Read Southern Rengma Naga JOB 22 Bible Online

JOB 22 - Southern Rengma Naga bible

JOB 22

¹Temi kensütsin, Sunggigü le senmvulo keshvu temi peha le bin ole?

³Nle kenjü gü thyü kebin le Sunggigü kechwi le, nmvue nle gwa kethyü genyu a-chelo bin le?

⁴Nle Sunggigü nshvu kehü genyu a-le nsenthyü lo kegwakeshvu keshwi senryü nge shü bin mvu.

⁵Nmvu, nle musa kela genyu; nle gwakemvu kethyü aphu genyu le.

⁶Nsikezen gü no nka pisa tepu kelo tho, nle a-phi sentin lao no thame ben nrün ndi la.

⁷Nle zü pe hokeli kebin nyu tsü mvula, lo nnyo kebin nyu gin thyü shü mvula.

⁸Nle nkekvu lo ngwüngwa bin yao kazü aphu khin lola.

⁹Nle magi nyu chekemvu nti mvu, ai nle tegonyu njün mvuo anyugun hon selo la.

¹⁰Tsügenyu ntsoka we chwe le nhun laso, lo whütse kenshvu le nkesü thyüla tiso.

¹¹Tsü le züntin tselao nle hyu mvu, lo zü keda nme le nhenlo laso.

¹²Sunggigü le tsang ketetso tsinki yhun-o shyenyü dan le tetso bin-e nkhün-o tsüdan shwibin mvu ole?

¹³Lo nle, “Sunggigü le nyu sha ola? tse ketso. A-le nmhu nyu kebu bin- a-le dihontse ngun jün keralo tila?”

¹⁴N kerüchün le nmhu kezün le a-sunlo lao a-le hyu mvu, a-le tsangneki nsin nshe kebin hontse.

¹⁵Nle temi gwakemvu nyu le a-zintse then kehü tsonda nyu tsonchü titse rhilo la ole?

¹⁶Anyugun gwünkho le ryükemvu kanyu zü keda le anyugun chün sentin laso.

¹⁷Temi hidan le Sunggigü kenila lo a-le anyugun ge thame thyü keloi mvu tse tenyen hü.

¹⁸Ai anyugun thyü pe gwakenye keshü gü tsü le Sunggigü- Ale serikemvu nyu kerüchün hi shakekho lomvu le.

¹⁹Temi kegwanyu le a-kenyü lo kemu kendi nyu le nnyü hü, anyugun le serikemvu nyu le shaja hyu kelo shwi keshü ka.

²⁰Serikemvu gü hon aphu nke lati lo nsen kelo lihi-e mah le ro lati.

²¹Job, ntsoka Sunggigü zen-o gwatho la lo a-lope n shwikerüchün nyu nme hontse nya lalo; nle tson loyatselo, a-le jochü pe ntsü ti.

²²A-le khikeshü senkethyü lolo; a-jo pe nnyun ka shü pfülo.

²³Ele, nle tsenyo-o Sunggigü ki rani ryü lo n kakhwün nyu thyü kela gwakemvu tsü aphu khela.

²⁴N suna pe shwela; n suna kegwatsin dan jün pe züzhe kesin ki khwen lalo.

²⁵Kekvutsin Sunggigü no n suna thyülo, lo a-no ngenyu n rakagi, khwe tetso kebin thyülo.

²⁶Tsonlo nle a-zintse Sunggigü tenyen ti, lo a-le nshekerhün khishü kehü gü letse hyu loti.

²⁷Nle kehithyü keshü ka, a-le kenishü ti, lo nle sweshü kenjü tsü zen hü ti.

²⁸Nle ntho aphu nyu gwa loti, lo keben le ntson gwün nben shüti.

²⁹Sunggigü le ketekho kehü nyu khishela lo tsenyo kehü nyu kenishü hü nle.

³⁰Nle kemu ndi yatselo a-le n kenishwi shü ti, ntho le njü yatselo.