Read Southern Rengma Naga JOB 21 Bible Online

JOB 21 - Southern Rengma Naga bible

JOB 21

¹Ale nyu zobin yo nyü shüta; nyunthyü kenbwe ale hagun ka hi kebin le tsü nti.

³Jokezo gwÜnkho pe atsü shüo ale zobu shü kela siki ashwinyü nyülo ashwinyü lota.

⁴Ale sila kehü temi zen kega binmvu; ale nyhenlo keho kon le bin nle.

⁵A nri keshü nti-e hagun kerükeshvu thyüo ntsema la mvu ole?

⁶Age nyu hontse thyü layo ale rüchün keshü ka, ale akerüshvu lo nsü ndün laso.

⁷Sunggigü le nyuthyü gwakemvu nyu no yhunbin anyugun no then lo gwakenye lohü nla?

⁸Anyugun nyenyu lo tsüdan nyenyu no bin, yhunbin tsüdan aphu peshü so keryü hyulo.

⁹Sunggigü le kenke senryü anyugun kakhwün nyu shümvu; anyugun keyhun nyu kenshvu ndi.

¹⁰Ele, ketekhi nme ndi tse anyugun senru aphu nchelo lo nkin lo.

¹¹Anyugun nyenyu dan le tanyü nyu hontse tin-o kecho

¹²lo harp lo kheli khun lü thyüo dathyü.

¹³Anyugun le bwenye tse yhun lo-o kenjün thyü mvutse sila.

¹⁴Serikemvu gü le Sunggigü no anyugun khelao anyugun kendo thyü titse zola; anyugun keyhun ka a-kendo gü shanyü mvu.

¹⁵Anyugun le Sunggigü lothyü mvue gwa nmvue a-ka kehithyü bin-e kechwi nme ndi le tse rüchün hü.

¹⁶Anyugun npfü anyugun kekvu ka gwa lole tse zohü, ai anyugun kerüchün tsü a we lo lomvu.

¹⁷Temi serikemvu gü mahkenben le nmhü lahü le? Anyugun peha le kenke teno lola? Sunggigü le a nyunkenta ka shaja pe serikemvu nyu tsü

¹⁸lo tsangkenbu ka npenkon hontse whün pe shwela, nmvue tsangkenbu terhi le kenphü whün sentin kela hontse la le?

¹⁹A-pvü kemu genyu Sunggigü le shaja pe a-nyu tsübin nle tse hagun le zobin nyo. Nmvu! Sunggigü no shaja pe kemu nyu npfü tsülo; a-no anyugun kemu genyu a-le tsü thyüshü letse tsin shülo.

²⁰Kemu nyu no a-npfü a-shaja pfüta; anyugun no Sunggigü nyunkekhü shalo.

²¹Temi nme le a-keyhun gü lalo, a-nyenyu dan le sherhün hüle nmvuyo, a-le rüchün ketsin thyü hü le?

²²Temi nme le Sunggigü senthyü logwa ole, ketetso ki kebin dan-e jünkera kehü gü?

²³Temi peha le sikemvuthen aphu sherhün bin hü; anyugun le shekerhün thyü rüyüo si hü, anyugun thyümin leyi kegwa thyü pe.

²⁵Kechanyu we shekerhün ndi shü; a-nyu kenjün thyü yhun bin-o sila.

²⁶Ai aphu kemetse silao pe sunla hü; anyugun aphu ntse le je lati.

²⁷Hagun le a rüchün nshvuo thagwa kemvu rhikebin ale hagun kerüchün shabin nle.

²⁸“Hagun le ntsoka we temi keda gü ka le diki bin nla, gwakemvu thyü kehü temi gü?” tse ketso bin nyo.

²⁹Hagun le kenjwen nyu nthon shü mvu ole? Anyugun le nyu jo sen niryü yo hagun le sha le nmvula?

³⁰Sunggigü le a-nyuntao shaja khi keshü jon nyü, a-zintse temi serikemvu gü nrhoshü hü nle.

³¹Temi nme temi serikemvu gü nmu hümvu, nmvue a-le thyükeshü dan aphu kethun hü mvu.

³²A-pen-o sika bin ki me le khwe kegwa thyü kebin a-sika ki kegü ka,

³³temi yie yie le kethen-o a-kesun ki gü lo kazüe nkhvü tse a-so ge tsü lahü.

³⁴Lo hagun le! A-kon kendi pe anyun thyü nbwe titse! Hagun le ajo kenikeshü tsü aphu kenku le.