Read Southern Rengma Naga JOB 13 Bible Online

JOB 13 - Southern Rengma Naga bible

JOB 13

¹Hagun le kezo tsü aphu ale himhundyü nyülo laso. Ale tsÜ aphu shabin nle; hagun le dikho shayo ale tsü shabin nyo. Ale hagun pen kemvu ndi.

³Ai ale Sunggigü zen kenyo bin nle, hagun mvu; ale a-zen-o arüla tsü kenyi nyübin nle.

⁴Hagun we nku pe hagun thasha kemvu hen bin nyo; hagun le temi nme thyü kesherhün shülo keho doctor nyu hontse le.

⁵Matse binlo peha le hagun le thakeshanyu ado tse rüchün bin logwa!

⁶Nyülo ale arüla zo kebin ka.

⁷Hagun le nyuthyüo nku bin nla? Hagun kenku genyu Sunggigü kechwi thyü shüti tse rüchün bin nle?

⁸Hagun le a-nopen titse bin le? Hagun le jokerabin nyu a-genyu kenyi ti ole?

⁹Sunggigü le hagun nri kegwa thyü shülo,, a-le thakegwa peha hyulo tile? Hagun le temi salo kehü genyu Sunggigü salo ti ado tse rüchün bin nle?

¹⁰Hagun le kebu ki a rüchün nshvu bin-e a-le hagun rho shüti,

¹¹lo a-kekvu le kenshvu pe nkesü thyü shüti.

¹²Hagun thakesha jo le jonbü hontse a-kon ndi; hagun jo dan le gin hontse nren kelai.

¹³Ntsema bin-o ano jo zoshülo, lo nyuthyü nyüyo thyülo.

¹⁴Ale a keyhun-e pe shü titse ndo bin nle.

¹⁵A kenrin aphu nmhe laso, tsügenyu Sunggigü le a boshvu lae nyuthyü mon? Ale a-ka a rüla zoshü ti.

¹⁶A kepeche le a kenishüe logwa, serikemvu nyu nme pecheo Sunggigü teno hü kemvu genyu.

¹⁷Ale jozo kekho shü kethyü dan nyülo.

¹⁸Ale arüla zoshü titse ndo bin nle, ale njü tse kethyü ale sha kebin genyu.

¹⁹Nle a nmu titse ryüjü nle, Sunggigü? Tsonyatselo, ale ale matse sila titse ndo bin nle.

²⁰Ano thakon hvu ketso shüta, nkenda letse shüta, lo ale nkebu loho:

²¹Shaja pe atsü kebin khela, lo kenshvu pe aboren nya.

²²Zori shülo, O Sunggigü, lo ale kenishü ti. Nmvulo ano zoshülo nle kenishüta.

²³A kemu le nyu la? Ale nyuthyü züla la? Nyukemu pe a njü bin nla?

²⁴Nyuthyüo akhela ola? Nyuthyü alope n shwikerüchün nyu hontse hü nla?

²⁵Nle a ketsun bin nle? Ale jonnyü nme gwünzin le; nle npenkon kesi nme whe bin nle.

²⁶Nle thakon ketsen senryü a nmu bin nyo. ale ponyu ka thyü kethyü.

²⁷Nle tegiron pe apha phinla; nle a kenkvu aphu nri bin, lo apha nyushvue nri bin.

²⁸Ts"genyu ale senkeren hontse terüla, lo tsemü le tyükela phi hontse laso.