Read Southern Rengma Naga JOB 30 Bible Online

JOB 30 - Southern Rengma Naga bible

JOB 30

¹Ai ntsoka we anyeki kenche nyu le alope keyüthyü bin laso! Anyugun pvü nyu le temi gwakemvu nyu ale anyugun no ahi dan zen-o tanyüe khwe kemvu nyu le.

²Anyugun le temi kvumvu kela dan me, kvumvu ritsin agenyu thame thyülo kemvu dan me.

³Anyugun le thame ndi lo nnyo-o khejenyu, tehen ki me kendi bin ki senmen kesin nyhe hü.

⁴Kazü kesi ki tehen phü tyü, kashovü senbin men a-keyhün kendi-e tyü hü!

⁵Temi aphu nrao anyugun hüla, kerühu nyu hü kebin hontse.

⁶Anyugun le tsokü nyu yhun hü, tsokhin ki kü tso lo-o.

⁷Tehennyu anyugun le tehenthyü hontse nra nhu lo tehenphun hensin ki kequen.

⁸Gwakemvu a-zan kendi lihikemvu dan me! kazü günyu anyugun hüshwila.

⁹Ntsoka nyugun le ryü ashwinyü bin; ale lihi kemvu, ai anyugun keyükon thyü laso.

¹⁰Anyugun le ashwi ntsü, anyugun kerüchün le anyu le gwaritsin letse tson-o ryü nsü pe a nye.

¹¹Sunggigü le athyü pe ano kvumvu lo keche ndi kela genyu anyugun le nthün-o a ntsun.

¹²Danda higü le a whe; anyugun le ahü ketsü; anyugun le akenshwe ndo.

¹³Anyugun le ale tinlo nrün tson bothü lao a nke lati tse ndo; lo temi nme anyugun khinla mvu.

¹⁴Anyugun le a chwida kepekü aphu ka chwiryü tson-o a soki a kedüren tsüryü;

¹⁵Kenshvu le age ryüla; a teshwe le tsangkenbu hontse lo a kenya le nmhu hontse tinla.

¹⁶Ntsoka we ale sigü jü laso; a kenjün kethyü no rüyü kelo nme ndi.

¹⁷Khejenyu aru aphu arhi; a kethyü le pon mvu.

¹⁸Sunggigü le a bolaphi sülo-o aphi rape a-gwünjü thyümvu laso.

¹⁹A-le a süshe pe kenbe nyu shüla; ale kerhu nye gwakvu mvu.

²⁰O Sunggigü, ale nkoshü, ai nle ajo kenishü mvu; lo ale kehithyü keshü ka nle nyüshü mvu laso.

²¹Nle age nrigwakemvu peshü; nle nkekvu aphu sen a nthyünnyü.

²²Nle tsangkenbu no a whün sen tinla; nle tsangkenbu terhi no a whün ketsü kezen.

²³Nle azen kesi nyu gü kejü ale shabin nle, aphu genyu thyü pe bin kenjü gü nyu.

²⁴Nyuthyüo nle nke kebin temi nme whe hü nla, thame thyü keloimvu ai nka shwikenjün hi kebin gü?

²⁵Ale kenjünthyü kebin nyu zen-o chü, lo rhodyü kebin nyu genyu anyungwamvu hü mvu ole?

²⁶Ale shekerhün lo keben nrin bin, ai tsü sunka kenjün kethyü lo kezün le ryüla.

²⁷Nyun kenkhi lo akethyü genyu a sürhenla sele; khenyütsen ale kenjünthyü bin nyo.

²⁸Ale tsangkenyü nme hyumvu tse kezün nyu hohü nle; ale süda dan nyu so-o keche hi.

²⁹A khwe le mesükerun lo Ostrik kenra khwe hontse nyungwamvu lo a npfü.

³⁰Agi le metsen laso; ale rüka bin.

³¹Gwüngwa ale shekerhün lükethyü nyülo ntsoka we ale chekechü lo kechü nti nyülo.