Read Southern Rengma Naga JOB 3 Bible Online

JOB 3 - Southern Rengma Naga bible

JOB 3

¹Tsüsiki Job le jozo-o a-kenyun jon gü swetsü so.

²O Sunggigü, a nnyukelo jon gü swetsü lalo; a phupfü kelo kezün jon gü swetsü lalo!

⁴Jon tsügü pe kezün jon thyü lalo, Sunggigü. Jon tsügü rüchün ninya lalo; keben no tsü ben ninya lalo.

⁵Jon tsü pe kengü lo züntin kethyü jon thyüla; nmhu pe tsü henlao yhüko sun lalo.

⁶Chen gü nyu tsüje tsÜ pe shünya la, lo tsü swüni nya lalo;

⁷tsü pe a-shakendi, shekerhün kendi je thyüla.

⁸Temvunyu dan ka zoshüo no jon tsügü swetsü lalo; Leviathan-e ketsen kelo do sha kehü nyu no.

⁹Lonyü shyepfü no benshü nyala; tsüje tsüno benshü nyala.

¹⁰Tsüje a nnyu keshü genyu tsü swetsü lalo, akhishwi pe ano kenjün kethyü lo nyungwamvu kethyü genyu.

¹¹Nyuthyüo ano ajvü ginyu sila mvuyo, nmvue nnyushü nye ka sila mvuyo.

¹²Nyuthyüo ajvü le a-kho pe ano loyo? Nyuthyüo ano a-hon tsü loyo?

¹³Ale tsüka sikela we ntsoka rüyü bin nrün,

¹⁴nduka rajabin thyünikelo raja nyu lo kedanyu hontse zhübin nrün.

¹⁵Tson yatselo ale suna raka le a-ka kesü thyü kebin raja nyu hontse zhübin nrün,

¹⁶nmvue nyuhanyu hontse zhübin nrün.

¹⁷Sika nyu we temi serikemvu güe gwakemvu thyü mvula, lo thathyü kenjün thyü kehü güe kerüyü hyulo hü.

¹⁸Donyue nyunbwe nye lohü, a-nyugun kesü kethyü khwe nyülo mvuso.

¹⁹Kedanyu lo keshenyue tsünyu bin, donyu-e anyugun npu nyu ben nyu bin mvu laso.

²⁰Nyuthyüo temi no yhun kenjün thyü bin hüyo? Nyuthyüo keben khishüo temi no nyun kenjün thyü hüyo?

²¹Kesi khwe bin-e tsü le ryümvu; anyugun le kenya lihi nyeki kesi n nyü.

²²Anyugun le sio pe sunla kemvuthen anyu kenyülo hümvu;

²³Sunggigü le anyugun sidyü kebula lo lizin hizin aphu nyu a-te thyüla.

²⁴Tyütsü nrün sunka, ale chechü, lo anyun kenjünthyü bin gwünzin.

²⁵Ale nshvu-nrün kehü aphu age ryüla.

²⁶Ale nyunkebwe, kerüyü ndi, lo akenjün kethyü le a-keni ndi.