Read Southern Rengma Naga JOB 41 Bible Online

JOB 41 - Southern Rengma Naga bible

JOB 41

¹Nle hükhuvü pe Leviathan hüsü logwa ole nmvue ron nme pe a-yi dyü logwa le?

²Nle ron pe a-hinkon shon nmvue hükhuvü pe a-sapha hüsü logwa le?

³A-le nno a-hoshü lotse nka hi tile? A-le nka a-shwikenjün hi tile?

⁴A-le nzen kejoshü lo kethonthen n lothyü hüti tse a-johoshü tile?

⁵Nle tsüpe tegü nme hontse dyü pe nrothyü, n gogi dan rokethyü peha hontse logwa le?

⁶Tsehüketen nyu le a-min kera logwa le? Hakethyü nyu le tsü jün pe jwe tile?

⁷Nle tsehüketen mi pe a-gi kesü thyü nmvue tegi pe a-pe jenphe logwa le?

⁸Gwüngwa a-kesü shülo nle a-kesü niti tse ndo mvu lati; n nren kethyü tsü nle nmhinla loho!

⁹Ligü higü Leviathan hyukeshü nyu le kepeche ndilao kazü nyu chetsü lahü.

¹⁰A-le chwiryü lo nshorio; temi nme pecheo a-mhundyü nyu sunbin lo hümvu.

¹¹Segü le a-wheo rhünbin logwa tila? Kazünyu temi nme-e tsÜ thyü loho.

¹²Ale Leviathan pha le ditsüki thyü gon lo nko yo tsü rüla pe nka zoshü ti.

¹³Temi nme-e a-bola phi teso gü sürhen loho nmvue a-le ben kehü terironye dan jenphe loho.

¹⁴Segü le a-thyü pe no a-münkvu shülo tila, a-hü kenrin kethyü le hunpfü kebin gü?

¹⁵A-sizin le gida keren pe thyü tsü le kesü pe tso kenko hontse.

¹⁶Nme me senkesü ryüryü tse kehen teshe-e a-janyu chwimvu.

¹⁷Aphu senkesü pe nko sao thame tsü sükho lo nrün ndi.

¹⁸A-le nti shülo mah kenshwe le chwiryü hü, lo a-yhütyü le yhüko le chwiryü kejü hontse tsentsen tse.

¹⁹A-mün nyu mah le nnyü bin, lo mah kechin le chwiryü hü.

²⁰A-hinkon nyu mah le khu chwiryü jontsü pe la hensin roshüo khuchwi keryü hontse.

²¹A-teshe le mah thyüshü; mah kenyü le a-mün nyu chwiryü.

²²A-gunda le nko sao a-kehyu nyu aphu a-kerüshvu lahü.

²³A-gi ge kvukemvu bin nme ndi tsü le tegi hontse nko lo boren lomvu.

²⁴A-nyun kenko le thame kenshvu ndi, tha kekerütso hontse nko-o me hensin ryü hümvu.

²⁵A-le soryü lo kenkotsin güe a-kerü lahü; anyugun le nshvu pe thame thyülo nrün ndi lahü.

²⁶A-jün lokegwa zhethon nme ndi; mi, nmvue tho, nmvue tsokezeü keshü nme a-nthyü nnyü loho.

²⁷A-genyu we tegi le npenkon hontse, lo lazo le bwe pe sen keren hontse.

²⁸Tholevütsi nme a-hü pe a-no tinkeloi ndi; tso shwe pe a-ge keshÜ le npenkon pe a-kevü hontse.

²⁹A-genyu we kevüthün tsü le npenkon nme hontse, lo temi le mi shweshü lo a-le shwinyü lahü.

³⁰A-ginda zin a-kü le la kekapon hontse nyhe; tsü pe shyekenyu hontse kenbe nyu tserü hü.

³¹A-le züda ra pe zükenkhen hontse, lo tsüthyü pe terzü la kenjwa hontse shü hü.

³²A-sizin tson no benchvü tse lao züda gü thyü pe no chon nphwe shü hü.

³³Kazünyu thame pe a-zen kendyü shükeloi ndi; a-le thame me nshvu hü kemvu nyukhu nme.

³⁴A-le nyukhu ketekhotsin gü süjün hümvu; a-le tehenthyü aphu so raja gü.