Read Southern Rengma Naga JOB 9 Bible Online

JOB 9 - Southern Rengma Naga bible

JOB 9

¹Ele, ale himhundyü tsü aphu nyülo laso. Ai dihontse temi le Sunggigü mhundyü ka njülo tila?

³Ligü higü dihontse a-zen kenyi lomon? A-le ketso kethyü kon yie khishü logwa temi nme tsü kenishü loho.

⁴Sunggigü le thasha lo kvusa; temi nme so-o a-ntsun loho.

⁵A-le nchwe ki teshashü mvutse kazüthun khi ketu la lo a-nyunkenta nyu a-le tsüdan nke lahü.

⁶Sunggigü le kazükenu nishüo kazü kenishü; a-le kazü ketun dan bokenu shü hü.

⁷A-le yhüko no chwiryü mvula, lo kheje ki shyenyü no benshü mvula logwa.

⁸N me-e Sunggigü kecheo tsang sükhun shümvu nmvue zürin gü kedü shüo no rani lamvu.

⁹Sunggigü le shyenyü dan pe tsangge hüsü shü- penpho, sezoketsonyu, kachonkepennyu, lo tesinzin shyenyü dan.

¹⁰A-le thyükeshü a-tho keda ngun le shati lomvu. lo a-tho ndun kethyü le keni ndi.

¹¹A-le akhoka gü jüe ale a-hyu loho.

¹²A-le nyu lonyü yo khilo lahü; lo temi nme a-khinlo nrün ndi; temi nme nshvu mvuo, “Nle nyuthyü bin nla?” tse a-ketso loho.

¹³Sunggigü le a-nyunkenta süni hü. A-le a-shwikerüchün nyu boren lahü zürin gü Rahab kecheo a-ntsun kehü nyu.

¹⁴Tsonlo ale nyu jo zope Sunggigü jo kenishü tila?

¹⁵Ale akemu ndi yatse-e, ale Sunggigü ajün kerashü kehü gü ka a shwikenjün hilo kegwa nti.

¹⁶Tson yatse-e, a-le ano jozo shüe, a-le akhwenyü shüti ado tse ale tenyen mvu.

¹⁷A-le tsangkenbu terhi nipe aboren boryü laso a-kon a-ni nme kendi ka.

¹⁸A-le ano atüshe henlo kegwa thyü shümvu; a-le kenjün kethyü pe akeyhun kesü thyüla.

¹⁹Ale tenge tse shwi tile? Sunggigü ge tenge tse tile? Ale a-zan jokerabin ka gü tile? Segü le a-thyü pe no gülo gwa la?

²⁰Ale kemu ndi lo njü, ai ajo le mukela khwe hontse, lo ale kezo aphu anmu kebin hontse.

²¹Ale kemu ndi, ai kesha thyü gwün. Ale yhun anyutsemi laso. Lihi thyü bin-e; kemu ndi nmvue mue, Sunggigü le ngun nke lati.

²³Kemu kendi nyu nme le whütse silae, Sunggigü le shwinyü bin.

²⁴Sunggigü le kazü gü pe serikemvu nyutsüla. A-le mejün kera kehü nyu aphu no thahyu mvula. Sunggigü le tsü thyüshü mvu lo, segü le la?

²⁵A jon dan le tin jü laso, thakegwa nme ndi tse.

²⁶A keyhun le run kenmhetsin gü hontse tin jü laso, logi le tepfü chotsü kejü kenmhe hontse.

²⁷Ale n nyükemerao akethyü nmhinla titse binlo, akenjün kethyü aphu athen ryüla; Sunggigü le a nmu kebin ale sha laso.

²⁹Kemu pe age shükela sile, ale nyuthyü bin semon?

³⁰Shabu nme akemu dan sü keloimvu.

³¹Sunggigü le ashwe pe kerhu pe keshü tekhwün nme nyu shüla, lo a phinyae ahen keja laso.

³²Sunggigü le temi yatselo, ale a-jo kenishü nrün; ayi kega kebin gü genyu jokerabin ki güti.

³³Ai temi nme ayi jaka tsonchü keshüi ndi- temi nme-e Sunggigü ayi jün kera kethyüi ndi.

³⁴Shaja pe atsü nya gwün ta, Sunggigü! Kenshvu kenrin gü tsü sentin lalo!

³⁵Ale nshvu mvu. Ale a npfü anyun sha kebin genyu ale a-zen kenthon ti.