Read Southern Rengma Naga JOB 32 Bible Online

JOB 32 - Southern Rengma Naga bible

JOB 32

¹Job le a-npfü a-kemu ndi letse rüchün kela genyu mishen dan le a-jo keni sinmvula.

²Ai a-zan le Elihu tse kethyü tsüka kehünyu nme le Job le a-npfü a-kenjü zo lo Sunggigü nmu kethyü genyu a-nyunkenta kekhe nilo mvula. (Elihu le Barakel nyugü, a-le Buz tsipwen lo Ram pfüphun.)

³A-le Job pfünyu mishen dan ge ko a-nyunta la. Anyugun le Job jo kenikeshü tson hyulo mvuo Sunggigü le a-zümvu kethyü hontse lo kela genyu.

⁴Tsüka kehünyu dan nyu Elihu le a-nchetsin gü genyu a-le aphu no jozo thükela khwebin.

⁵Tson-o mishen dan le Job jo kenishü loho la ntsin a-le a-nyuntao

⁶jozo so. Ale ntsenyu lo hagun le püshünyu, tsügenyu ale a kerüchün pe hagun ka zo nshvu hü.

⁷Ale a npfü a nthon-o hagun le jozo zü, hagun püshünyu ju le a-thakesha pe kenjünlo mvuloshvu, tson bin.

⁸Ai temi ge ryüo kensü pe temi tsüshü kehü gü tsü le Kekvutsin Sunggigü kapu gü.

⁹Püshükelo tsüle temi thyü pe no thasha lo nmvue tsüle anyugun keche pe nyu le njü yo shalo hümvu.

¹⁰Tsügenyu ale hagun no ajo nyüshü nyü bin nle; ale nyu rüchün binyo ano pe hagun ka zoshü ta.

¹¹Hagun le jozo kebin ka ale nyhenhio nyü shü lo hagun le thakesha jo fü kebin ka khwe bin.

¹²Ale nyü kegwa thyü kebin ka hagu le zotoshü lomvu; Jonb le nyu zoshü yo tsüle a-kemvu tse tsin shümvu.

¹³Dihontse hagun le kensü hyulo la sele tse zolo gwa tila? Sunggigü no Job jo kenishü mvulo shvu, hagun le zo lomvu kela genyu.

¹⁴Job le aka mvu le, hagun ka zobin, ai a we hagun hontse kenishü kemvui.

¹⁵Anyugun jo ndi laso, Job; anyugun le njo kenikeshü ndi.

¹⁶Anyugun le ntsema bin lo ale khwebin ti ole? Anyugun le thame zosin keshü ndio tsüka sobin.

¹⁷Nmvu, ntsoka we ako jo tsü kenishü ti lo ale nyu rüchün yo pe nka zoti.

¹⁸Ale jozo titse khwelo hobin nle. Ale jo dan zomvu bin keloi mvuso.

¹⁹Ale jokezo gwünkho hyulo kemvu we, vainzu keshün pe sü kenjü thyügikhin hontse pfürhenla tiso.

²⁰Ale sunbin lomvu so; ale jozo ti.

²¹Kenyi kebin hinyu hi ale nme zin nopen loho; ale nme-e dyügwa thyü titse loho.

²²Ale dihontse me dyügwa thyü tiyo shamvu, ale tsühontse thyü yatselo Sunggigü le whütse shaja pe atsü ti.