Read Southern Rengma Naga JOB 42 Bible Online

JOB 42 - Southern Rengma Naga bible

JOB 42

¹Tsüselo Job le Npugü jo kenishü.

²Npugü, nle aphuso kekvu gü tse ale sha nle nyuthyü nyüyo tsü aphu thyü logwa.

³Ale nyuthyüo nshvumvu tse nthakesha ketsoyo tse nle shün shü ale thame shamvu shü le. Ale shakekho kemvu rüla kera hü, agenyu shalo nrün kendi gon pe ndun thyü ritsin kethyü dan.

⁴Nle jozo kebin ka ano nyü tseo nle ketso kebin dan kenishü lotse aka zoshü.

⁵Gükela ki ale me le aka zokeshü kesha gwünzin ai ntsoka we ale a npfü ayhütyü pe nhyu laso.

⁶Tson-o ale zokela dan aphu genyu ale kejao kenphü lo jonbü nyu anyun kelu bin nle.

⁷Npugü le Job nthon pen kela siki, a-le Eliphaz ka zoshü, “Ale n ge lo n pfügü hvu ge anyunta bin nle, hagun le a gogü Job hontse joketsin zokemvu genyu.

⁸Ntsoka methu tse tsenyü lo tanyü tse tsenyü sen Job kiryüo hagun genyu tsüdan pe rora thyü pe aki shülo. Job le hagun genyu aka kehithyü ti, lo ale a-kehi kenishüo hagun no keja pfü kezü tsü pe hagun ge shümvu lati. Hagun le a-hontse arüla jo ketsin zomvu.”

⁹Eliphaz, Bildad lo Zophaar tse le Npugü le anyugun no nyuthyü lotse shüyo thyüshü, lo Npugü le Job kehi kenishü.

¹⁰Job le a-pfünyu mishen dan genyu kehithyü keshü siki, Npugü le a-no gwakenye nilo, tson-o himhundyü a-le bin kehü jünhvu pe a-tsü shü.

¹¹Job tsasikezen nyu, a-lüginyu lo himhundyü ki a-pfünyu ju aphu ryü a-nthon-o a-kanyu keho thyü. Anyugun le Npugü le kenjün kethyü senryü a-ge keshü aphu genyu a-njün ho-o a-nyunthyü nbwe shü. Anyugun nmeme tse pisa peha lo suna benkhin nmeme pe a-tsü.

¹²Npugü le kerika jochü pe Job ketsü nyeki a-keyhun kekhin ki jochü pe a-tsü chonkvu shü. Job le tanyü yie tseryü pezi, ut yie tsero, methu yie hvu lo gada yie me tse le bin.

¹³A-nyu le peche mi tsenyü lo tenu mishen tse bin.

¹⁴A-le tenu peshü tsin gi pe Jemimah, kenyhun gi pe Keziah lo nche gi pe Keren Happuk tse kolo.

¹⁵Kazü apentha nyue tenunyu kecha le Job nyugi ju hontse zegwa mvu. Anyugun pvü le a-kenya pe anyugun tsünyu dan nyu anyugun jün thyüshü.

¹⁶Higü siki Job le chen tsio henzi yhun, tson-o yhunthon-o a-nyenyu dan nyenyu lo tsüdan nyenyu hyulo.

¹⁷Tson-o a-le chen kethon yhun lo-o sila.