Read Southern Rengma Naga JOB 33 Bible Online

JOB 33 - Southern Rengma Naga bible

JOB 33

¹Tsügenyu, Job, ajo aphu nyü kegwa thyü shülo.

²Nyu le anyun ka bin yo ale tsü zoti tse ndo bin nle.

³A jo aphu ketsin, lo ale ketsin zobin nle.

⁴Sunggigü kapu le athyüshü lo kerhün pe atsüshü.

⁵Nle thyülo gwa yatselo, ajo kenishülo. Azen kenyi nrün genyu ndolo.

⁶Sunggigü mhundyü nyu we nko lo ako tse kenme le, n nyi mihvu nren nnyo pe thyü.

⁷Tsügenyu nle a kenshvui kon ndi; ale nkedün loho.

⁸Nle hihontse kezo ale nyülo:

⁹“Ale mu mvu; ale thame thyüzü lamvu. Ale akemu ndi lo kemu shamvu.

¹⁰Ai Sunggigü le a whe nrün tson fü bin nle lo age a-shwikerüchün nyu nme hontse thyü bin nyo.

¹¹A-le tegiron pe apha phinla; lo ale nnun keshü aphu nri bin nle.”

¹²Ai ale nka zobin nle, Job, nle a-zümvu. Sunggigü le temi ligü higü nyeki gon.

¹³Nle nyuthyüo temi nme le kenya keshü kenishü kemvu genyu Sunggigü nmu bin nla?

¹⁴Sunggigü le zonini bin-e, temi nme-e a-le nyu zobin yo rüchün shümvu.

¹⁵Khejenyu temi le zhü kebin ka, Sunggigü le minzhü lo tsemin ka nthon shü.

¹⁶A-le anyugun no a-le nyu zobin yo nyülo, lo a-le anyugun no pütsü lolo tse keshü ka anyugun kerülo.

¹⁷Sunggigü le anyugun nthon shüo anyugun no kemu thyü mvula lo anyugun le ketekho chwiryü kejü nyu anyugun kenishü.

¹⁸Anyugun nke kela le a-kendo mvu; a-le kesi gü nyu anyugun kenishü hü.

¹⁹Sunggigü le kehokenyü nishüo temi thyü kenjü shü lo kethyü pe a-min kesü thyüshü.

²⁰Keho gü le tha tyütsü nyü mvula, lo ketyüketsü kegwatsin-e shwi a-nyu tsemin la.

²¹A-min le nthü la; tson-o nle a-ru aphu hyu lahü;

²²a-le kesinyu kazü ki gü jüla.

²³Tsanggelonyu nme le ryü a-cheshü logwa- Sunggigü lonyu yie dan nyu nme, temi tho pe temi ka zonishü kehü gü le.

²⁴Shwikenjün nyu tsangge logü le, “A-hoshü lo! A-no kesinyu kazü ki gü kemvui le. A-hoshüla nrün genyu a-rhinhilo nrün gü le hika bin nle.”

²⁵A-min le yhun pe bwe lo nkoni lo;

²⁶a-le kehithyü keshü ka, Sunggigü le a-jo kenishü ti; a-le shekerhün thyü Sunggigü rüshvu ti; Sunggigü le a-genyu thathyü kejü nishü ti.

²⁷A-le süda dan nyu, “Ale mula: Ale kenjü thyü lomvula, ai Sunggigü le a nrho shüle, tse zoti.

²⁸Kesinyu kazü ki gü kejü a-le a ntsenlo, tsügenyu ale rhün bin zunle.”

²⁹Sunggigü le tha aphu thyü nini hü;

³⁰a-le temi nme keyhun kenishü hü, lo shekerhün keyhun pe a-tsü hü.

³¹Job, ntsoka, ale nyu zobin yo nyülo; ntsema bin-o ano jozo shü.

³²Ai nle tha peha kezoi le bin lo, ano tsü nyü shü ta; ale a shekerhün thyü nle njü letse ti.

³³Ai tsonmvu yatselo, ntsema tse akhwe nyülo, lo dihontse thasha lo tiyo ale nsenthyü shüti.