Read Southern Rengma Naga JOB 36 Bible Online

JOB 36 - Southern Rengma Naga bible

JOB 36

¹Nyhenhio ale Sunggigü sunka nyu zobin yo nyü kethün shüta.

³A thakesha le nmhun le; ale nyu shayo tsü sen-o Sunggigü, a nyhun keshü gü le njü tse tsin pe nhi shüti.

⁴Ale nka zokebin nme-e nkumvu; thakeshanyu ketsin nme le nmhundyü ka kebin nle hyu bin nyo.

⁵Sunggigü le ditsüki kvula! A-le temi nme ntsü hü mvu; a-le shakemvu thame ndi.

⁶A-le kemunyu no yhun bin hümvu, lo a-le a-zintse kenjü pe kendinyu ge shü hü.

⁷A-le kemitsin no raja nyu hontse kekvu sen lo me no kethonthen anyugun rühvu hü nle.

⁸Ai temi le a-tho genyu ron pe aphin pfüo kenjün thyü bin yatselo,

⁹Sunggigü le anyugun kemu lo ketekho pe hi shü hü nle.

¹⁰A-le anyugun thyü pe pütsü lo-o gwakemvu nyu rani lolo tse keshü gü nyü lohü.

¹¹Anyugun le Sunggigü jozen-o a-lothyü lo, anyugun le bwenye tse gwakenyeo yhun lohü.

¹²Ai nmvu yatselo, anyugun le thashamvu tse silao, züri gü pfüthü sen-o kesi nyu kazü güki güla hü nle.

¹³Sunggigü shakemvu nyu le a-nyunta bin hü nyo, lo shaja pe tsüshüe kehithyüo keche hi hü mvu.

¹⁴Anyugun le selo thyü kebin ka sila hü, kemenio a-keyhun jon pen lahü.

¹⁵Ai Sunggigü le kenjün kethyü nyu temi senthyü, lo shekese sen-o anyugun yhütyü khinshe shühü.

¹⁶Sunggigü le kenjün kethyü nyu nzen chwiryülo, lo nno kenshvu ndio yhun nsherhün lo; ketyüketsü pe nmiz ge khwe shü.

¹⁷Ai ntsoka we nle hyulo kezü shaja pe ntsü shü.

¹⁸Pütsü salo jvüjwe no nsa, nmvue kenya dan no ntson tsin zü lanya.

¹⁹Keche hio nra kebin tsü le thame n ge kegwa thyüshü loho; ntsoka we nkekvu aphu nkeche keloi mvu.

²⁰Tsangzün keryü nnyü bin nya, senye dan le nkela nrün gwünkho gütsü.

²¹Ranio gwakemvu nyu gülamvu nrün genyu pütsü salo; nno tsünyu gülamvu nrün genyu n kenjün kethyü khishü.

²²Sunggigü kekvu le dihontse gon yo rüchün lo; a-le aphu nyeki senkethyü keda tsin gü.

²³Temi nme Sunggigü no nyuthyü tiyo zoshü nmvue gwakemvu kethyü pe a-njü lo nrün ndi.

²⁴A-zintse a-le nyuthyü hüyo tsügenyu a-shwe hü; nko a-shwe mvulo shvu.

²⁵A-le nyu thyüshü yo temi aphu hyu laso; ai ngun le ntsenki bin-o shwilo kegwa gwünzin.

²⁶Ngun le a-keda shati loho nmvue a-chen dan swübu keloi mvu.

²⁷Kazü gü nyu zü khilo kehü gü tsü le Sunggigü lo tsü pe tsangkenri thyü nishü.

²⁸A-le temi aphu genyu nmhu ge tsangkenri ja shüo no ri tsüryü.

²⁹Dihontse nmhu le a-bin ketu hüyo temi nme shamvu nmvue dihontse tsangneki Sunggigü kebin bin ki tsang le sen shü hü yo.

³⁰A-le tsangkechwü nipe tsangneki aphu shü, ai züda kentsun ki we züntin bin.

³¹Hihontse a-le temi ginthyü hü lo ketyüketsü kesükela khishü hü.

³²A-le a-ben pe tsangpera tejenlo lao no shweti tse kebin gü shwe lahü.

³³Tsangkenbu terhi le ryü kejü tsangkesen le zoshü la, tson-o tsüle ryü kejü senru dan le sha lahü.