü le tsangkesen, tegwün lo tsangpera nipe kazü so ge shü. Npugü le

²⁴tegwün chesa lo tsangkekechwe lo tsangpera nishü. Tsüle Ijipt kazünyu tsühontse kethyüsha hükemvu kenshvu ketsin nme.

²⁵Ijipt kazü aphu so tegwün güle kendo ki kebin temi, nyukhu, lo tha kecha aphu jonshye küla. Tsüle lonyü tehen lo senbin aphu jonsejonre la.

²⁶Tegwün che kemvu le Goshen lojvu Israel nyu le yhun kehü bin tsü ntila.

²⁷Raja gü le Mosa lo Aaron au koshüo au ka, “Nthugwen ale mu laso; Npugü le njü lo atemi dan lo ale njümvu la sele.

²⁸A-le Mosa ka zoshü, Npugü ka hishülo! Tsangkesen lo tegwün hino ryü sin nya gwenlo! Ale hagun no chwila titse a johoshü bin nyo, hagun no hinyu bin kethün sin kemvuiso.”

²⁹Mosa le a-ka, “Ale nyida higü nken chwilo nyemhun aben penso-o Npugü ka hishüti. Lo kazü le Npugü hon tsekethyü nno shalo nrün genyu tsangsen lo tegwün che sinmvu lati.

³⁰Ai nle lo nhensin ka kedanyu dan Npugü Sunggigü nshvu lomvuzun tse kethyü ale sha bin nyo.”

³¹Flax lo barley nke la, barley le a-pwechwio münla lo flax le nngün bin kela genyu.

³²Ai Ata low we nke lamvu, tsüle mün ntsü kehü genyu.

³³Mosa le Raja gü kheo nyida gü nken lao a-ben shwepe Npugü ki shüo kehi thyüshü. Tsontsin tsangkesen, tegwün lo tsangkenri tsüle pon la.

³⁴Ai raja güle tsangkesen, tegwün lo tsangkenri le ponkela hyulo laryü, a-le kemu thyü nila. A lo a-hensin kedanyu dan le himhundyü hontse anyu nyun rüla,

³⁵Npugü le Mosa ge bin-o zokeshü hontse, tson-o raja güle Israel nyu dan no chwimvula.