Read Southern Rengma Naga JOB 37 Bible Online

JOB 37 - Southern Rengma Naga bible

JOB 37

¹Tsangkenbu terhi gü le anyun thyü pe tuntun tse bin.

²Nyü shüta, hagun aphu, Sunggigü khwe gü, a-mün nyu chwikeryü tsangkesen gü.

³A-le tsangkechwü nipe tsangneki, kazü kenni nme zin gü kecha zin tishü.

⁴Tson-o a-le nho keshü khwe gü nyülo, tsangkesen terün kepfün khwe gü, lo tson tseo tsangkechwü shü.

⁵Sunggigü le johokeshü ka ndun tho dan thyüla, ngun le shati lo keho ndun kethyü dan.

⁶A-le khütso no kazünyu che tsüryülo tse lo tsangri sa shülo tse joho shü.

⁷A-le temi tho kethyü khinla; a-le nyuthyülo gwayo tsin pe anyugun hishü.

⁸Tehenthyü dan le anyugun kü ki güla.

⁹Tsangkenbu terhi le tesinzin ryü,

¹⁰Sunggigü teshe le zü dan whün nkun shü, tson-o tsüle khütso thün thyü lahü.

¹¹Nmhu ge tsangkechwü shü,

¹²tsüdan le Sunggigü kendo ka nnu hü. Anyugun le Sunggigü le johokeshü aphu thyü, kazü aphu nyu lika hikae.

¹³Sunggigü le tsangkenri nipe kazÜ ntsen shü; a-le tsü nipe no shaja senryü temi tsü, nmvue a-keso tsin pe anyugun hishü logwa.

¹⁴Job, gwüngwa matseo nyülo; Sunggigü le thyükeshü ndun kethyü dan rüchün shüta.

¹⁵Nle sha le mvula, dihontse Sunggigü le johoshüo nmhu ge tsangkechwü thyüshü hüyo?

¹⁶Dihontse nmhu no tsangneki shwa bin hüyo, Sunggigü tho ndun kethyü dan nle sha le mvula?

¹⁷Nmvu, nle kenyen nyu kenjün thyülo kehü gwünzin tesin kipon tsangkenbu le kazü gü nyu keryü ka.

¹⁸Nle Sunggigü cheo tsang sükhun shü lo tsü thyü pe tegi shon kela hontse nko logwa le?

¹⁹Sunggigü ka nyu zo tiyo pe agun senthyü shülo; agun nyun le a-kenrun; agun le thame zo nrün ndi le.

²⁰Ale Sunggigü zen kenthon titse hi loho; nyuthyüo ale a-no a nke kela gwünkho pe a-tsü bin tila?

²¹Ntsoka tsangneki keben gü le benchvü tse, tsü nri titse kethyü le ngun genyu ben ritsin; lo tsangkenbu le tsangneki tsü sho kenshÜn la.

²²Tesozin suna kenshwe hyu hü, tson-o Sunggigü zan kechwi le nrün ho tse kethyü pe ngun kesü thyü shü hü.

²³Sunggigü kekvu le gonri tsin-o ngun le a-kho nniryü loho; a-le kemitsin lo kenjü pe temi ge shü hü.

²⁴Tson-o, temi aphu nrün ho tse a-mhundyü nyu so kebin tsü le ndun kethyü nme mvu, lo a-npfü a-le thasha letse kehü temi tsü a-le süjün hü mvu.