Read Southern Rengma Naga JOB 11 Bible Online

JOB 11 - Southern Rengma Naga bible

JOB 11

¹Temi nme-e kenrun kenryü hidan jo kenishü mvuti ole? Jo kechon kezo genyu temi le njülo ti ole?

³Job, n kerüchun we agun le nko kenishü loho letse ole? Nle shwikenyü jo genyu agun le tha zolo nrün ndila ti ole?

⁴Nle nyu zoyo nle tsüle ketsin letse; nle Sunggigü mhundyü nyu nshün letse bin nyo.

⁵Sunggigü no njo kenishü lo ditsüki akenyü tila!

⁶Kensü le a-kon kechon le bin; ntsun ritsin-o temi le shati lo keho le bin nle tse a-le nka zoshü nrün. Sunggigü le nle shaja hyulo kezü nyeki kerho pe ntsü bin nle.

⁷Sunggigü keda lo kekvu keni le kebin nle hyulo ole?

⁸Sunggigü genyu tsang le a-keni ndi, ai tsüle nle tilo keho ki bin. Sunggigü le kesinyu kazü shabin, ai nle tsü shamvu.

⁹Sunggigü keda le kazü nyeki gon, züda nyeki nmhun.

¹⁰Sunggigü le nten zenryü jokera yatselo, a-khinlo kegwa segü le bin nla?

¹¹Sunggigü le temi senyu le lihi kemvuyo sha; a-le anyugun thagwakemvu aphu hyu.

¹²Tehen hon gada le senthyülo kela nchelo kethyü we kephonyu le thashalo soti.

¹³N nyun no njü lota, Job, Sunggigü tilo.

¹⁴N kanyu gwakemvu lo a-zü kemvu dan khipe shwela.

¹⁵Tson-o nko lo pecheo, kazü gü teno nilo.

¹⁶Tson yatselo n kenjün kethyü kerüchün aphu tin lati, zü le da tinlao rüchün nimvu kela hontse lati.

¹⁷N keyhun le nhenyu tsangkenyü nyeki ben kvu lati, lo keyhun ka kezün tsin gwünkho tsüle lonyü hontse ben lati.

¹⁸Nle kenshvu ndi lo n kenrin le bin sao yhun loti; Sunggigü le n ntsen lo-o kerüyü pe ntsü ti.

¹⁹Nle n shwikerüchün nyu nshvu loho; temi kechon le nka keche hiti.

²⁰Ai serikemvu nyu le shekese thyüo lizin hizin nri ti, lo thame ka tinchwilo nrün kendi hyu loti. Anyugun kenrin gü le kesi le ryü kejü nti.