Read Southern Rengma Naga JOB 6 Bible Online

JOB 6 - Southern Rengma Naga bible

JOB 6

¹A kenjün kethyü lo anyungwa kemvu pe kesükü ka kensu sü kethyü we,

³tsüle züda nyu hachon nyeki nsu ti, tsügenyu ajo kerü genyu hagun dun thyü nya.

⁴Kekvutsin Sunggigü le tho pe ashwe laso, lo tsüka türün le amin sü laso. Sunggigü le kenshvu kenrin no don pe a ntsun bin.

⁵Gada le tehen sütyü lolo rünyun lahü, lo methu nme le a-chvü sütyü lolo ma tse lahü.

⁶Ai segü le meme tse kethyü tsi shü kemvu chvü tyü logwa la? Terozü kechon gü ka nyu keyhün le bin nla?

⁷Tsühontse ale tyütsü nyümvu laso lo ale lihi tyüe tyüo ho laso.

⁸Nyuthyüo a-le nyu hiyo Sunggigü le tsü pe atsü mvula? Nyuthyüo ale akehi kenishü mvula?

⁹A-kendo yatselo a-no aboshvu lalo!

¹⁰A-le tsonti tse ale sha yatselo, asherhün-o whejon ti, kenjünthyü sae kesha thyü. Sunggigü le nshün tse ale shabin; A-le johokeshü dan ale ntsun hü mvu.

¹¹Ale nyu kekvu le bin-o yhubin semon? A Kenrin kendi le nyuthyüo yhun bin tila?

¹²Tso lope athyüshü ole? Amin hile lazo ole?

¹³A kenishülo nrün kekvu ndi laso; akeche fü gü lo kegwa bin nme ndi so.

¹⁴Kenjünthyü pe hihontse kethyü ka aso ketsin thyü kehü apfünyu senmvulo shvu bin nle- ale Sunggigü khelae nmvue.

¹⁵Ai hagun apvünyu ju, tsangri shümvu lalo rinyu le sinla kehü hontse a-sa laso.

¹⁶Rinyu dan le khetsa lo khezü le khin bin,

¹⁷ai kenyen nyu tsü le ndi lahü, lo züzhe le nrun lo sin lahü.

¹⁸Kenjwen nyu le zü füo nmhenla anyugun le nmhon-o kazü kesi ki sila.

¹⁹Sheba lo Tema nyu kenjwen nyu le fü,

²⁰ai rinyu kesin khoka anyugun kenrin ndi la.

²¹A genyu hagun le rinyu kesin tsüdan hontse hagun le ale gwünshvu kebin hyu shüo nshvuo akho ka ranila.

²²Ale hagun no jwe nme pe atsü nmvue agenyu jvüjwe pe peha nyu tsü

²³nmvue shwikerüchün nyu nmvue kekvunyu peha ben nyu akenishü lotse hi ole?

²⁴Gwasa, a senthyü shü; akemu zope ahishü. Ale ma tse hagun khwe nyü ti.

²⁵Joketsin le me le shalo hünyo, ai hagun we a-kon kendi zobin nyo.

²⁶Hagun le ale kenrun kenryü zobin nle tse rüchün bin nyo; tsonlo nyuthyüo ale shekese jozo keshü kenishü hü nla?

²⁷Hagun le do tego genyue wheshwi hü lo hagun khokenitsin hagun pvünyu, hon se pe hagun npvü n nya lohü!

²⁸Amhun nri shüta. Ale nku mvu le.

²⁹Hagun le nithen ritsin gü laso. Njümvu kebin tsü khela. A nmu nya. Ale njü bin nle.

³⁰Ai hagun kerüchün le ale nku bin- hagun le ale thyüzü bin-o njü letse zolo nrün ndi tse rüchün bin nyo.