Read Southern Rengma Naga JOB 12 Bible Online

JOB 12 - Southern Rengma Naga bible

JOB 12

¹Ele, hagun ko kesha temi le. Hagun le sila lo kensü ko hagun zen sila ti.

³Ai ako hagun hontse tha rüchünlo kehü le age bin; ale thame kae hagun penkemvu ndi le; hagun le kezo tsü temi aphu shabin nle.

⁴Ntsoka we apvünyu jue ashwinyü bin; ale njü lo kemu ndi yatse-e anyugun le a shwinyü bin nyo; Ai Sunggigü le akehi nyüshü kehü gwünkho nme le bin.

⁵Hagun le kenjün kethyü ndi, tson-e a lope keyü thyübin; hagun le che güjü kela temi nme vü bin.

⁶Ai kerühunyu lo Sunggigü shahü kemvunyu le bwenye tse yhun bin, anyugun kenko nti pe anyu tero gü thyü bin.

⁷Tegü lo tehenthyü dan- hagun senthyü keshüi kechon le bin nle;

⁸kazü lo züda nyu nyukhu dan ka kensü ketso lo.

⁹Npugü ben le anyugun thyüshü tse kethyü anyu aphu shabin nle.

¹⁰Nyukhu dan keyhun aphu tsontsin shü kehü gü tsü le Sunggigü; temi kerhünronzin aphu aben nyu bin.

¹¹Ai nyi le ketyüketsü kegwa keshvu ntsin kehü hontse, n yhütin jo dan nyülo hü.

¹²Kethennyu le kensü le bin, ai Sunggigü we kensü lo kekvu le bin. Kethennyu le thasha kekho lohü; Sunggigü we thasha kekholo lo thyülo kegwa kekvu le bin.

¹⁴Sunggigü le sürhola lo segü le thyünilo tila, lo segü le Sunggigü le pe dothyü kela gü hoshülo tila?

¹⁵Sunggigü le tsangkenri khishü mvula lo sinla hü; a-le zü hoshü lo züda chwiryü hü.

¹⁶Sunggigü le nko lo a-zin kvu lohü; me le sakela gü lo sakehü gü au mihvu nren a-kekvu nyu bin.

¹⁷A-le kekvu kesen nyu kensü khilola lo sharhinyu le kenunyu hontse thathyü lahü.

¹⁸A-le raja nyu khishe lao anyugun no me dothyü tin lahü;

¹⁹a-le püshükedanyu lo kekvu nyu thyü ketsenyo lahü.

²⁰A-le me le tenyen kehü nyu no nra mvula, lo kethennyu thakesha khilo lahü.

²¹A-le kekvu sen kebin nyu no keja pfüla lo kedathyü kebin pe keni thyü shü lahü.

²²A-le keben nipe kesi hontse zün kebin bin nyu shü hü.

²³A-le senye thyü pe nko lo gon shü hü, ai tsontseo a-le anyugun nyekvu lo anyu nke lahü.

²⁴A-le anyugun sharhinyu pe kenunyu thyüla lo anyugun no nmhon-o nmhe lahü,

²⁵anyugun no kezün nyu keseü lo kenzeü nyu hontse kezekego lahü.