Read Southern Rengma Naga JOB 26 Bible Online

JOB 26 - Southern Rengma Naga bible

JOB 26

¹Hagun le a keche kegwa dihontse kethyü nme yo ale kendinyu lo kvukemvu nme!

³Hagun le senkethyü kegwa lo hagun thakesha pe kephonyu a hihontse kethyü nyu nme zen kenjün lo!

⁴Hagun kerüchün we segü le hagun jo aphu nyüla? Segü le hagun thukeyhun pe hihontse zolo tse shüla?

⁵Kesinyu kapu le kazü hensin ki zü nyu ndün bin.

⁶Kesinyu kazü le Sunggigü mhundyü ka ndo bin; a-mhundyü nyu a-kehen thame ndi.

⁷Sunggigü le tesozin tsang sükhun shüo kazü gü pe a-kenrun ge hüsü shü.

⁸Zü pe nmhu sü keshü gü tsü le Sunggigü lo tsüdan ntsen-o kensu gü no tsü jonrhen lamvu.

⁹A-le shyelvu pe nmhu nme sizin kebu njü.

¹⁰A-le züda gü zühun shüo keben lo kezün kenjün kho shü.

¹¹A-le tsang tunpfü kebin kachon dan rho keshü ka, tsüdan le nshvuo ndün sola.

¹²Züda so kvukelo gü tsü le a-kenko; a-da kegwa nyu a-le züringü Rahab nkela.

¹³Tsang thyü nshün keshü gü tsü le a-teshe, züringü tin kejü gü boshvu kela tsü le a-ben le.

¹⁴Ai hidan hile a-kekvu a-thakeshanyu nti, nrakhe keshü ngun le nyükelo gwünzin. Sunggigü le ketsin ditsüki gon yo. Segü le shalo gwa tila?