Read Southern Rengma Naga JOB 24 Bible Online

JOB 24 - Southern Rengma Naga bible

JOB 24

¹Nyuthyüo Sunggigü le jünkera nrün gwÜnkho, a-lothyü kehünyu genyu kenjü jon nme thola mvuyo no?

²Temi le kazü kechon hyulo nrün genyu terhi tso boketu; anyugun le tanyü rühu pe anyugun npfü anyu hon kerhün lola.

³Anyugun le tegonyu dan gada khilo la, lo maginyu nme le a-pu thoshü kemvuthen tsügi thutse khinlo la.

⁴Anyugun le kendinyu no a-kenjü hyu kelo khin lo rhokedyünyu kemvu thyüo no tin-o kebu.

⁵Tsügenyu kendinyu no gada tehen hon, hontse tehenyhun kemvu kazü ki a-chvü fü; kecha nme kae anyugun le anyu nyenyu genyu ketyüketsü fü keloi ndi.

⁶Anyugun le anyugun low kemvu gvü ti, lo serikemvu nyu vainlow nyu vainsha lü kequen loti.

⁷Anyugun le kheje ki phinya pe anyu hen mvutse zhü ti, kekun nyu tha pe anyu kehen ndi.

⁸Kazüthun ge tsangri tsükeryü tsü le anyugun ntsen, lo anyugun le kesun ndio tsonye tesun hü.

⁹Temi gwakemvu nyu le a-pvü kendi nyuhanyu pe a-do thyü lola lo kendinyu no a-nyenyu pe anyugun pu thoshü hü.

¹⁰Ai kendinyu no a-kesun phi ndio chwi lahü; anyugun le lowgvü ketse gwünkho kae khün bin hü.

¹¹Anyugun le oliv ter lo vainzu thün bin, ai anyugun we teri bin hü.

¹²Nyida nyu tejünshvu kepfü lo sigü kejü nyu le nra bin ai Sunggigü le anyugun kehi nyüshü mvu.

¹³Keben gü kenikela temi le bin; anyugun le tsü shamvu nmvue tsü le tsin keshün nyu gü mvu.

¹⁴Medukeshvu nyu le lonyü nshwe soryüo gü kedinyu dushvu, lo a-le kheje ki rühu hü.

¹⁵Keyüla gü le tsangzün keshyemu keryü khwe bin hü; temi nme no a-hyumvu nrün genyu a-mhun sun pfü hü.

¹⁶Khejenyu kerühu nyu le karhen hü, ai anyugun le nhenyu kebuo keben nrhi lahü.

¹⁷Anyugun le nhenyu keben nshvu, ai anyugun le kezün we nshvumvu.

¹⁸Zü keda le temi serikemvu gü chün sen tin lahü, lo Sunggigü le a-kazü gü swetsü la; a-le a-vain low ki gü thathyü sinmvu lahü.

¹⁹Kenyün lo kesin nyu khetsa le ndila kehü hontse kemu nyu nme le kerhün nyu kazünyu ndi lati.

²⁰A-jvüe ntsoka we a-rüchün mvu lati; a-le senbin kepen nme hontse a-nyuryü lo nke lati.

²¹A-le maginyu nshwe kethyü lo nyu kendiginyu shwikenjün pe hishü kemvu genyu tsonti.

²²Sunggigü le a-kenko nyu, kekvunyu nke lati; Sunggigü le tha thyüshülo temi serikemvu nyu le sila hü.

²³Sunggigü le a-no kenshvu ndi tse bin logwa,, ai gwünkho aphu ka a-nri bin ti.

²⁴Gwünkho nme ka serikemvu nyu le gwakenye bin, ai a-le jontsü hontse rügu lahü, lowpen nme gvülo kela hontse.

²⁵Hihontse mvu, tse temi peha le zolo gwa le? Ajo dan le ketsin mvu tse temi peha le tsinshü logwa le?