Read Southern Rengma Naga JOB 1 Bible Online

JOB 1 - Southern Rengma Naga bible

JOB 1

¹A-zan le Job tse kethyü, Sunggigü rüshvu lo a-jo zen kehü temi nme le Uz kazünyu yhun hü. A-le gwakemvu nme thyü hü kemvu temi kegwa nme.

²A-le a-nyu peche mitsenyü lo tenu mishen le bin

³lo tanyü yie tsenyü, ut yie shen, methu yie me, lo gada tsipvün tse le bin. A-gonyu ko kechon le bin. Hihontse a-le nphozin kenya tsin gü thyü bin.

⁴Job nyu peche ju le keserio keho thyü lo kecha ju aphu ryü hü, lo a-zintse anyugun lügi mishen ju kope anyu zen ho hü.

⁵Kehotsen Job le lonyü nshwe so-o a-nyenyu ju nmeme tse thyü kenshün nrün genyu rope kerüshvu thyü hü. A-le anyugun le rüchün mvutse Sunggigü kenshwe tho thyüo mu lae bin logwa tse rüchün-o a-zintse tsühontse hü.

⁶Khenyüme tsangge nyu le Npugü mhundyü keryü ka, satan ko a-nyu dan nyu hü.

⁷Tsüka Npugü le, “Nle nyutho thyü hü nla?” tse a-ketso shü. Satan le zonishü, “Ale lika hika güo kazü nyu ho nsin nshe hü le.”

⁸Npugü le a-ketsoshü, “Nle agogü Job rüla sha le mvula? Kazü nyu temi nme a-hontse joketsin sen lo gwa mvu. A-le arüshvu lo petsü sao gwakemvu thyü hümvu.”

⁹Satan le a-jo kenishü, “Job le thame hyulo mvu yatselo a-le nrüshvu ti ole?

¹⁰Nle a-zintse jochü pe a-tho aphu nyu shü lo senru kechon pe kazü apentha kesü thyüshü.

¹¹Ai ntsoka nle a-hon aphu khilo kela we a-le mhuntsun shochün pe ntsü kelai le!”

¹²Npugü le satan ka zoshü, “Gwasa,” “A-le nyu le bin yo aphu nben nyu, ai nle Job we nthyünnyü nya.” Tsüselo satan le tinla.

¹³Khenyüme Job nyenyu jule anyugun tsa peshü tsin gü kanyu hobin,

¹⁴lo lilonyu nme le tin Job kiryüo, “Agun le methutse dan zen low yhen bin, lo gada dan le tsükho ka a-chvü lotyü kebin ka.

¹⁵Sabea nyu le whütse ryü agun whe-o tsü aphu hü zentin laso. Lo ngonyu aphu dushvu lao ano ryü nka zoshü nrün genyu ale tinchwi kelo gwünzin le,” tse zoshü.

¹⁶A-le jozo nsen kebin ka gonyu kecha nme le ryüo, “Tsangpera le tsüryüo tanyü dan lo tsü kekhwe nyu aphu shweshvu bu laso. Ano ryü nka zoshü titse tinchwikelo gwünzin le.”

¹⁷Tsügü le jozo nsen kebin ka gonyu kecha nme le ryüo, “Chaldea nyu danshen le ryü agun whe-o ngonyu aphu dushvu lao ut dan zentin laso ano ryü nka zoshü nrün genyu ale tinchwikelo gwünzin le.”

¹⁸A-le jozo nsen kebin ka gonyu kecha nme le ryüo, “N nyenyu jule anyugun tsa peshü tsin gü kanyu ho kebin ka,

¹⁹kazü kesi kipon tsangkenbu terhi nme le ryü, ka gü whünren pe anyugun aphu jon shvubu laso. Ano nka zoshü nrün genyu ale tinchwikelo gwünzin le,” tse zoshü.

²⁰Tsontsin Job le solo-o a-nyungwamvuo a-phi sürhenla, a-pe thula tson-o kazü nyu nkhün tsüla.

²¹A-le zoshü, “Ale akenben a nnyunlo lo akenben siti. Npugü le khishü lo a-le khisen tin laso. A-zan no kechwi gü thyülo nda!”

²²Tha hi aphu le ryüe Job le Sunggigü nmuo kemu thyüla mvu.