Read Southern Rengma Naga JOB 20 Bible Online

JOB 20 - Southern Rengma Naga bible

JOB 20

¹Job, nle ano rünyu mvu laso. Ale akekheni loho kela genyu njo kenishü ti.

³Nle zokeshü tsüle meta bin nle, ai ale dihontse njo keni tiyo shabin nyo.

⁴Nduka temi thyü pe kazünyu shükeri kanyu,

⁵temi serikemvu nyu nme le kethon a-sherhün lohümvu tse kethyü nle shatsen tsü bin nle.

⁶A-le gon pe tsang tun bin, gon sao a-pe le nmhu ti bin

⁷ai kenphü hontse a-whün pe shwe lati. Asha kehünyu le ale dikipon tinla yo tse a-fü kendi lati.

⁸A-le khejenyu nmi, lo tsemin nme kehyu hontse ndi lati, tson-o hyunimvu lati.

⁹A-le yhun kehü bin nyu ndi lati;

¹⁰lo a-nyenyu dan le kendinyu ka shvutyü, kenjünthyü thathyüo a-pu thoti.

¹¹A-thyümin le selo thyü lo mero bin, ai tsü le kenphü ngwa whütse lati.

¹²Gwakemvu le a-genyu yhünjo bin tson-o tsürün le a-kenyüo peha pe a-mün ka shüpfü bin.

¹⁴Ai a-gin nyu ketyüketsü tsügü le khüla, khüpe terün kekhü hontse la.

¹⁵Serikemvu gü le a-le rühu kelo kenya gütsü keso shü lahü; Sunggigü le tsüle a-ginda nyu bin-e khinilo lahü.

¹⁶Temi gwakemvu nyu le nyishükelo le terün hontse; peri a-tseyi gwakemvu le kendu hontse tsüle a-boshvu lahü.

¹⁷A-le rhünbin-o oliv terzü le züri tsun kebin hyu loho, nmvue nyüzü lo khuzü le züri tsun kebin.

¹⁸A-le thyü kehü a-tho dan aphu kheshü lati; a-le a-kenya sen asherhün kelo gwünkho hyu loho,

¹⁹a-le kendi nyu nshwe lo süjün mvu kela genyu lo me kechanyu le thyü keshü ka khin lola.

²⁰A-tha ketepen le a-kenithyü mvu.

²¹A-le tyütsü lo thame nsen shü hümvu, ai ntsoka we a-le gwakenye kehü tsü le a-kenkhin thyüryü laso.

²²A-le gwakenye sa kebin ka kenjün kethyü khvükensu aphu ryü a-miren lati.

²³A-no nyutyü nyüyo tyülo! Sunggigü le nyunkenthün lo nyunkenta shaja pe a-tsü ti.

²⁴A-le tegi zhethon nrhi lati tse ndo kebin ka lazo tholevü le a-shweshe shü lati.

²⁵Tholevü tsi le a-mi shwephe la; tsü a-ra kenshwe ge a-zi no je ti, lo kenshvu le a-nyun sü ti.

²⁶A-le ntsen kenjü aphu nkela; temi ben le thyüshü kemvu mah le a-le lo a-kaminyu aphu ro lati.

²⁷Tsang le temi higü kemu khishwi shü, lo kazü gü le a-kentsun jo zoshü.

²⁸A-kenya aphu nke lati Sunggigü nyunkenta zükeda gü nyu.

²⁹Temi serikemvu gü jün le hi, Sunggigü le anyugun jün tho pe bin njü.