Read Southern Rengma Naga JOB 31 Bible Online

JOB 31 - Southern Rengma Naga bible

JOB 31

¹Ale lünyu nme-e nnyüo nri loho tse keswe thyü njü.

²Kekvutsin Sunggigü le agun ge nyuthyü shübin nla? Dihontse a-le temi tho chün thyüshü bin la?

³A-le kenke lo shaja senryü thyüzü kehünyu tsü hü.

⁴Sunggigü le atho aphu sha; a-le a kenkvu aphu hyu bin nle!

⁵Ale serikemvu thyü mvu lo me kechanyu sa titse nda shwimvu letse swe bin nyo.

⁶Sunggigü no kesükü ketun kethyü ka asü shwilo, lo akemu kendi a-le hyu loti.

⁷Ale tson kenjü günyu rani tinla nmvue gwakemvu le a kenyüla lo kemu le aben yün la yatselo,

⁸arasha dan nke la, nmvue alow ketsü tsü kechanyu no tyü lalo.

⁹A kazon gü nu shwipe akenyü tson-o tsügi khenpfü ka kebuo khwe hü yatselo,

¹⁰anu no temi kechanyu ketyüketsü bonnilo lo temi kechanyu no ge zhüta.

¹¹Kesi shaja pe serikemvu tson kehünyu tsü mvu loshvu.

¹²Tsüle kenke, mazi nyu mah hontse, ahon aphu ro lati.

¹³Agonyu nme le a ntsun-o kenya lo ale nyüshüo kenjü gü thyü pe a-tsüti.

¹⁴Ale tsonshü mvuya tselo dihontse Sunggigü zen keteno lo mon? Sunggigü le ajünkera keryü ka ale nyu zolo tila?

¹⁵A nyhunkeshü Sunggigü tsü le agonyu ko nyhun shü le.

¹⁶Ale kendinyu keche mvule tsela hü mvu; ale maginyu no asheseo yhun hü mvu

¹⁷nmvue ale tyüo tegonyu no nnyo hü mvu.

¹⁸A yhunthen ale anyugun nucha hü.

¹⁹Temi peha le rhodyüo a-phinya heilo ho kebin hyu lolo,

²⁰ale thyühüphi pe a-tsüshü tsüle a npfü atanyü ge hyukelo. Tsonlo a-le a-nyun aphu sen-o a shwen hü.

²¹Ale jokera nyu kvulo gwa tse kethyü shao tegonyu nme nshwe yatselo

²²tsonlo abu no tse lalo; tsüno abuthun ge tü lalo.

²³Ale Sunggigü shaja kenshvu genyu ale thame kae tsühontse thyü loho.

²⁴Ale kenya tenyen

²⁵nmvue a kenya genyu ketekho hü mvu.

²⁶Ale yhüko keben nmvue shye kezegwa tsü aphu rüshvu hü mvu.

²⁷Ale gwünzü sen-o tsüdan rühvu tsüdan kerühvu genyu aben nba tin lamvu.

²⁸Kemu tsü hontse kethyü tsü kesi shaja pe tsü mvu loshvu; tsüle Kekvutsin Sunggigü zoshwimvu kela genyu.

²⁹A shwikerüchün nyu le kenjün thyü kelo ka ale asherhün nmvue anyugun le kenke teno lolo akenyü hümvu;

³⁰anyugun no sila lotse kehithyüo kemu thyüla mvu.

³¹Ale a-zintse tesin nsin lohü tse kethyü atho thyü kehünyu aphu shabin nle.

³²Ale kenjwenyu kope akanyu shülo lahü, anyugun no tsonda nyuzhü hü mvu.

³³Me kechanyu le kemu dan kebu titse ai awe kemu henpfü hümvu.

³⁴Ale temi le nyu zotiyo tsü nshvu hümvu; ale anyugun le akesü kethyü nshvuo matse la nmvue kanyu bin tinla hümvu.

³⁵Ale nyu zobin yo temi nme nyüshü mvu ole? Ajo aphu ketsin tse ale swe bin nle. Kekvutsin Sunggigü no ajo kenishü lo. A kentsun nyu dan le senryü a njü kebin dan thu bin-o ale tsüdan shwishü logwa yatselo,

³⁶Ale ketekho-o abuthun ge tsüdan penti lo perün nme hontse tsüpe ape ge shüti.

³⁷Ale thyükela dan aphu pe Sunggigü ka zoti, lo a-mhundyü ka ape penso ti.

³⁸Keshanyu ka ale lowtsü kebin kazü tsüle a-npu thyü kebin nyu hon rühu lo kela-

³⁹tsünyu yhun chwikeryü rasha ale tyüla ai tsüshü keshü low ketsü gü no nnyo bin-

⁴⁰tsonyatselo thoshe lo barle sunka jontsü lo nyhe no yhun lata. Job jo dan le penla.