Read Southern Rengma Naga JOB 34 Bible Online

JOB 34 - Southern Rengma Naga bible

JOB 34

¹Hagun le thasha sa lo hagun do gwasa; ntsoka ale nyu zobin yo nyülo.

³Hagun le ketyüketsü ntsin shwio kegwa keshvu shalo hü, ai thakesha jo we nyü shüo tsonlo hü mvu.

⁴Kegwa keshvu shao kejü kelo tsü le ngun ge.

⁵Job le zo kebin le a-le kemu ndi, ai Sunggigü le kenjü gü thyü pe a-tsümvu letse bin.

⁶A-le ketso-o, “Dihontse ale nkuo ale a-zümvu letse zolo mon? Ale jünsa lola so, ai ale kemu ndi le.”

⁷Hagun le Job hihontse kethyü temi nme-e hyu sele mvula? A-le thame kae Sunggigü kerühvu pe himvu.

⁸A-le temi gwakemvu nyu zen kengü nyü lo kemu nyu zen-o hohü nyü.

⁹A-le zo kebin le Sunggigü kendo then titse kethyü genyu thame kegwa ndi letse.

¹⁰A khwenyülo, hagun thasha kekho lo kehü nyu! Kekvutsin Sunggigü le a-zü kemvu thyü ti ole?

¹¹Temi le nyuthyü shülo nyu hyulo züyo a=le tsüdan chün thyü pe anyugun ge shü hü.

¹²Kekvutsin Sunggigü le gwakemvu thyü hü mvu; a-le temi nme-e ge njükemvu thyü hümvu.

¹³Sunggigü le temi peha ka a-kekvu hyulo ole? Peha le a-lope kazü gü ntsen shü ole?

¹⁴Sunggigü le kerhün teshe gü khinilo lalo,

¹⁵rhün kehü aphu silao nnyo ngwani lati.

¹⁶Ntsoka a khwenyü shülo, nle thasha yatselo.

¹⁷Nle kemitsin Sunggigü nmu bin nle? N kerüchün le a-le kenjü nrhi bin letse bin le?

¹⁸Sunggigü le raja nyu lo kekvu kesen nyu nmu hü, anyugun le nshün mvu nmvue serimvu kela ka.

¹⁹A-le kekvu kesen nyu jün che nmvue kenya gü kenyü thyüo kendi gü ntsun hümvu, a-le aphu nyhun keshü genyu.

²⁰Temi nme le khejenyu gwen tse sila logwa. Sunggigü le temi vüshe shülo anyugun le nke lahü; a-le rümvu shü tse kekvu gü boshvu lahü.

²¹A-le temi kenkvu aphu shwi bin hü.

²²Kezün nme zün ritsin-o Sunggigü mhundyü nyu kemu nyu nme kebu loho.

²³Sunggigü le temi no gü a-jünkera nrün genyu a-le gwünkho tha mvue gwa.

²⁴A-le sharhinyu khelao kechanyu pe anyugun bin ka shü nrün genyu ketsoketsü mvue gwa.

²⁵A-le anyugun le nyuthyü yo shakebin genyu, khejenyu anyugun süshe shüo kedüshwe lahü

²⁶A-le temi aphu hyulo kegwa bin nyu shaja pe kemu nyu tsü hü;

²⁷anyugun le a-then mvula lo a-johokeshü aphu pe lihi kemvu thyü kela genyu.

²⁸Anyugun le kendinyu kemvu thyüo no nra Sunggigü koshüo anyugun le aka keche kehi a-le nyülo la.

²⁹Sunggigü le thame thyü kemvui tse rhilo lalo temi nme a-nkhin keloi ndi. A-le a-mhun kebu lola, temi kekeche ndi lati.

³⁰Senye dan le thame thyüo Sunggigü shakemvu me nshwe kehü dan no anyugun so gon nrün khin loho lati.

³¹Job, nle nkemu zoshwi pe Sunggigü kishü lo mu nimvu sele tse n johoshüla le mvula?

³²Sunggigü no nle thyüzü kela pe nhishü lotse hi lo thagwa kemvu thyümvu sele tse nkendo la le nmvula?

³³Sunggigü le nyuthyü bin yo nle tsü ntsun kebin le nle nyu nnyü bin yo a-no tsüthyü keshü nrin logwa ole? Rhikelo tsüle nkipon, ale mvu; nle nyu rüchün bin yo agun ka zoshü lo.

³⁴Thashalo kehünyu ligü higüe a-kendo tsentsü ti; akhwenyü kebin thakesha nyu ligü higüe

³⁵Job le thashamvuo zobin lo a-le zo kebin tsüle a-kon ndi letse zoti.

³⁶Job jo tsü aphu rüchün shüta; a-le temi gwakemvu nyu nme hontse jozo kebin hyu loti.

³⁷A-le jozenkemvu pe a-kemu dan sin bin; ngun aphu mhundyü ka a-le Sunggigü shwinyü bin nle.