Read Southern Rengma Naga JOB 4 Bible Online

JOB 4 - Southern Rengma Naga bible

JOB 4

¹Job, ale jozo shülo nle n kenyü mvula mvu alo? Ale matse binlo mvuso.

³Nle temi kechon senthyü shü lo kvukemvu nyu thyü nko shü.

⁴Temi peha le phansü, kvumvu lo hokeli binlo, njo le a-thyü kepeche pe no solo hü.

⁵Kenjün kethyü tsüle ntsoka we n ge ryü laso, lo nle tsü teno kethyü le nkerüshvu laso.

⁶Nle Sunggigü rüshvu hü, lo me le n nmukeloi ndi; tsügenyu nle peche lo n kenrin no bin mvu loshvu.

⁷Rüchün shüta. Dikipon temi kemitsin nyu le kenke teno lahü nla.

⁸Ale temi gwakemvunyu le low yhenshü lo ntsi keshü hontse serikemvu tsi shüshüo ntsoka gwakemvu lo serikemvu gvü kebin hyu laso.

⁹Tsangkenbu terhi hontse, Sunggigü le a-nyuntao anyugun nkela.

¹⁰Serikemvunyu le shünyho hontse nho lo nhu bin, ai Sunggigü le anyugun no nra mvula lo anyugun hü boryü lahü.

¹¹Shünyho hontse thame tüntyü lomvuo sila, lo anyugun nyenyu le nren nru lahü.

¹²Gwüngwa jolo nme le nkhvü tse ryü, tson-o ale tsünyü khelo.

¹³Tsüle akevü pe zhülo mvula.

¹⁴Ale nshvu lo nrün-o, ake nsü khokho tsela.

¹⁵Keben tsangkenhi nme le amhun kesü shü tsontsin a-hü terun tsela.

¹⁶Tha peha le tsüka so kebin ale hyu; ale hyu, ai tsüle nyuyo ale zo lomvu. Tsüselo matse kebin ka ale thakhwe me nyülo:

¹⁷“Temi nme le Sunggigü mhundyü nyu kemitsin nyu thyülo gwa le nmvue a-nyhunkeshü gü mhundyü ka nshünlo gwa ole?

¹⁸Sunggigü le tsangge kebin gonyu dan-e tenyen hümvu; a-le lilonyu kemue hyulo lahü.

¹⁹N kerüchün le a-le nnyo pe kethyü nyukhu nme tenyen titse bin le, shyenyu hontse boren lalo kegwa kenphü nme?

²⁰Temi nme le lonyü yhunbin logwa, ai shamvu tse ngwün gü le ryükemvu ka sila logwa.

²¹A-kebin aphu sen tinla; a-le kensü ndi tse sila hü.”