Read Southern Rengma Naga JOB 16 Bible Online

JOB 16 - Southern Rengma Naga bible

JOB 16

¹Ale himhundyü jo tsühontse kethyü nyülo laso; hagun nyunthyü kenbwe jo le nthyünnyü keshü nti le.

³Hagun le kethonthen kenthon bin ti ole? Hagun le a-zintse jo kekhin zobin tile?

⁴Hagun le abin ka bin lo ale hagun bin ka yatse kethyü we, ako hagun le zokebin aphu zolo gwa. Ale ape pfükezen-o jo kechon pe hagun ka zolo gwa le.

⁵Ale hagun senthyüo hagun thyü nkoshü lo hagun nthon-o hagun nyunthyü nbwen shü logwa.

⁶Ai ajo le ache lomvu, lo matse bin-e akethyü le rüyü lomvu.

⁷NLe ano atson rüzi laso, Sunggigü; nle akaminyu no sila.

⁸Nle aten lola; nle a shwikerüchün nyu le. Ano agi lo aru ntila, tson-o me no tsüle akemu genyu letse lola.

⁹Sunggigü le a-nyunkenta nyu asüthü-sürü laso; a-le a shwirüchün-o a nrhi lola.

¹⁰Temi dan le nsü pe anye; anyugun le ahun pfüo a-jon di.

¹¹Sunggigü le akhipe temi gwakemvu nyu ben ka shüla.

¹²Ale bwenye tse yhun bin, ai Sunggigü le agunda sü lo-o a keben lo a kedü renla. Sunggigü le alope nri kebin nme thyüla

¹³tson-o lizin hizin tholevü pe ashwe- thotsi dan le ashwe lo ajün laso; tson-o a-le akenjün pe hishü mvu.

¹⁴A-le ajün nini shü; shüpahü nyu le me nrhi pe kenunyu hontse kela hontse a-le a whe.

¹⁵Ale chechüo ronphi khi be, lo hika kenphü nyu dun bin nle.

¹⁶A mhun nhon la kemvuthen ale nra, ayhütyü nme lo nngü laso,

¹⁷ai ale kemu nme thyü mvule, lo Sunggigü ka akehi-e anyunketsin thyü bin nle.

¹⁸O kazü, age a-zükemvu thyükeshü kebula nyalo! Ale kenjü hi kebin no matse la nyata!

¹⁹Tsangge peha le agenyu so-o a denzin bin.

²⁰Apvünyu ju le a kesü; ayhüphu che pe Sunggigü kishü.

²¹Ale temi peha no agenyu Sunggigü ka shwikenjün hi nyü le, temi nme le a-pfünyu genyu shwikenjün kehi hontse.

²²Ntsoka we achen dan le tin jü laso, lo ale rani kemvu tson nyu tsonchü bin laso.