Read Southern Rengma Naga JOB 5 Bible Online

JOB 5 - Southern Rengma Naga bible

JOB 5

¹Job ko-o, peha le ajo kenishülo gwa le. Nle a-ki gülo kegwa tsangge lilonyu peha le bin le?

²N npvü nnyuntao kenjünthyü sila titse kethyü le tharüchün kemvu, kepha tha so.

³Ale kephonyu nme le nshvumvu kebin hyu, ai ale shochün hi whütse pe a-kakhün nyu shüla.

⁴Anyugun nyenyu le kenikeshü hyu loho, jokerabin nyu temi nme soryü anyu nopen keshü ndi.

⁵Nnyo kebin nyu le kephonyu shye tyü ti shye le tsehü dan nyu yhun soryüe lo keterinyu le a-kenya tepen ti.

⁶Gwakemvu le nnyo nyu yhun chwiryü mvu, nmvue kekevü le kazü nyu yhun chwiryü mvu.

⁷Tson mvu! Temi le kenjün kethyü senryü a-npvü a-ge shülo kehü gwünzin, mah nyu mah kechin le chwiryü ketsin kethyü hontse.

⁸Ale n yatse kethyü we, ale Sunggigü ki rani gü a rüla pe a-mhundyü ka shüti.

⁹A-le tha keda thyü kehü dan ngun le shati loho, lo a-tho ndun kethyü le keni ndi.

¹⁰A-le tsangkenri nipe kazü gü nyu shüo low ntsen shü.

¹¹Ketsin, tsenyo kehü nyu penso shü kehü gü tsü le Sunggigü lo shekerhün pe chü kehü nyu aphu tsü shü hü.

¹²A-le tedo kegwanyu le rhi kebin dan no shesela hü, lo thakesha nyu le rhi kebin anyu npfü anyugun sen nyu minla hü nyo, tson-o anyugun le thyü kebin nme-e gwa loho,

¹⁴nhenyu lvu kae anyugun le kezün nyu kese hü.

¹⁵Ai Sunggigü le kesi nyu kendi nyu kenishü hü; a-le me le nshwe kehü rhokedyü nyu kenishü hü.

¹⁶A-le kendinyu no a-sidyü binlo lo serikemvu gü no nra mvula hü.

¹⁷Sunggigü le a-kemu tsin pe hishü kehü gü le henkegwa nyu! A-le nrho keshü ka nnyunta lanya.

¹⁸Sunggigü le a-le jün keshüshvu gü phinshü hü; a-ben le nnthyünnyü shü lo nthyü kesherhün shühü.

¹⁹Kenjün kethyü nyu a-le gwün kechon n keni shüti;

²⁰chenda le keryü ka, a-le n ntsen-o nno rhün loti, lo teri ka kesinyu n keni shüti.

²¹Selü kethyü nyu ben nyu Sunggigü le n kenishüti; kenke le keryü ka a-le n kenilo ti.

²²Kenke lo chenda le ryülo nle shwinyü lati lo nle tehenthyü nshvu loho.

²³Nle yhen kebin low günyu tsonye no bin loho; thame ka tehenthyü no nwhe loho.

²⁴Tson-o nphika nyu bwenye tse yhun loti; nle ntanyü nri kegü ka, anyugun le kenshvu kendi ka kebin hyu loti.

²⁵N nyenyu no chon pe tehen hontse ti.

²⁶Logvü gwünkho tikemvuthen shye le mün kebin hontse nle yhun bin-o nkethen ti ti.

²⁷Job, agun le füthon sao hi shalo laso. Tsüle ketsin le, tsügenyu tsü lolo.