Read Southern Rengma Naga JOB 2 Bible Online

JOB 2 - Southern Rengma Naga bible

JOB 2

¹Khenyüme tsangge nyu le Npugü mhundyü nyu keryü ka, satan ko anyugun dan nyu hü.

²Npugü le a-ketsoshü, “Nle dikipon hü tinla ola?” Satan le zonishü, “Ale lika hika güo kazü nyu ho nsin nshe hü le.”

³Tsontsin Npugü le a-ketsoshü, “Nle agogü Job rüla shale nmvula?” “Kazü nyu temi nme a-hontse joketsin sen lo gwa mvu. A-le arüshvu lo petsü sao gwakemvu thyü hümvu. Nle a-hüsüo a-kon kendi ka a-whe, ai Job le himhundyü hontse joketsin sen hü nle.”

⁴Satan le a-jo kenishü, “Temi nme le rhün binlo nrün genyu tha phu hoshü lati.

⁵Ai ntsoka nle a-min nthyünnyü keshü we a-le nmhuntsun shochün pe ntsü lati!” tsonla.

⁶Tsügenyu Npugü le satan ka zoshü, “Gwasa, a-le nben nyu, ai nle a-boshvulo nrün ndi.”

⁷Tsüselo satan le Npugü mhundyü nyu tin-o Job min pen kethyüshvu no chwiryü la.

⁸Tson-o Job le gü ka khüpe keshü bin ki dun-o lakeko nme pe a-kethyüshvu whe bin.

⁹Laryü a-nu le a-ka zoshü, “Nle ntsokhin-e himhundyü hontse joketsin sen bin zun ole? Nyuthyüo Sunggigü swetsü lao sila mvula?”

¹⁰Job le a-jo kenishü, “Nle zozü kemvu zobin nle! Sunggigü le thakegwa peha nipe ntsü shülo khilo hü nyo. Lo a-le kenjün kethyü pe ntsü shülo dihontse kenya logwa tila?” A-le kenjün kethyü aphu nyue, Job le thame zo Sunggigü ntsun mvu.

¹¹Job pvünyu mishen ju: Teman nyida nyu Eliphaz, Shuah kazü nyu Bildad lo Naamah kazü nyu Zophar. Anyugun le Job le ditsüki thyü kenjün thyü bin yo tsü rüla nyükelo ka gü Job nyun thyü nbwe shü titse rhilo.

¹²Anyugun le ntsenki bin-o Job hyushü ai a-shalo mvula. Anyugun le a-sha keloka nyungwa mvuo chü, anyugun phi sürhen, kenphü shwe kedun shü lo pe anyugun pe ge shü.

¹³Tson-o a-le ditsüki thyü kenjün thyü binyo hyu kebin genyu jokon me-e zomvu tse keben kezün jontsenyü a-zen-o tsüka dun bin.