Read Southern Rengma Naga LÜHIN 102 Bible Online

LÜHIN 102 - Southern Rengma Naga bible

LÜHIN 102

¹O Npugü, a kehi nyüshü ta; a kenra khwen no nki ryüta!

²Ale kenjün thyü kebin ka, a kebu tinla nyata! Akhwen nyüshü lo, ale nko keshü ka a kehi keni whütse shüta!

³Kechamvule a keyhun le mah kekhu hontse ndi gü jü laso; lo a min le mah le kero thyü bin nyo.

⁴Anyun boren pe tehen hontse rügu laso; ale a chvüe tyü nyü mvu laso.

⁵A kenjün kethyü le nthüpe agi le aru jepvü gwünzin laso.

⁶Ale kazü kesinyu güda nme hontse, lo phenren ki pfüterün nme hontse laso.

⁷Ale zhü lomvu; ale tegü nme le a npfü katsun ge dun kebin hontse laso.

⁸A shwikerüchün nyu dan le jon gwün a kemeni; lo a shwikenyü nyu dan le a swetsü hünyo.

⁹Ale chwüketyü hontse jonbü tyü, lo a yhüphuche pe a hon ritsü kehü genyu.

¹⁰N nyun kekhü lo nnyunkenta ka nle asüpe shwekela genyu.

¹¹A keyhun le ngwüngü kengü nme hontse, ale tehen hontse rügu laso.

¹²Ai Npugü n we, kethonthen raja thyü bin hü; shenhe aphu nyu nzan le bin zin hü.

¹³Nle soryüo Zion shwinjün shüti; hile a-shwi njün keshü gwünkho; gwünkho to gü le ryü laso.

¹⁴N gonyu dan le a-tson dan-e shwipe a-kenyü; lo a-nnyo kenphüe shwi rünyu mvu kehü genyu.

¹⁵Tsipwen dan le Npugü nshvuti lo kazünyu raja dan aphu nzan kechwi nshvuti.

¹⁶Kechamvule Npugü le Zion thyüso loti; lo a-le a-zankechwinyu me yhühyu thyüti.

¹⁷A-le rhokedyü nyu dan khwen nyü shüti lo anyugun kehi nyü ntsü la loho.

¹⁸Ryükezhü shenhe genyu hi thupe bin njülo, tson-o ntsoka nnyu lo kemvu dan-e no Npugü shweti.

¹⁹Npugü le a-kenshün bin ketetso ge bin-o nrishü, a-le tsangge bin-o kazü gü nrishü laso.

²⁰Donyu dan kenjün kethyü khwen nyü shü lo sila ti tse kelanyu dan hoshü la.

²¹Tsüle temi no Zion nyu Npugü zan zoshwishü lo Jerusalem nyu a-shwenlo nrün genyu.

²²temi lo rajaphen dan le kequen kengüo Npugü rüshvu.

²³A selo kanyu Npugü le athyü pe kvumvu la; a-le a keyhun thyü nzüla.

²⁴O a Sunggigü a keyhun nenyu akhisen tinla nyata. N we shenhe aphunyu yhun bin hünyo;

²⁵n duka nle kazü gü binjen shü, lo tsang dan hile n ben tho le.

²⁶Tsüdan le ndi lati, ai n we bin ti; tsü aphu phinya hontse ren lati. Nle phinya hontse tsüdan pe shwe lati, lo tsü le ndi lati.

²⁷Ai n we a-keme bin ti lo n keyhun dan le a-keni ndi.

²⁸N gonyu nyenyu dan le kenshvu kendi nyu bin ti; nle anyugun ntsen pe nmhundyü nyu bin loti.