Read Southern Rengma Naga JOB 10 Bible Online

JOB 10 - Southern Rengma Naga bible

JOB 10

¹Ale yhun anyutsemi laso. Ale kenjünthyüo kenyo kebin nyü shüta.

²A nmu nyalo, Sunggigü. Aka zo shülo! Nyu genyu a nmu bin nla?

³Tsühontse gwamvu kethyü tsü le njü ole? Nle n npfü thyükeshü shwi ntsüla tile? Tson-o serikemvu nyu le rhikebin dan shwio nyükemera kethyü tsü le gwa ole?

⁴Nle agun hontse tha nri hü ole?

⁵Agun hontse nkeyhun le zü ole?

⁶Tsonlo nyuthyüo nle akemu aphu kedü lo athyü kezü aphu fühü nla?

⁷Ale mu mvutse nle shabin, nben nyu temi nme akeni loho.

⁸N ben le arhen lo athyü shü, lo ntsoka ben tsü pe a nke bin.

⁹Nle nnyo pe athyü keshü tsü rüchün shüta; nle aboren pe kenphü thyüni lati tse ole?

¹⁰Nle kenko pe apvü tsü shüo ano a-ge yhunlo; nle ano ajvü ginyu min soryü.

¹¹Nle thyüru lo thyüyhe pe arhen shü lo thyütsi lo thyügi pe thyüru gü je shü.

¹²Nle kerhün ronzin lo sozin kehü pe atsü shü, lo nle anuchao ale rhün hü.

¹³Ai tsü gwünkho aphu ka nle a nthyü nnyü titse kebuo rhi kehü ale ntsoka we sha laso.

¹⁴Ale kemu thyüshü tile nmvuyo tse nle a nrihü; tson-o nle akemu jüshü mvula nrün genyu.

¹⁵Ale mula nyemhun, ale nben nyu kenjün thyülo, ai ale njü kebin ka we, ale gwale tsemvu. Ale rüsü rükhü lo keja kepfü nyu nme so.

¹⁶Ale tha peha ka gwa lolo, nle shünyho hontse ahü lola; a nthyünnyü titse nle ndun thoe thyü.

¹⁷Nle a-zintse a ntsun-o shahu peha no bin; age nnyunkenta le chon ketsin tsin; nle a-zintse thakeshün peha nyu a whe titse ndo.

¹⁸Sunggigü nle nyuthyüo ano nnyu lola? Temi nme no ahyu kemvuka ano sila mvule.

¹⁹Ajvü ginyu njü sika nyu gü lao bin mvu yatselo gwakvu nrün.

²⁰A keyhun le ndi güjü lamvu ole? Ano akesha thyülo! Ale binsin nrün gwünkho günyu ano akenyülo.

²¹Ale whütse gun jü lo raniryü loho- kezün lo kengü kazü nme nyu gü jü,

²²Kezün, kengü lo kevükeben kethyü kazü nme, tsünyu keben le kezün hontse.