Read Southern Rengma Naga JOB 39 Bible Online

JOB 39 - Southern Rengma Naga bible

JOB 39

¹Dicheka thyünyu le nche loyo nle shabin nle? Thyüzhe le nche kebin nle hyu le?

²Anyugun le dithen ki a-nyupfü hüyo nle sha le? Nle anyugun kenche gwünkho shabin nle?

³Anyugun le dicheka tsenyo tsüo a-nyu nche pe kazünyu shü tiyo nle shabin nle?

⁴Tehennyu anyugun nyu le nko soryü; anyugun le tinla lo raniryü hümvu.

⁵Segü le a-kendo thyülo kegwa pe tehen gada dan tsüshü la? Segü le tsüdan shwüshüo no ho hü nla?

⁶Ale anyugun kathyü lotse kazü kesi gü pe anyugun tsüshü, lo tsi kazü ketejon nyu anyugun no yhun.

⁷Anyugun le me le nranri kehü nyida dan zen-o nithen ki bin, lo temi nme-e anyugun senthyü pe no thatho thyü mvu.

⁸Kazüthun dan le anyugun chvükelo bin, tsüki anyugun le tyü titse tehen kenjvü lihi-e fü hü.

⁹Teronyugu nme le ntho thyü shü ti ole? A-le khejeme nthuka nyu zhünyü ti ole?

¹⁰Nle ron pe nme dyülo-o no n low yhen shü logwa le? Nmvue a-no n low nyu low keyhen dyü süpfü logwa le?

¹¹Nle a-kekvu keda le kebin tsü tenyen-o a-no ntho kerü thyüshü titse nrin logwa le?

¹²A-no shye kenyubin ki nshye pfüryüo kequen shü titse nrin logwa le?

¹³Ostrik le a-sekin kekhen nmhe sa lohü! Ai Ostrik nme zügü hontse nye lomvu.

¹⁴Ostrik le a-zü khepe kazü nyu shü lahü kazü kenyen no bün nrün genyu.

¹⁵A-le me no kedüren la nmvue tehenthyü no bokho kela rüchün hümvu.

¹⁶A-le a-zü le a-honkemvu hontse lo kenjün thyü pe a-kon kendi thyüla nrün rüchün hü mvu.

¹⁷A-thyü pe no pin kela gü tsü le ale lo kensü pe a-tsüshü mvu.

¹⁸Ai a-le tin solo, keru lo tsüge kebin nyu shwinyü logwa.

¹⁹Keru thyü pe nko sa, lo anyugun gunda hü thyü keshü gü tsü le, Job, nle ole?

²⁰NLe anyugun thyü pe no tsekhvü hontse nchwe lo a-kehen khwe pe temi ketsun kelo thyü shü le?

²¹Anyugun le ketejon ki a-kenyüho tse a-bu pe khü bin hü; anyugun kekvu aphu sen-o tin terinyu gü.

²²Anyugun le kenshvu kon shamvu, lo zhethon nme-e anyugun hü pe rani loho.

²³Anyugun ge kedun nyu dan terironye le yhüko le shwe shülo chwüchwü tse.

²⁴Shekerhün thyü ndü-o, keru dan le mhundyü zin tin gü; shukhun bin-e, anyugun le sun nma tselo mvu.

²⁵Shukhun keshü aphu ka anyugun le khun shü; anyugun le a-kho nni gü kemvu kanyu terirün sha logwa, lo kedanyu le nrao johoshü kebin nyülo hü.

²⁶Tsemu le tesinzin ntsun-o a-sekin sükhun keshü ka tsü le dihontse nye tiyo nka shalo le?

²⁷Logi le kazüthun ge ketetso ki a-se thyü nrün genyu nle johokeshü khwe bin hü le?

²⁸Tsüle tsonye ketetsotsin ki a-ka thyü lo thunra kentsen dan pe a-chwida thyü hü.

²⁹Tsünyu bin-o a-khoka lo nithen ki-e tha peha boshvu tyü nrün genyu nri bin hü nyo.

³⁰Logi dan le simin dan hunpfüo kekhwe bin hü, lo logi nyu dan le tezi tsü hü.