Read Southern Rengma Naga JOB 38 Bible Online

JOB 38 - Southern Rengma Naga bible

JOB 38

¹Tsüselo tsangkenbu terhi nyu Npugü le Job ka zoshü

²Nle segü letseo, n thashakemvu lo jo a-kon kendi zo-o a thakesha ketso bin nla?

³Ntsoka pechenyu nme hontse solo-o ale nketso keshü dan kenishü lo.

⁴Ale kazü thyükeshü ka nle tsüka hü le? NLe shasa bin yatselo tsü rüla aka zoshülo.

⁵Tsü no dikho gon mvulo shvuyo tse segü le rhi lola? Segü le tsü kendoron sü keta shü ola? Nle tsü aphu shabin nle?

⁶Kazü gü le a-ge sun kebin kachon dan nyule tejen sen bin nla? Segü le kazü gü phasin pe shüshü la?

⁷Tsü jonnyü lonyü gü shyenyü dan le kengüo lüthyü, lo tsangge nyu le shekerhün genyu nra sen shü.

⁸Segü le züda gü tsonkhinla la tsüle kazü gin pfürhen chwikeryü ka?

⁹Ale nmhu pe züda gü henshü lo tsüje pe züntin tse shü.

¹⁰Ale züda gü terhi thyüshü lo tsü khinthü pe bin la.

¹¹Ale tsügü ka, “Tsügerho, lo tsünyeki ryü nya tse zoshü! Hika zükentyü kekvu le sunla mvu loshvu.”

¹²Job, nle nkeyhun ka khenyüme jon no ben chwiryü lotse njo hoshü ole?

¹³Nle benchwiryüo kazü gü tün lo-o serikemvunyu dan kebu bin nyu anyugun sükenu shü lotse ahza hoshü le?

¹⁴Tsangkeben le rincho lo ketejon dan thyü pe phi nme kese kebin hontse no solo la, gin ge mehor vü kela shvu hontse tsentsü lahü.

¹⁵Nhenyu keben le serikemvu nyu genyu ben ritsin-o gwakemvu tho kethyü nyu anyugun khin nila.

¹⁶NLe züda kentsun ki zükepen bin gü nyu gü shwi le? Nle züda thinki tsonchüla sele?

¹⁷Temi peha le kesinyu kazü kezün khinrun tsin pe nhi shü le?

¹⁸Kazü gü le ditsüki gon yo nle shabin le? Nle shabin yatselo jo kenishü ta.

¹⁹Keben le dikipon ryü nmvue kezün gü le dika chwiryü yo nle shabin le?

²⁰Anyugun le dithen ki gü tiyo, nmvue ninishü nrün nle tsin pe anyugun hilo gwa le?

²¹Nle zolo gwa tsentsü nle püshüsa kela si genyu, lo kazü thyükeshü ka nle tsÜnyu bin!

²²Ale khütso lo tegwün pe bin kenjü katsen gü nle nrishüla sele?

²³Ale kenjün kethyü lo thyü teri gwünkho dan genyu tsüdan ndo njü nle.

²⁴Nle yhüko gü le chwiryü kehü bin ki güla sele, nmvue npho tsangkenbu le kehü bin ki?

²⁵Segü le tsangri shü nrün tsontso shü lo tsangpera tson ketsü shü ola?

²⁶Segü le temi nme yhun kemvu bin ki tsangri no tsükeryü thyü shüla?

²⁷Segü le zü pe kazü kesin lo keteri ntsen shüla, tson-o tehen no yhun chwiryü la?

²⁸Tsangkenri nmvue khüzü le a-pvü le bin le?

²⁹Segü le khütso lo cheren a-jvü,

³⁰tsüle zü no rani gü tso thyüla tson-o züda gü thyü nkun shü ola?

³¹Nle Penpho dan phinkerhün nmvue Sezoketsonyu kephin shwüshü logwa le?

³²Nle gwÜnkho kho ka shyenyü dan tsontsin lo tsangzün shyepvü keda gü lo keshe gü au tson tsin logwa le?

³³Nle tsang dan ketsen kehü tejvü dan sha, lo tsü pe kazü gü ge shü logwa le?

³⁴Nle nrao ahza pe nmhu dan tsüshüo tsüdan no tsangri pe nntsen shü logwa le?

³⁵Lo nle tsang no kechwüshü lotse johoshü lo tsüle ryüo nka, “N lothyü shüti,” tse zolo gwa le?

³⁶Nile züri le da güjü lo segü le zügü ka zoshü, nmvue segü le tsangri ryü kejü pe terogüzü ka zoshü la?

³⁷Segü le thasha sao nmhu dan swülo lo tsüdan ge tsangkenri ja shü,

³⁸tson-o tsangkenri tsüle kenphü thyü nko pe a-thün thyüshü hü nla?

³⁹Nle shünyho no tyü nrün genyu, shünyho nyu nnyo kebin dan no ketegvü anyugun le tsokü nyu kebu kebin, nmvue anyugun kü nyu zhüo khwe kebin dan chvü fülo gwa le?

⁴¹Tegvü dan le nnyo-o ho kehü ka anyugun nyu le chvü hio ako keshü ka, anyugun leyi keshü tsü le segü la?