Read Southern Rengma Naga JOB 28 Bible Online

JOB 28 - Southern Rengma Naga bible

JOB 28

¹Rakagi tso kehü bin le bin; Suna thyü kenshün kehü bin le bin.

²Temi le kazü nyu tegi tsolo Lo tso ge tamagi rozun lohü.

³Temi le kezün kentsun tsin gü nri. Anyugun le kazü kentsuntsin güe fü. Lo kezün nyu tsonye tso.

⁴Temi nme yhun kemvu bin nithen Nmvue temi le njwen-o tsü kemvu ki, Temi le kazü hensin ki hyulo kehü dan tso hü. Tsüki anyugun npfü thatho thyü, Tekhvünkü nyu ron sü pen-o.

⁵Ketyüketsü le kazü gü nyu yhun chwiryü, Ai kazü tsügü hensin ki Aphu boren boryü la.

⁶Kazü nyu tso dan ge Safir le bin Lo tsü nnyo nyu suna le bin.

⁷Khüno nme kazü hensin ki hyulo kehü dan tson shamvu, Lo güda nme-e nyeo tsü soge gümvu.

⁸Shünyho nmvue tehenthyü kensho nme Tson tsünyu gü mvuzun.

⁹Temi le tsonye ketsütsin dan tso, Kazüthun phanyu kazüthun dan tsola.

¹⁰Anyugun le tsonye gü runphe chwi kethyü ka Anyugun le tsominketsen hyulo.

¹¹Anyugun le züri dan tso-o zü penchwi keryü bin tio Nyu pe kebu bin yo sen chwiryü.

¹²Ai dikipon kensü hyulo gwa tila? Dikipon thashakekho kelo shalo tila?

¹³Kensü hile temi dan nyu hyu loho; Temi nme tsümin ketsin gü shamvu.

¹⁴Züda lo zida kentsun gü le Kensü le tsüki hyulo hümvu tsezo.

¹⁵Suna raka pe tsü hie loho.

¹⁶Suna kenshüntsin lo tsominketsen Pe tsümin zen ketun keloi mvu.

¹⁷Tsüle suna nyeki a-mintsen, Suna honpen nmvue glass kegwatsin nyeki tsen.

¹⁸Kensü le koral, nmvue khristal Nmvue rubi nyeki a-mintsen.

¹⁹Topaz kegwatsin lo suna kenshün tsin Pe kensü min gü zen kendyü keloi mvu.

²⁰Tsonlo kensü le dikipon chwiryü la? Diki thashakekho kelo shalo tila?

²¹Rhünkehü nyukhu nme tsü hyu loho Tegü nme-e nye gü tsÜ hyu loho.

²²Kesi lo kenke ko Tsü rüla nyülo la letse.

²³Sunggigü nti tson tsügü shabin, Kensü hyulo kehü bin shabin nyo,

²⁴A-le kazü keni hyu kebin genyu, Tsang hensin tha aphu hyu bin.

²⁵Sunggigü le tsangkenbu kekvu pe tsü keshü ka Lo züda no dikho nmhun tiyo rhilo;

²⁶Sunggigü le tsang no dika rishü tiyo Lo tsangkesen khelvukesü no dika gü tiyo rhilo;

²⁷Tsü kinyu a-le kensü hyuo tsümin ketsenkene shwi laso- A-le tsü le a-kendo letse shüla.

²⁸Sunggigü le temi ka zoshü, “Thashalo nrün genyu, hagun le gwakemvu nyu ranilo mvulo shvu.”