Read Southern Rengma Naga JOB 15 Bible Online

JOB 15 - Southern Rengma Naga bible

JOB 15

¹Jo kenrun, Job! Jo Kenrun!

³Thakeshanyu nme-e nhontse zo hümvu nmvue a-kon kendi zo-o a-npfü a-nopen hümvu.

⁴NLe n npfü ntson nyu hü yatselo, temi nme Sunggigü nshvu loho; temi nme a-ka hi loho.

⁵Nle serimvu ketsin tse njo nyu zoshü le; tedo kegwa jo nyu nle kebulo titse bin nyo.

⁶Ale n nmu mvue gwa; nle zokeshü jo dan aphu nnmu laso.

⁷Nle temi nnyulo keritsin gü letse rüchün bin le? Sunggigü le kazüthun dan thyükeshü ka nko tsüka bin ole?

⁸Sunggigü le tharhi kebin nle nyülo ole? Temi kensü hile n npfü nhon le?

⁹Agun le shakemvu nme nko shabin mvu.

¹⁰Agun le temi pehüchon kela- npvü mhundyü kennyu nyuka thasha lole.

¹¹Sunggigü le nyunthyü kenbwe pe ntsü, nyuthyüo tsü kenibin nla? Agun le bwenye tse a-genyu jo dan zoshü le.

¹²Ai nle agun ge n kenyü mvu lo nnyunta la.

¹³Nle Sunggigü ge nnyunta lo a-sü mvula.

¹⁴Temi nme-e nshün ketsin thyü logwa ole? Sunggigü mhundyü nyu temi nme njü logwa le?

¹⁵Nyuthyüo, Sunggigü le tsanggelonyue tenyen mvula; anyugun-e a-mhundyü nyu nshün kemvu genyu.

¹⁶Lo Temi le zü ketsü hontse gwakemvu tsü hü; ele, temi le serimvu, temi le a-min ndile.

¹⁷Ntsoka nyülo ta Job, ale nyu shabin yo.

¹⁸Thakeshanyu le ketsin pe asenthyü shüle anyugun le anyu pvübon nyu ka shakelo dan, lo anyugun le tsü kebu lamvu.

¹⁹Anyugun kazünyu sinrünyi kechanyu ndi; Sunggigü kipon anyugun tsontsin zütin kela temi nme ndi.

²⁰Me nshwe kehü temi serikemvu gü we, a-rhünthen a-nthyünnyü ti.

²¹A-yhütin nyu kenshvu khwe le bin hüti, lo a-le kenshvu ndi tse rüchün kebin ka seketyü nyu le a-whe ti.

²²A-le kezün nrhikelo a-kenrin ndi, bin peha ka a-dushvula titse zhethon le a-khwe kebin genyu.,

²³lo güda le a-simin tyü titse khwe bin. A-sidyü le züntin kebin a-le shabin;

²⁴kenke le, raja kekvunyu nme hontse a-whe titse khwe bin.

²⁵Sunggigü ntsun-o a-jenthün thyü lo Kekvutsin gü süjün mvu kehü temi gü ge tsühontse kethyü le ryüti.

²⁶Temi tsügü le ketekho lo mejozen mvu; a-le a-nyunrüo a-gida penso, lo Sunggigü zen kenren titse tin gü hü nyo.

²⁸Temi tsügü le nyida dan lolo lo a-npunyu le tin lalo ka dan khinlo, ai teri le nyida lo ka tsüdan nke lati.

²⁹A-le nnya thon bin loho; a-hon nme binthon loho. A-she a-züe ndi lati,

³⁰lo a-le kezün nrhi loho. A-le mah le a-ro rokela senbin nme hontse lati, tsangkenbu le a-kepun whün sentin lati.

³¹A-le pho ritsin-o gwakemvu tenyen bin yatselo gwakemvu pe a-chün thyüti.

³²A-gwünkho pen kemvu ka a-le rügu lati, senru hontse rügu lao tsü le thame ka njvüni loho.

³³A-le vainbin le a-sha kenyo nrhi kela hontse ti; olivbin nme le a-kepun nrhi kela hontse lati.

³⁴Sunggigü shakemvu nyu le a-tsipwen bin loho, lo jvüjwe sen-o ka thyü kelo gü mah le nke lati.

³⁵Kekevü rhi lo gwakemvu thyü kehü dan le hidan le; a-zintse mekesa le anyugun nyun süpfü.