Read Southern Rengma Naga LÜHIN 10 Bible Online

LÜHIN 10 - Southern Rengma Naga bible

LÜHIN 10

¹Nyuthyüo nithenri ki hü nla, O Npugü? Agun le thyülo shvu kebin ka nle nyuthyüo kebu tinla hü nla?

²Serikemvunyu le ketekho-o kendinyu nshwe bin nyo; anyugun le thyü kebin sen nyu tsüdan min bin nyo.

³Serikemvunyu le a-gwakemvu nyüo ketekho bin hü nyo; tha tepen kehü gü le Npugü swentsü lo kenila hü nyo.

⁴Serikemvunyu le Npugü süjün hü mvu; a-ketekho nyu Sunggigü rüchün pe lihi kemvu thyü hü nyo.

⁵Serikemvunyu le lihi nyu gwa lo hü. A-le Sunggigü le me ketso nrün shalo nrün ndi; a-le a-shwikerüchün nyu süjün hümvu.

⁶A-le a-npvü a-nthon-o, “Ale thame kae chela kemvui; ale thyülo keshvu teno lo kemvui,” tson bin hünyo.

⁷A-jokezo le me swen ketsü, kenku, lo me kesü kedün kethyü no süpvü hü nyo; me kenrhi, jogwa kemvu zo whü whütse hünyo.

⁸A-le rünyi nyu kebu-o temi kemu kendinyu dushvu titse khwen bin hünyo. A-le a-keche kendinyu tenlo titse seju bin hünyo.

⁹a-le shünyho le a-künyu kebin hontse kebuo khwen bin hünyo. A-le kendinyu tson khwen-o; a-sen nyu tsüdan minlo lo süsen tinla hünyo.

¹⁰Kechekendinyu boshwen borenlo njio a-nyeki kvulo la hünyo.

¹¹Serikemvu güle a-npvü a-nthon-o, “Sunggigü le hi rüchün binmvu! A-le a-yhütyü keminlo lao a hyu binmvu!” tson hünyo.

¹²O Npugü, temi serikemvu tsüdan shaja pe tsülo! Kenjün thyü kebin nyu dan rüchün shülo!

¹³Dihontse serikemvu nyu temi nme le Sunggigü nkhin lo a-npvü a-nthon-o, “A-le shaja pe atsü kemvui tsonlo gwa tila?”

¹⁴Ai nle thyülo shvu kebin lo kenjün thyü kebin nyu hyuo a-zintse cheshü titse ndo bin hünyo. Keche kendi güle a-khipe ntsü shülo; nle a-zintse rhokedyünyu keche shü hünyo.

¹⁵Serikemvunyu lo temi gwakemvunyu kekvu boren lalo; anyugun thyü kezü shaja pe anyugun tsülo anyugun le tsü thyüsin mvulo kemvu then.

¹⁶Npugü le kethonthen gü le. Senyu le tero kecha rüshvu hüyo tsünyu le a-kazü nyu ndi lati.

¹⁷O Npugü, nle tsenyo kehünyu kehi nyü hünyo; nle anyugun thyü kepeche shüti.

¹⁸Nle mele a-nshwe kehünyu lo tegonyu dan kechü khwe nyüti; nle anyugun nopen-o me ketso ti, tson-o kazü temi no kenrin thyüni mvu lati.